[真人真事+少少甜] 一切，由MSN開始: 第二十七章、藍：七天試用

一上到纜車，我就好唔爭氣咁喊左出黎。明明我就唔係丁當既邊個，偏偏見到Kelly同丁當咁，我就好唔開心...  

「藍藍，你做乜事！？做咩無啦啦喊？ 」 

「我無事呀...」 

「咩無事！你都喊左出黎啦... 我知啦。你一定係因為丁當...」乜真係咁明顯咩？望向前面架纜車，見到Kelly攬實丁當，我喊得更加厲害。 

「當初，係我將丁當推得更遠。依家既我根本無資格係到妒忌Kelly... 」 



「藍藍，你咁又何苦呢？相信我，我會比丁當更適合去照顧你。比個機會我...」大雄拖起我隻手，捉得實一實。我望實佢，係佢眼中完全感受到佢對我無盡既關懷同愛意。 

「大雄...」呢一刻既我仲未完全可以下定決心同大雄一齊，始終丁當係心中依然佔有好重要既位置。 

「藍藍，我知咁樣要你同我一齊唔係太好。不如咁，你比七日試用期大家，睇下大家適唔適合對方。七日之後，你再好好咁做決定，好唔好？ 」 

可能，我應該比個機會大雄。一直以黎對佢視而不見，咁對佢太衰啦。況且，我依家發現大雄既溫柔已經慢慢咁感動左我。 

我點點頭，大雄即刻攬實我。 



一落車就去玩過山車，開頭都有D淆。一上車，大雄就拖實我，唔知點解，個心即刻定哂。嗌完一程車，個心好舒服，頭先所有既不愉快都嗌哂出黎。   

Kelly話:「不如抖完之後我地一齊去打大佬囉！」 

「姐係鬼屋？」大雄問。 

Kelly興奮咁話：「Bingo！」 

「好啦，我地快D行！」我都即刻跑去鬼屋既方向。



排隊都排左九個鐘，一路上我地都係到求求其其傾下學校D野。排得愈近個心就愈驚。排排下，仲要有幾隻鬼跑出黎嚇下你，嚇到我即刻躲係大雄後面。 

相反，Kelly就好enjoy，笑得好開心，原來佢份人咁大膽。 

「歡迎參加地獄之旅！入左黎就唔好諗住有命出番去啦哈哈哈哈哈哈哈哈哈哈 」羅蘭姐把聲一出，真係嚇疾哂我地。我見連Kelly都無頭先咁興奮，我就更加驚到想死。 

我地四個連同另外一對情侶分成一組，逐個逐個咁行入去。第一個係大雄，之後先到我，我一路都唔太敢望出去。 

「嘩！   」Kelly同丁當大叫左一聲，佢地隔離有隻彊屍無啦啦跳左出黎，大雄反而一直係到傻笑。 

我見Kelly撓實左丁當，我都即刻捉實大雄。因為咁樣，我先可以證明比大雄睇我都好重視佢。我唔想佢覺得我係因為得唔到丁當先同佢一齊，因為我知係我心底裡，大雄都好重要。 

「呀呀呀呀呀呀呀呀呀呀呀呀呀 」有隻女鬼係地上面爬出黎，嚇到我即刻攬實大雄。大雄擰轉頭對住我笑一笑，緊緊咁拖實我。 

呢個時候，我feel到丁當同Kelly望實我地，我想放手，但大雄捉得我太緊。 



或者咁樣都好，可以令Kelly唔再針對我，亦可以令丁當真正咁放低我。成程有大雄係身邊，我都即刻覺得唔太驚。 

一出到去門口，我依然拖實大雄。丁當望實我，臉上係失落既表情。反而，Kelly比以前開心得多，開始同我地有講有笑，仲突登請我地飲野。 

丁當，記住要好好對Kelly，因為佢好愛你。