埋頭苦幹咁做左成日野…

好唔容易先將堆積左成個星期既工作做完...

都係自己衰...唔好好咁專心工作...

拖到差D趕唔切交功課...

不過好彩~最後都總算叫完成丫~





好~等我執好D野就返屋企煮個飯食先~

我快快手手咁執好晒D野~

再Check多一Check有無執漏~

熄一熄燈,離開房間~

但當我一出房門,我就見到Ivy嗰Team嗰邊...仲有排光管著梗...





嗰排光管既位置...

我行一行過去...行過去著梗燈既位置...

我見到排光管下...Zoe仲喺道...

咦?Zoe仲未走既?

都已經好晏架喇喎...





再留喺道既話...又過鐘架喇喎...

Ivy已經話佢既工作表現唔多好...

如果而家仲要俾人捉到佢留喺公司既話...真係想保佢都保唔住...

唉~都係問聲先...提一提醒佢先好D...

我就行到去Zoe身邊:『Zoe?仲未走既?等緊男朋友黎接你丫?』

Zoe擰一擰頭:「唔唔...佢...佢又有D事...陪唔到我...」

雖然Zoe無望住我,但我就隱約見到佢對眼好似...好似紅紅地咁...

不過又好難怪既...





自己生日...男朋友又陪唔到...

仲要係一次又一次咁俾希望...又一次又一次換來失望...

係女仔都會覺得難受啦...

『咁...咁不如我陪你去食野丫~』都係快D勸Zoe離開公司好D...

Zoe粒聲都唔出咁,望住盆仙人掌仔擰擰頭...

呃...再唔快D離開公司就黎唔切...

『生日點都要食餐好D既~賞個面~俾我陪你慶祝下啦~』女仔係要氹既...





「嗯...」Zoe帶住一絲絲既微笑咁點點頭。

『嗯~咁你執好野先啦~』我就等Zoe執好野。

望住Zoe執下執下...好似好無心機咁執下執下...

睇黎Zoe真係好唔開心...

睇見Zoe咁既樣,搞到我都有D心痛...

等到Zoe執好晒D野之後...

『行得?』

「嗯...」





我就同Zoe行出公司。

呼~總算趕得切~

同Zoe落到黎商場...行下行下...行下行下...

沿途上Zoe都粒聲唔出咁...悶悶不樂咁...

唔...點好呢...

『Zoe~你想食D咩呢?』都係打開話題,唔好Dead Air~

「本來打算食日本野既...」Zoe扁扁地嘴咁...





本來打算?

打算係同男朋友食日本野?

『你鍾意食日本野?』都係問清楚會好D...

「嗯嗯...我好鍾意食日本野架...之但係...男朋友話日本野生勾勾咁有乜咁好食...唔肯陪我食...難得我生日先俾我扭到佢陪我食番餐...點知...又唔得閒...」Zoe扁晒嘴咁...就好似個小妹妹扭爸爸抱咁...

『我都好鍾意食日本野架喎~』講起日本野,我都好耐無食過...

「真係架?你鍾意食邊間架?我好鍾意食魚屋架~貪佢夠平又夠新鮮~」Zoe終於有返D笑意~

『係丫?又會咁岩既~我都係好鍾意去魚屋食架喎~尤其係荃灣嗰間~』以前老婆一話想食日本野,就會拉住我去荃灣間魚屋~

佢話嗰間魚屋夠晒新鮮~一定唔會食到肚痛喎~

「你都係鍾意荃灣嗰間魚屋架?我都係喎~係唔係真架?」Zoe有D懷疑~

『緊係真架啦~我呃你做咩姐?』我從來都唔講大話既~

「咁平民既野,你地呢D中產會食架咩?」Zoe仲係半信半疑咁...

『喂~你都識講我地呢D中產啦~而家中產真係搵得好多咩?財爺都係中產黎架咋~』細路女真係唔知米貴~

「咁你又揸Ferrari?」Zoe冷眼望一望住我...

『公司車黎架~』Zoe唔係咁都唔知丫嘛…

「下?!真係架?!」Zoe真係好驚訝咁...

『真係架~而家喺香港邊有人會自己買超跑架?俾稅都俾死啦~架車係公司借俾我揸架咋~如果我辭職又或者俾公司炒既話,離職時要還返架車俾公司架~』我好認真咁望住Zoe~

「咁都好丫~有Ferrari揸喎~」Zoe好似好葡萄咁~

『一D都唔好~架車有咩損傷,Cam完保險我地自己仲要包底架...』那有錢...

