一個人,追一個女神: 第二章 雪條之亂
悲鳴自從比言已有意無意挑戰之後,一直保持住一種容易受刺激既心態。返學之後唔想點講野,又唔係好想理言已同公子兩個不斷挑釁悲鳴既賤人。其他同學都以為佢頹緊,事實上悲鳴真係頹緊,只不過係頹中帶半點擔憂,擔憂之中又帶半點惱羞成怒。
食飯時間。「喂,不如我地鋤大D吖?」班上一個醜女大聲叫喊著。當然鋤大D呢種老少咸宜既玩意受到唔少人既青睞,三五成群咁就開左兩枱。「吖,輸左啦!」嗰個醜女用撒嬌既聲去同身邊一個只受醜女歡迎既男仔講,「唔緊要啦,不如我地落去食野囉~」個男生回應。伏係枱上一D精神都無既悲鳴睇到呢個場面不禁想喺5樓既課室跳落地面,再打兩個前空翻以宣示不滿。
「嘩,足球小將都有仔媾喎,悲鳴你行動未?」啱啱食完飯上課室既言已又係度暗串悲鳴。「各花入各眼姐!」悲鳴想用呢句野黎麻木自己弱小既心靈。「講真吖,你都未追佢,點知有無機呀?」言已打開一條凍冰冰既雪條。「如果你將呢條雪條比我,我而家衝過隔離同佢傾計又點話吖!」悲鳴一邊奸笑,一邊睇住言已手上支雪條。
一心諗住睇悲鳴表演既言已又點會介意區區一條雪條吖,係悲鳴講完佢既宣戰金句之後,言已立即比佢手上支雪條悲鳴,再講:「比你比你!嗱,講過算數呀!食完就行動!」然後走去搵大波妹傾計。悲鳴大致上估到言已想點,大好機會緊係去搵大波妹落去食雪條啦!