用一場穿越籃網的夢想，擁抱妳: 61
「點解你可以搞得掂校長個邊？」我問馬騮。
「容乜易姐，有銘Sir係到。」馬騮咬了一口蘋果批。
「銘Sir？你地唔係話佢係奸細黎架咩？」Judy問。
「奸條毛，佢係好人黎架，唔係佢校長都唔會比我地說服到。」
「明明個陣入校長室佢笑得好奸架喎。」我回想起半年多前的事情。
「唉，佢有把柄係校長手先會咁。總之一言難盡啦。喂話時話，聰仔你係咪食左藥？點解你可以『鍊』得嬴阿輝？」馬騮一副難以置信的神情。
「冇可能，佢科Physics邊有可能咁低分，肯定有『警滾』啦。」Judy拿起一條薯條，沾上茄醬。
「我真係搵唔到係我身上有咩係冇可能。」我說。
「有，你中途轉Gay就實冇可能啦，我肯定搵老虎鉗都夾你唔彎。」馬騮說，然後咬下一大口巨無霸漢堡包。
「咁你又有道理喎。」我誇張地說，「不過有鬼用咩。」
「手足，守得雲開見明月呀，實得既。」馬騮邊嚼邊說。
「係『見月明』呀大佬，唔好扮文青好嗎。」Judy也咬了一口魚柳包。
「見條毛就有，去完台灣灰到憨直直呀。」
「點解？」二人異口同聲。
「其實，拿講完唔好打我──其實Gaby專登過左黎台灣搵我。」
馬騮的嘴巴張大得可以放進一顆雞蛋，Judy卻只是默默地嚼著薯條。
「整你個制呀，你之前專登唔講架？」馬騮指的「之前」，是我剛回來之後和他們倆的那次見面。
「冇話專唔專登既，咁個陣提起佢就好灰，咁咪索性唔提。」
「佢同你講左啲咩？」
「咁又真係奇怪，」我說，「話就話專登過黎搵我，但只係過黎搵我行左日街，周圍食下玩下，入機鋪玩左陣，仲有咩呢──」
內心突然悸動一下，沉澱到腦海深處的記憶以非常快的速度直衝水面。
怎麼會藏得那麼隱秘？是我下意識要把記憶磨抹掉嗎？
「仲有，佢同我講左樣好突然既野，你地唔好嚇親。」
「講你就講啦屌。」馬騮把身體拱前。
「記唔記之前有次我地約係街市食飯，你咪話係佢老豆因為好迷信，所以好想我地分手既。」我對著Judy說，她點點頭。「其實唔係咁架。」
「講你就講啦妖。」Judy模仿馬騮不屑的語氣十分神似。
「唔好嚇親。」我清清喉嚨，「其實個晚車斷我老豆隻腳個個，係佢呀爸。」
馬騮極大聲地「吓」了出來，Judy差點放入口的薯條怪異地停在半空。
「咁就可以解釋到所有野，例如點解佢呀爸第一次見到我就已經面青口唇白咁款，點解佢會驚到即刻叫Gaby同我分手。根本唔關迷信事，係佢一早已經認得我，就係勁大雨個晚撞到既人。」
「拍電影咩──斷估你唔會用呢啲事黎車大砲掛。」馬騮自知全場焦點都在他身上，刻意收細聲量。
「Gaby真係提都冇同我提過。」 Judy說。
「佢都係好後期先知，我諗佢自己都查左好耐。」我說。「不過講真，其實老豆件事我已經放低左好耐喇。只係如果知道真相，一黎可以搞清楚好多野，二黎老豆在天之靈都可以走得安樂啲。」
「而家搞返清楚，你地咪可以一齊返囉？」馬騮朝我伸出手，「恭喜哂恭喜哂，原來黃生你唔係一出世已經食檸檬，除左恭喜我都唔知講咩好。」
「唔係架，就係呢樣先令我最灰。」
「屌，又唔係。你講野可唔可以唔好斷斷續續有前冇後姐。」馬騮說。
「佢話，佢同佢男朋友感情好好。」我立即低頭呷了一口可樂，不讓他們看見我低落的神情。
「吓？前兩三個月散左啦唔係咩──」
「馬騮！──」Judy大喊一聲，不屑地「啑」了一下。