「咁小心D咪得囉~」Zoe好似好有自信咁...

『意外意外...』

「有咁多意外就唔係意外~」

同Zoe一路傾,一路行,好快就行到黎停車場~

行一行埋去紅色既Ferrari 488 GTB旁~

“咇”解一解鎖~

“咔”幫Zoe開一開車門~

「唔該~」Zoe上一上車,撳一撳住條裙...

點解我成日都咁留意Zoe條裙架呢?

雖然話我都只係出於欣賞既角度...

但我都唔知人地點諗架嘛…

可能人地唔係咁鍾意俾人望佢條裙...望佢對美腿...

美腿...美腿...Zoe條美腿...

我都係唔好諗咁多!快D上車先!

坐喺駕駛座上扣一扣好安全帶~

喺個軚盤上按下ENGINE START…

“吼!吼...”

「我都好想可以揸Ferrari喔~」Zoe扣好安全帶後,扁扁地嘴咁摸一摸個銀色既“488 GTB”字。

『你想揸丫?俾你揸喇~』只要小心D...應該無問題掛...

「我都無車牌...」Zoe又扁扁地嘴咁...

『咁你就快D去考個車牌~然後勤力D爬到上我呢個位~咁咪可以向公司申請借Ferrari黎揸囉~』不過我地公司最多既好似都係林寶...

好似話係因為大老細鍾意林寶,所以就入左好多部~

「嘩~要爬到上你呢個位喎...都唔知要幾耐時間啦~」Zoe無奈咁擰擰頭~

『有時D野好難講既~』我本來係想話“你叫男朋友買返架俾你咪得囉”...之但係...都係唔好提...

難得Zoe而家既心情好似好返少少咁...無謂提起唔開心既事啦~

「如果真係咁難講,咁你咪俾人炒魷魚囉?」Zoe古古惑惑咁望住我~

『咁又有可能會開多一個Creative Director既位出黎呢~坐穩喇~開車喇~』

「一定坐得穩啦~」

『你指Creative Director個位丫?』

「你話呢~」

“吼~~~吼~~~吼~吼~~吼~~~”

駕駛住Ferrari 488 GTB喺高速公路上行駛。

「我又唔覺得Ivy好難相處咋喎~」Zoe諗下諗下...

『下?咁都話唔難相處丫?我覺得佢好情緒化架喎...』我一邊專心喺路面上,一邊分心去同Zoe傾下講下~

「咁女仔丫嘛~女仔係情緒化D架啦~」Zoe好似無再咁唔開心咁~

『但係佢太過情緒化喇掛...』我都繼續同佢講下東~講下西~

避免談及有關佢男朋友既事...

佢唔開心既事...

現代愛情觀其實我已經唔係好懂...

可以話有D脫節...

因為我...我都有一段時間...無接觸過...無去留意過...無去深究過...

男女之間既事...不論係小說...電影...廣播劇,我都會避開...

因為我覺得...我認為...我認為我唔需要再接觸...

我唔會再接觸到愛情...

我既愛情...早就喺老婆離去既時候...一同離去...

吼~~吼~吼!吼...”泊好架車喺停車場~

“咇”鎖好埋架車之後,我就同Zoe行去魚屋~

行到去魚屋,望一望都唔係有好多人等梗~

我就行一行去拎飛,望一望:『無Book到位都只係要等五張檯咋喎~算唔算得上係好彩丫?』

Zoe笑笑口咁:「緊係算好彩啦~唔駛Book檯都有得食~」

『近年既經濟都真係好似...麻麻地咁~』近呢一兩年...香港既經濟真係好似無瘋狂嗰幾年咁瘋狂...

