用一場穿越籃網的夢想，擁抱妳: 14
「咩叫原罪？你呢鑊真係完美示範。」Judy邊咀嚼邊調侃著。
「有咩慘得過一出世就註定要食檸檬？我真係望唔透。」我說。
「就係未出世已經註定要食檸檬。」馬騮認真地說。
「或者下一世都註定要食檸檬。」Judy也一臉嚴肅。
我們三個在市政大樓的熟食中心，一路吃著沙拉骨、泰式椒絲通菜、魚香茄子煲，一路聊著雜七雜八的事情。我的腦海還是被方才在病房內發生的事情塞得滿滿。既然她那麼決斷，為什麼她對自己毫無抗拒感？Gaby雖然是超級考順的乖乖女，但她是否仍然不想放下這段關係，甚至願意犧牲她爸爸的安危？──不，她肯定不會。……
我猶豫著，要不要告訴他們？
「喂，做咩成程唔出聲？嚇到傻撚左？」馬騮說。
「定係探完人又食多鑊檸檬？」Judy大力嚼著沙拉骨。
「有啲野我諗唔通姐。」我低頭看著面前的白飯，「唔明點解學校會做得出呢啲事。」
「都過左咁多個月啦，你當笑話聽完咪算囉，咁上心咪盞自己辛苦。」Judy苦口婆心地說。「你唔知咋，我地羽毛球個邊上年咪團體亞軍既，打最後一場決勝賽輸左個個，今年突然話唔打。問佢原因，佢就依依唉唉好似有口難言咁，剩係話係私人原因，搵鬼信。」
「但係我唔甘心就咁完。」手中的筷子快要被我捏斷。「而且，Gaby話佢好想──」
「？！」
「好想乜野？」
覆水難收。
「好想──睇我拎冠軍。」
Judy差點把整塊排骨吞入喉嚨，馬騮則滿口白飯噴了一桌，惹來旁邊的食客憎厭的目光。「唔係掛師兄──」馬騮把眼睛瞪得好大。
Judy猛烈咳嗽，然後慢慢喝下一口溫水。「而家佢老豆會唔會已經係屋企暴斃左？」
「唔係啦，Call定白車先，你老尾日光日白講鬼故。」馬騮佯裝拿起電話。
「你兩個咪玩啦，佢真係咁講。」我放下手中的筷子，鬆開捏得滿是手汗的掌心。「佢仲話咩比啲時間佢，咩好快就會知點解，仲有咩──唉我唔知喇，總知我聽到一頭霧水，係聽完Judy講返成件事之後先估到多少少。」
「比時間佢……佢自己都控制唔到架……」Judy喃喃自語。
「Judy？」
「呀，冇，我話我覺得佢始終都唔相信呢家野，就算佢點錫佢老豆都唔可能為左佢，扭曲自己。」Judy說得很堅定，「呢個唔係我識既Gaby。」
「而家打去佢屋企，問下佢個管家佢老闆死左未，咁咪知道係咪真係咁邪囉。」馬騮不置可否。
「要死一早死左啦。記唔記個日中午，佢個排球碌左過黎。」
「你同佢前後腳借野個日？」Judy問。
「係，就係個日。我同馬騮傾傾下計，突然有個排球碌左過黎。我望過去排球場，見到Gaby棟左係到，郁都唔郁，好似等緊我過去咁。」
「點解好地地一個愛情故事，你可以講到好似鬼故咁？」馬騮問。
「即係──我意思係──我覺得佢係專登碌個波過黎。」
馬騮「噗哧」一聲開懷大笑，Judy也半掩著臉嘰嘰笑著，生怕又會把飯硬噴出來。
「呢鋪大鑊，唔通真係咁邪──我地個Friend比鬼上身呀。」
「仲有少少妄想症添。」
「喂，」我心中慍怒，「我認真架好冇。」
馬騮見我皮肉不笑，驟然收起了笑容。「佢專登碌個波埋黎做咩？點解佢唔自己行過黎搵你？」
「你都傻既，Gaby點會咁主動。會既話個個就唔係Gaby啦，雖然專登碌過黎都好有問題。點解你會咁諗既呢呀聰爺？」
「直覺──我都覺得好奇怪，好似佢有難言之隱咁，有野想話我知但又唔出得聲個種。」
Judy突然面色一沉，隨即又掛起笑容：「其實會唔會係你諗多左呀。」
「我都唔知，可能真係我諗多左啦。」
馬騮用力把通菜吸啜進口中，弄得滿臉椒絲醬汁。「喂聰仔，話時話，你有冇諗過重新夾返埋 隊波？」
我輕蔑地笑了一下，「夾？你唔記得校長個時講咩架咩？條仆街根本就有心整散隊波。」
「唔好同我講呢啲野，你自己想唔想打返先。」馬騮說。
「你講到好似呢到你話事咁喎。」我笑笑。
「聰仔，我咁大個仔都冇試過咁認真。」馬騮嚴肅得像被什麼附身，「如果你想夾埋隊波，我點都會幫你手，前提係你自己要燒返著你團火。」
「馬騮，我識你咁多年，我知你你知我，好多野已經在心中，心領啦。」我緩慢地啜了一口茶。「就算你幫手，隊波都湊唔夠人。更何況，個死肥佬下年肯定會大手買返幾個球星返黎，到時已經唔係個回事啦。」
「我唔係講緊呢個幫手，」馬騮每一隻字都很清晰，「我係話，我有辦法搞掂校長個邊。」
我和Judy的眼珠快要掉落桌面。
「馬騮──你講真？」Judy難以置信。
「你識我咁耐，有見過我咁認真咩。」馬騮自信滿滿。
「你有咩方法？」我訝異地問。
「有咩辦法黎講呢，我要賣個關子，你專心做你應該做既事啦。不過聰仔，我真係唔想睇住你再頹返。」他的目光低留在空氣中的某一點，「岩岩個幾個月，我覺得，我人生好似冇左個兄弟咁。突然消失左，好空虛──」
「如果你係講真既話──」
「我想搵返我兄弟。」
我赫然抬頭和他堅定的眼神交接，然後整個僵住。
「如果你係認真既話，我唔會再猶豫。籃球係我既夢想。」
「籃球係我地既夢想。」
我舉起拳頭。這一次，拳頭被自己捏得很痛，很緊。