「咩呀，唔講得架咩。」馬騮搔了搔後腦袋。
「Judy，你如果知啲咩野，唔怕講啦。」我說。
她嘆了一口悶氣。
「唉頂，事到如今反正講唔講都死架啦，我啖氣就真係谷左好鬼耐。」她大力地把手中的可樂轟落桌面，「你係咪豬黎架？你真係一啲都唔發覺架咩？」
我沒有被她的舉動嚇倒，反而低頭看著餐盤上的廣告，心裡沉思。
我察覺，我當然察覺。
我那麼熟悉她的一切，怎麼可能一點異樣都沒留意到？
只是，我無論在籃球那邊怎樣勇往直前，在面對Gaby時卻是個只會逃避的膽小鬼──
我害怕失去。
我生命裡面，已經失去得夠多了。
我不想再親眼、親耳、親身經歷多一次那種把整個自己敲碎、再頹廢地等待重新拚合的過程。
所以，連她說和男朋友過得好好的時候，我選擇直截了當地相信。
令自己麻木、徹底讓事情沒有轉寰的餘地，不就會過得好一點了嗎？──
「我問你嘞，佢同你一齊既時候有冇成日唔記得野？」
我回想在台灣和她見面時的每一幕場景。
「冇喎，佢連我以前朝早幾點起身出去練波佢都記得。」
Judy有點疑惑，「或者你呢個豬咁蠢係佢心目中真係好重要啦──」
我腦海突然閃過一個畫面，「呀！我醒起啦，有呀，佢連自己應承左要黎睇我冠軍賽都唔記得。」
「呢個唔關事啦，佢根本就黎唔到。」
我正想開口問她原因，她卻搶先一步說：「咁佢有冇突然行行下頭暈？或者突然面青口唇白個啲？」
我仔細想了想，然後說：「頭暈就好似冇，不過入機鋪玩，佢乜都唔玩得咁濟。」
她用力地拍一下桌，「咪係囉，死蠢，咁都唔覺有問題？」
「我以為佢係小問題……」我內心的悸動，來源於這個對著自己撒的謊。
「小你個頭呀！」她語氣激動，「佢個腦，生左個瘤──」
頃刻之間，她已經哽咽得說不出話。
「癌細胞已經──已經去渾全身喇──」
我低著頭，鼻子酸得可怕，淚水像傾盆而下的雨般嘩啦嘩啦地落下。
我的心頭，徹底地濛上一層厚厚的死灰。
無論怎樣也抹不掉的死灰。
「佢寧願呃住你等你覺得自己冇望，都唔想你唔開心，更加唔想你同佢一齊返──」Judy徹底哭成淚人，「你知唔知佢每晚，都係自己一個係病房喊──」
淚水一發不可收拾。
馬騮收起以往的嬉皮笑臉，「仲有得醫架可？」
Judy側目看看他，搖了搖頭。
「可能──佢可能仲有三個月就要走喇──」
我大哭，哭得發出嗚嗚的聲音，全身抖個不停。
我自以為我很勇敢。
可是，最勇敢的女孩，卻在每個忍受著無盡孤獨和寂寞的晚上，獨自和病魔搏鬥。
我無法原諒自己的懦弱，於是立即拿起手機。
「你做咩呀？」Judy把我的手扳下。
「我要打比佢──」我把她的手推開。
「你痴左線呀？你冷靜啲好冇？」
「你叫我點冷靜？如果你鐘意既人得返三個月命，仲日日剩係對住你笑唔想你傷心，你會點做？」
「我唔知我會點做，我剩係知你咁做會浪費哂佢所做既一切！」
她一手拍落，電話啪嘞一聲掉到地板上。
我呆住，看著地上的電話。
良久的沉默，把三人之間的空氣凝結。
「我明啦。」我說，「我知我應該點做。」
她俯身在桌下拾起電話，遞到我面前。「Sorry呀我激動左。」
「你講得岩，我永遠都係豬咁蠢。」我說，「呢三個月，我會陪佢行埋落去。」
我們三人，相視，微笑。
「真男人。」馬騮說。「咁，我地個冠軍點？」
我拿起一條薯條，沾上茄醬。「話你知，我地個冠軍，就好似我手上呢條薯條咁。」
我拋起薯條，薯條在半空掉落我張得極大的嘴巴裡。
「食硬。」我說。