「嗯~都真係~真係好似...好似少人左~」Zoe望一望左右,「不過少人D唔係好D咩~」

『唔...都係既~少人D...清靜D丫嘛~』以前老婆都會咁講~

如果香港可以少人D...可以好似十年前...廿年前咁...未回歸之前咁...無咁多人...清靜D...人都開心D~

「最緊要都係唔好有咁多強國人落黎~」Zoe谷一谷起塊面豬登~

『最緊要唔好影響到我地公司既生意~』唔係就連飯碗都保唔住~

「唉呀~放左工就唔好成日諗公司野啦~你都係打工架咋~」Zoe拍一拍我膊頭~

『大老細返黎之後,我就要成日對住佢架喇~好大壓力架~』

「唉~我之前返Part Time夠成日都對住大老細架啦~都唔知有乜壓力~D大老細個腦真係好細架咋嘛~」

『我地既大老細個腦真係一D都唔細架囉~』

「唔係喎…我聽D人講呢...大老細唔係真係咁叻架咋喎...」

『眾所週知既都市傳說?呢個都係事實黎既...之但係...我就見識過大老細既真正實力喇!』

「真正實力?」

『嗯~不過我應承過大老細唔講得~所以打死我都唔會講~』

「講黎聽下啦~」

『唔講得~』

「講黎聽下啦~」

『唔講得就唔講得~你嗲我都無用架喇~』

「黎啦~講黎聽下啦~」

『做人係要有口齒架~』

同Zoe你一句又我一句咁等下等下~

我發現原來都有唔少企喺道等梗位既男仔望住Zoe...

而且佢地既目光...總係好似色迷迷咁...

色迷迷咁望住Zoe個胸...色迷迷咁望住Zoe對腳...

我望一望身邊既Zoe...又好難怪既..

今日既Zoe著上一條白色碎花吊帶連身短裙仔...

上面已經走左條事業線出黎...

下面一對雪白美腿都露晒出黎...

一個正常男人見到Zoe,又點會忍得住唔望丫~

係我先至咁唔正常架姐...

「做乜眼甘甘咁望住人?」Zoe古古惑惑咁打量住我...

『呃...丫~無~我見你今日著得好清...青春咋嘛~』我差D就想講清爽...不過我又覺得用清爽黎形容又好似唔係咁好咁...

「嗯?唔...都真係幾青春架~因為...我男朋友鍾意丫嘛…」Zoe諗下講下...又好似唔係咁開心咁...

講下講下...又講起Zoe既男朋友...又講起Zoe唔開心既事添...

唉點算好呢...點先可以令Zoe開心返呢?

講到氹女仔...我真係唔懂架喎...

「到我地喇~到我地喇~真係好快有位呢~」Zoe拉一拉住我...

『哦...哦...』又會咁快既...

都好彩...好彩咁快就入得...仲要喺正呢個時刻...

「點野食先~點野食先~」Zoe好心急咁拎起紙同筆~

『你都真係幾心急下架喎~』我望住Zoe手快快咁喺張紙道畫畫畫畫畫~

「肚仔餓啦嘛~緊係會心急D架啦~你想食D乜丫?」Zoe仲係無停過手咁畫畫畫畫畫~

『我乜都食既~只要你鍾意就得喇~』其實我對食又無乜要求既~

應該話...我仲會對乜野有要求呢?

好似…真係無乜…

Zoe突然停左手,打量住我...

Zoe望住我既眼神...總係好似...奇奇怪怪...

『喂…喂…你...你做乜咁望住我丫...』俾Zoe咁樣望法,我真係覺得好唔自然...

Zoe轉一轉支筆:「唔怪之得有咁多人都咁話你啦~你知唔知你對女仔既態度...好易令女仔誤會架?」

『我...我?我對女仔點既態度丫?』我一頭問號咁...

「咪就係你女仔既態度囉~仲有語氣囉~仲有詞彙囉~仲有眼神囉~仲有神情囉~」Zoe古古惑惑咁打量住我...

『我...我邊有丫...你聽邊個講丫?』乜我有咁俾人話過架咩?

「秘密~」Zoe得得戚戚咁...再將張點菜紙交俾服務員...

