依家諗起中秋個晚,真係一場夢。我個朝起身發現自己係大雄張床! 

果晚發生乜事,我都唔太記得,淨係記得自己飲左好多酒。 

發夢夢見丁當同我係遊樂場玩,果深情一吻如果係真,咁就好。 

雖然起身係大雄張床,但我相信佢乜都無做。不過我都唔敢同其他人講,連丁當都無講,比人誤會就唔好。 

呢半個月,大家大致都番去以前咁,只係多左大雄同Kelly。丁當同我都無再提表白既事,係好定壞呢? 



其實我地都心知肚明,好清楚發生左既事就發生左,但我地依然選擇唔提,咁樣或者對大家都好。 

Kelly同丁當愈黎愈熟,依家丁當有時仲同Kelly兩個落去小食部。佢好似有意無意避開我咁,而Kelly總係用我冷冷既眼神望住我。 

每次得翻我一個果時,大雄就過黎陪下我,講下笑哄我。 

差唔多每隔一個星期,佢就問我考慮成點,而我每次都笑而不語。 

諗諗下,我都有好幾個星期無約過丁當去海皮啦。 



我: 
20:10 你今個禮拜六得唔得閒? 
20:10 不如一齊落海濱跑下步傾下計? 


唔知點解,佢明明在線上,icon係綠色,但過左半個鐘都未覆我... 可能佢有野做,又唔想拒絕我,我都唔想要佢難做。 

我: 
20:48 我突然諗起我星期六有野做 
20:48 下星期再約  



丁當: 
20:48 Sorry 頭先去左沖涼  
20:49 唔得咁下星期先啦  


原來去沖涼,係我諗多左,不過算啦。 

第二朝,丁當係咁同我say sorry。其實明明係我唔約佢,但佢好似係佢做左錯事咁。 

上PE堂個時...

「今日袁Sir病左,所以男女一齊上,大家一齊玩閃避球啦!不過,最緊要都係做熱身先。藍藍,今日你黎帶大家做。
 」Miss Cheng叫我出去,我都推唔到。 

出到去,我見到丁當同Kelly係一邊細聲講大聲笑,睇到我好心痛。我愈黎愈相信當初丁當既果句「我愛你」只係一時開玩笑,而一直係我過份認真。 

「照舊大家先做體能!Sit up、掌上壓,30下2組。」聽到指示,我就想去搵丁當同佢一組,但我未行到去,已經見到佢幫Kelly做緊Sit up… 



「喂!女班長,識你咁耐,當我陪下你啦哈哈」見到肥仔俊走黎搵我。明明就係佢無人陪,至少我都可以搵大雄。不過見佢咁慘,就幫下佢... 

「女班長,你覺得Kelly同丁當襯唔襯?」肥仔問我。 

「襯... 襯嫁。」 

「咁你同丁當襯D定Kelly同丁當襯D? 」 

「痴線!你比其他人更加清楚我同丁當只會係兄弟!」 

「你睇下你幾大反應哈哈 」 

「提提你啦。擺到明果個大波妹就係鍾意丁當,至於丁當上唔上釣呢?你睇佢依家幾受落就知答案啦。不過,你想挽救,都未係太遲。 」 



「我都唔知你講乜... 我同丁當只係好朋友,佢有女仔追,我不知幾鄧佢開心哈哈」 

「既然係咁,咁你最好慢慢遠離丁當啦,咁樣佢先真正可以放低你,從新好好生活。」 

離開丁當?點解肥仔要咁講... 平時嬉皮笑臉既佢,偶而露出呢個認真表情,我知佢一D都唔係係到講笑。成堂我都無心玩,一開波就比人踢出局。都好既,可以坐係一邊好好咁諗下呢幾個月既事。 

落堂個時,大家都跑哂去小食部搶雞串,身為女班長既我只好自己係儲物室執野。 

聽到有D腳步聲,太好啦!有人黎幫下我! 

「丁當,話我知... 我有咩比唔上藍琛蕾? 」原來係Kelly佢地,佢地仲要講緊我,我即刻縮係塊板係面。 

「Kelly,你做乜無啦啦講呢D?」 

「我唔明呀!好唔容易我先拉近我地之間既距離!但... 你就... 頭先成堂你都望住藍琛蕾,你以為我唔知? 」 



「...」 

「我到底有乜比唔上藍琛蕾?無錯!我係無佢咁靚,但我自問外表唔算太差...」突然,Kelly鎖左儲物室個門,佢拉起丁當隻手去佢胸前!!! 

「丁當,你想要乜我都比你。你開口就得啦... 無論係我既真心,定係... 」 

佢地究竟搞乜!?