用一場穿越籃網的夢想，擁抱妳: 12

Judy、馬騮和其他同學先後趕至，為Gaby送上慰問，而我就先行離開醫院，待他們探訪完畢再聯絡Judy，約她一起晚飯。

「知唔知佢幾時出得院？」我問。

「連佢幾時出得院你都唔知，真係好懷疑你岩岩做咩黎。」Judy繼續冷嘲熱諷。「醫生話如果冇特別野既話，聽日就出得院啦。你岩岩去邊黎？」

「冇，出去食左支事後煙。」我胡亂回答。

「變態架？病人都搞？」她也不亦樂乎。





「唔怕，血糖低唔會透過體液傳染。」

她忽然向我投以一個奸險的目光，「喂聰伯，近排精神好左喎。」

「痴孖線，你又想講咩呀。」

「佢同你講左啦？」

「講左乜野？」





「唔好扮蟹喎。」她「吃吃吃」地笑著。

「我扮埋蝦添呀。」

「我講緊，佢話左比你知佢點解同你分手未？」

心頭突然一墜，兩腳一軟，好像地心引力在一瞬間增大了好幾倍。「一早都話你係知架啦，又唔肯講。」

「我冇話我唔知呀，又唔肯問。」她稍作靜默，抬頭看著泛得金黃的街燈，像在思考什麼東西。「記唔記得個日，你黎福利部借籃球，係借用表上面見到既野？」





「借用表？有咩特別？」

「我咪話你唔係我個日第一個客既。」

我記憶力一向差勁，尤其是對於生活上的小細節，我更是過目必忘。不過，借用人一列上「高梓靈」的名字，我竟然還有印象。「記得，第一個係Gaby，佢借左個排球呀嘛。」

「仲有冇咩特別野？」她一向擅長「吊人條癮」。

「頂你個肺呀，你直接講唔得既，係要我估估估估估。」我半開玩笑地說。

她看見我急躁的樣子，大概以為我真的快要生氣了。「講啦講啦。」

「佢同你分手，係因為佢老豆。」

「佢鐘意左佢老豆？」





「妖，你聽唔聽架。」她顯得不太耐煩。「而家係你想知唔係我想講喎。」

「聽，你講啦。」我像隻被馴服的小貓。