『講黎聽下啦~邊個講架?佢地仲講過我D乜丫?』

「秘密~呢D都係低級員工之間既秘密~」

『咩低唔低級丫?我地公司係無分彼此~無大無細架嘛~』

「烏托邦係唔Work架~」

『C-Moon係Work架~』

「你地D企喺金字塔頂既,就緊係Work啦~」

『烏托邦又點會有金字塔頂呢?』

「所謂既烏托邦都只不過係一個騙人既夢~實際都係有權力既人去控制班無權既人去幫佢地做事~」

『嘩~你都幾反烏托邦架喎~』

「你有無上網睇小說架?」

『有乜小說推介丫?』

「唔...我就推介一部唔出名又無乜人睇既小說俾你啦~叫做《香港革...」

同Zoe有講有笑咁傾下食下~

「嘩~真係好飽丫~」

睇起上黎,Zoe都好似好滿足咁~

『係丫係丫~我都好耐無食過咁飽喇~』

而我都覺得好滿足~

「嘩~你平日食唔飽架咩?你地呢D中等人都食唔飽既話,我地呢D下等人就更加唔駛旨意有飽飯食~」Zoe冷眼咁望一望住我。

『咩中等人...下等人丫...都唔知你講乜~』我就緊係扮晒傻啦~

「唔知就算~去個洗手間先~」Zoe拎起個手袋仔,就向住洗手間方向行~

我望住Zoe既背影...

開心D咪幾好~

其實快樂可以好容易,但點解又好似咁艱難?

係唔係我地要求太過高呢?

可能係我地要求太多...

我知我無資格講呢樣野...

因為我係Zoe口中既中等人...

我地係唔會明白下等人既痛苦架喇~

等我埋完張單...再等左一陣...

『行得?』等到Zoe去完洗手間返黎~

「嗯~行得~」我就同Zoe步出魚屋~

同Zoe行下行下:『不如散下步先囉~』

「嗯?嗯~好丫~反正有D飽飽地~」Zoe雙手放後,一步一步咁行~

話就話想散下步,實質我係想睇下有無餅店~

因為我想買個蛋糕俾Zoe~

頭先決定食魚屋決定得太過急,唔可以Book個生日檯,送個蛋糕俾Zoe~

咁就唯有而家睇下有無蛋糕買啦~

之但係你越想搵,就越係搵唔到...

同Zoe都行左成大個圈...唔係D餅店閂左門...就係就黎閂門...

想買個蛋糕仔都唔得...

「都差唔多要返去喇~」Zoe睇一睇隻錶。

『哦...哦...好丫好丫...咁我送你返去啦~』都有D夜喇...真係係時候返去喇...

喺揸車送Zoe期間,Zoe都好似好滿足咁~

之但係我呢...我就總係好似...好似差緊D野咁...

始終生日無蛋糕食,好似唔係咁完美咁...

總係好似...有D遺憾...

我覺得...我既遺憾已經夠大...我唔想人地都會有遺憾...少少都唔希望有...

成程車我都係咁諗...

一直都係咁諗...

諗到送到Zoe返黎佢屋企...諗到落車送佢返去...諗到我見到不遠處有間七仔!

『Zoe!呃...跟我黎~跟我黎~』我就拉住Zoe~

「哦?」Zoe就一頭問號咁俾我拉住行去七仔~

『你...你企喺道等等我~』當我拉住Zoe行到黎七仔門口,我就叫Zoe企定定等一等我~

「哦...」Zoe仲係一頭問號咁~

我就無理咁多,立即走入去七仔~

走入去睇下有無D似樣D既蛋糕~

我一走到入去蛋糕個架...望下望下...望黎望去都只係得...

『雪芳蛋糕?!』

我拎起件雪芳蛋糕望下望下...

有無得再衰D?

呢間係乜野七仔?

點解好似乜都無咁架呢?

唉~算啦~雪芳蛋糕都係蛋糕...好過無啦~

正當我拎埋盒蠟燭(估唔到會有蠟燭賣~),想行過去收銀買埋個火機之時...

「仆街喇!無帶銀包添!」

我聽到收銀嗰邊傳黎一把男仔聲...

我望一望上前...望一望個男仔...

係一個廿幾歲既男仔拎住盒...Dom Dom…

而個女店員就冷眼望住嗰男仔...就好似同梗個男仔講:「係唔係玩野呀?!」

係無帶銀包買Dom Dom嘛?

哈~又會咁失魂既~

失魂...講起上黎...我都有試過咁失魂...

就係喺最後一次同老婆出外...去西九龍海濱長廊嗰次...

「咁耐架...」

「搞乜丫…」

「無錢買套就咪學人扑野啦...」

「阻撚住晒...」

我拎一拎出銀包,行一行上前...

“嘟”一聲響...

