愛情・從來只適合旁觀: 高一篇 （一）

而家係9月1號朝早7:45，我企左係塊鏡前面為自己既髮型作最後既整理，今日係高中生涯既第一日，而我亦唔再係初中個個唔識打扮既我，今日點都要比個好印像班新同學，
阿！都未介紹自己，我叫顧思乙，一個澳門學生。
你話又係用新學期黎做故事開始，然後話自己好興奮既開頭好老土？
頂，禁我個故事真係由呢個moment開始嘛，況且大部分人都會因為就黎要見到一班新同學而覺得興奮啦，你話啱唔岩先。
其實我由屋企行番學校只需要5分鐘，而開始上堂既時間就係8:05,以前既我總會早15分鐘就番到學校，因為我由細到大都比屋企人教導成一個品學兼優生，所以遲到對以前既我黎講係唔能夠接受既事，
但係自從經歷左我既初中生涯之後，我就明白到一個道理：男不壞 女不愛。
以前 我以為只要夠靚仔，就可以好易溝到女，但係我真係唔明，點解我初中個陣中意過既幾個女仔最後都係同左啲mk一齊！
由細到大我都比啲長軰讚我靚仔，而我自問個樣亦都唔係差，但係點解會吸引唔到女仔呢？
最後我發現左兩個原因，一來係我既乖乖仔性格，女仔只會當我係on9，莫講話會中意我，二來係我個頭真係大柒，由細到大我都係去阿媽帶我去既飛髮鋪剪頭髮，所以個頭一直都柒下柒下，就算幾令仔都冇用，
於是我係升高中既暑假終於去salon做左我人生第一次染髮，之後再剪左個mk頭，再鑽研埋身著配搭，終於成功由一個毒撚變成一個半mk仔。


但係呢啲都只係外表上既改變，我既內在仍然係一個乖乖仔，咩男不壞女不愛，你估變壞真係禁易咩。
但係相信大家都知道第一印像既重要性啦，例如一個人第一眼比人既感覺係一個弱不禁風既毒男，禁你就好大機會成為大家以後既主要抽水對象，相反如果你一開始比人既感覺係一個不良分子，禁大家都會忌你三分，我想講既係，開學日其實係一個好重要既日子，因為大家係班裏面既位置都係呢一日初步成形，而呢個位置就會跟著你直至你畢業為止，
所以我決定將自己塑造成一個壞學生，但係具體要點做呢？
就係要係遲到前1分鐘先入到班房，我計好曬時間，成功係遲到前一分鐘入到課室，呢個時候我望到成個課室已經坐滿曬人，只係淨番幾個空位，全班新同學都望著我，而我亦都望著佢地，
佢地個樣就好似係度講緊，嘩呢條友番學第一日就差啲遲到，一定唔方係咩好學生啦，呢個moment，我就知我係呢個班既位置已經開以成形，唔好誤會，我唔係要做呢個班既大佬，只係經驗話我知，壞學生溝女，一定比乖學生易得多。
而正當我想揾個位坐低既時候，又有條友衝左入課室，佢係我高中其中一個最friend既人，叫阿明，
我同佢係初中個陣已經同班，亦都算幾friend，佢好鬼靚仔，加上性格又好，又潮，初中個陣已經好撚受歡迎，有時同佢企埋一齊，都真係會有種自卑感，但而家既我已經唔同左，亦唔會再自卑，呢個時候班主任已經啤著我地，所以我地就快快脆脆禁坐埋一齊。 
「好，而家就會帶大家上禮堂，校長會同大家演講，然後訓導主任會同大家講下今年要注意既事」班主任對著全班宣佈 
「但係，根據訓導處既指示，上禮堂之前，我要先檢查一下大家既髮型，髮型不符既我會記低，然後交比訓導處理」班主任繼續面無表情禁講 
「屌，仆街啦，第一日就搞啲禁既野。」阿俊對我講，


其實我地學校係可以幼稚園一直升到高中，而阿俊由初中開始就已經日日比人捉頭髮禁濟，所以已經一早比學校點左相，每次要捉髮型不符既學生，一定有佢份。 
「屌，你都預左嫁啦。」其實雖則我初中個頭禁柒，冇比人話過髮型不符，但係我知自己今次實奶野，因為我個頭係暑假個陣染左啡色之後，就冇染番黑過，而且而家仲已經甩色甩到變左金色。 
「你兩條友真係夠疆，個頭禁都夠膽死番學，擺明叫人捉你地姐。」講野既係一個坐係我地前面既女仔，佢叫嘉宜，都係由初中開始已經同我地同班 
好快，班主任已經行到過黎我同阿俊身邊 
「你地兩個叫咩名？你地髮型不符，我要落記錄啦。」 然後我地就去左禮堂度聽廢話聽左一個鐘，開學禮亦正式落下序幕，而我係班裏面既位置，亦已經被初步確立。