愛情・從來只適合旁觀: 高一篇（五）

「今日社團活動個陣阿思望著我同你傾計個陣個樣超好笑囉」梓靈inbox我
「係咩？我冇留意到喎」
「仲有呀，今日我班有個野超搞笑囉.....」
自重拍左拖之後，我基本上每朝都會買早餐上梓靈屋企，然後同佢一齊番學，雖然話唔公開，但係我地都冇話太避忌，係差唔多行到學校先會開始分開行
記得個陣每朝都6點半起身，而家諗番起真係唔明白點解可以禁有毅力，可能呢啲就係所謂愛情既魔力掛
記得到左學校考試個排，我同梓靈一齊出左去食早餐
「記唔記得我琴晚話去左揾個男仔friend幫我温習呀？」梓靈一路食蔔白糕一路問我
「嗯，記得呀，做咩呀？」
「我...琴晚同佢訓番同一張床」
「哦」我都唔知自己點解可以禁平靜


「但係我地咩都冇做過嫁」
「我都冇講過咩，我信你嘛」
「點解你好似重來都唔會吃醋既？」
「因為我信你囉～」
大概，呢個亦係梓靈同我分手既其中一個原因....
自此我亦都明白到愛情唔係好似電視劇禁講，只要相信對方，就可以一直走落去
「我前度由美國番左黎過聖誕假呀」
「哦」
其實佢成日會同我提起佢啲前度，佢係我之前有7個男朋友，不過佢每次講親呢啲我都冇心情聽，因為我認為佢地都係過左去既人，而家我點對佢先係最重要佢重會同我講佢仲忘記唔到前度，但每次我除左講我會一直留係佢身邊之外，都唔知可以比咩反應佢
「我以前應承過要同佢慶祝生日嫁，所以我遲啲會同佢出街」


「下，你同佢兩個人？」
「係阿」
「……」
「仲有呀，我過兩日會過香港揾個男仔friend玩兩日喎」
「55」
其實我成日聽到佢同男仔出去玩，真係成個人都頹曬
兩日後，佢過左香港，我亦好似放監禁，終於有番啲私人時間，可以陪下屋企人同休息下，但係我估唔到，安隱既時間過得特別快，而緊接著係惡夢既開始。
我記得個日係星期日既夜晚，個晚落緊大雨，凌晨3點，梓靈打比我
「喂」
「…..」梓靈冇出聲


「做咩事呀？唔開心？你唔係啱啱先由香港番黎咩？」
「你覺唔覺得我地之間出左問題呀」佢把聲好認真
「咩呀？無啦啦講啲禁既野」我真係有啲火滾，成日都冇野揾野黎嘈，呢種事其實已經唔係第一次發生
「我覺得好多野都變左啦，你知唔知我係香港發生過啲咩事呀！我地不如算啦！」
「你唔講我點知姐，你而家講比我聽啦，我慢慢聽你講好唔好？」
「我覺得好對你唔著呀！」
其實，聽到佢呢句，我就知道件事一定同個仆街狗公有關
「我香港個friend個陣病左，跟著我上左佢屋企....跟著」
「得啦！你唔好講呀！」我印像中呢次好似係唯一一次對佢禁大聲講野
我聽得出佢係度喊緊「我覺得好對你唔著呀！我唔知點面對你呀！」
「……..」
個一刻，我咩都唔想理，我唔想出聲，咩都唔想知，我自問已經盡自己既能力去愛你，去照顧你，點解你要禁對我....點解
「求下你，你出下聲啦，我好驚呀」佢喊著禁同我講
「你唔好喊啦，或者，我地比個機會大家？」我真係唔想失去佢
「 ……」今次輪到梓靈沉默


「之前既事，我地當冇發生過，我地重新開始好嗎？」
「但係我係唔知點面對你呀！我同你一齊好辛苦呀！我好辛苦呀！就算繼續一齊，你都唔會再信我！你會想揾條鏈鎖著我嫁！」
我瞬間崩潰，原來我一直既付出，只係令佢越黎越辛苦，我一直以為對佢好既，原來不過係自己既一相情願
「真係唔可以重新黎過？」我作出最後既挽回，而換來既只係電話另一邊既沉默
「禁分手啦....」我忍痛講出口
「咩話？」
「….分手啦」
「你真係捨得？」
又係佢話要分手，而家又反問我捨唔捨得？玩我呀
「係你自己唔要我既 ….」
「你揾到一個好似你對我禁好既人比我，我咪同你分手囉」
「sorry, 我唔會揾到，因為對你最好既得我一個」
「你....真係覺得我地可以繼續？」
「總之我唔想冇左你.....」
最後….最後個晚我地冇分手，我以為經過今次我地可以繼續走落去，但係或者....或者我地著定唔適合對方