『等我幫你俾~』我帶住微笑咁望一望呢個失魂既男仔。

「唔...唔該晒...我...不如你俾你既電話我,等我再還返錢俾你...」個男仔好似勁唔好意思咁~

『唔駛啦~唔駛啦~』我帶住微笑咁擰擰頭~

「咁...呃...多謝晒...」個男仔勁唔好意思咁點點頭...

『唔駛客氣~』我帶住微笑咁向個男仔揮揮手~

個男仔尷尷尬尬咁同我揮揮手,道過別之後,就衝左出去~

當年...我都係咁失魂...

諗住幫老婆買水食藥...點知自己連銀包都未拎就跑左去...

去到士多無錢俾...好彩有對好心情侶幫我俾錢...

唔係既話...一來一回...就辛苦老婆喇...

老婆...我而家已經唔止識得照顧自己...仲識得幫助別人呢~

拎埋個火機...俾晒錢之後...我就一邊拆下拆下包雪芳蛋糕...一邊插支蠟燭上去...一邊點著火...一邊行到去Zoe面前...

『Happy Birthday to you~Happy Birthday to you~』我小心翼翼咁行去Zoe面前~

Zoe望住我雙手拎住件插有蠟燭既雪芳蛋糕...笑一笑~

『Happy Birthday to Zoe~Happy Birthday to you~』我雙手遞件雪芳蛋糕去Zoe面前,『許個願先~』

「唔...」Zoe雙手合十,合埋兩眼,「呼~」

『生日快樂~』唔知Zoe願左個咩願呢?

「實快樂啦~雪芳蛋糕~」Zoe半帶恥笑咁接過我手上件雪芳蛋糕,坐一坐到石凳上...

『好過無啦~生日一定要有蛋糕架嘛~呢間都唔知咩七仔黎架~咁大間就喺得雪芳蛋糕喎...』我坐一坐到去Zoe身邊~

「哈~你唔好話喎~我以前都有喺呢間七仔做過~」Zoe分一半蛋糕俾我~

『下?真係架?』我接一接過Zoe手上嗰半份蛋糕~

「係丫~呢間七仔個老闆呢~好傻架~成日都俾我地蝦既~」Zoe笑得好幸福咁~

『咁佢都幾慘架喎~』俾員工蝦既老闆~人太好啦~

「佢就一D都唔慘~仲同到個好好既女仔一齊添~之後就成日都陪住佢女朋友~間舖就交俾D員工打理多~」Zoe諗下諗下...

『咁...都係一個好男人~』起碼肯花時間喺女朋友身上...

「嗯~佢真係幾好男人架~好過我嗰個先啦...」Zoe諗下諗...又咬一咬件蛋糕...

『唔...』我咬一咬件蛋糕...

「講開...我都係喺呢道做野時...識到我而家呢個男朋友...嗰陣時...佢成日都黎搵我...又會買公仔氹我...佢真係好識得氹女仔...」Zoe諗下諗下...咬下咬件蛋糕...

『唔...』我又咬下咬下件蛋糕...

「嗰陣時...老闆都有暗示過佢唔係好人...但我係要唔聽...我就係要任性...」Zoe開始有D哭腔...

睇黎…又勾起Zoe唔開心既回憶...

「我真係好...好任性...我真係...其實...其實我...其實我係做人小三!嗚嗚...」Zoe喊起上黎...

原來Zoe...Zoe係...

唔怪之得...

我應該一早就諗到...

諗到Zoe個男朋友...一定係...

唉...

Zoe又何苦呢...

「初初我真係唔知佢有家室...係喺同佢上左一次床之後...佢先話我聽...佢有老婆...仲有個十歲大既女...起初我真係唔想...唔想做小三…之但係佢話佢同佢老婆已經無晒感情...等到個女大D,就會同佢老婆離婚...我先會等...等...一直等...」Zoe喊住黎講...

有邊條仆街唔係話對自己老婆無晒Feel~會離婚~呃住你繼續上床呀?

唉...Zoe真係...傻女黎...

「佢一直都呃住我...一直都氹住我...我...我...我唔想...我唔想再...嗚嗚嗚!」Zoe越喊越激動...

『唔好喊~唔好喊~喊得多唔靚女架喇~』我拎一拎出張Tempo...

「嗚嗚嗚嗚!!!」Zoe就越喊越勁...

『唔好喊~唔好喊~生日唔喊得架~』

「嗚呀呀呀呀!!!」

哎呀~我真係唔識得氹女仔架~~~