[真人真事+少少甜] 一切，由MSN開始: 第六十三章、丁：不上不下

食食下米線，藍藍拎左部電話出黎睇，睇左陣佢就突然喊到收唔到聲。 

『做咩事呀？ 』藍藍咩都唔肯講，只係猛咁擰頭。 

食完米線之後，我送藍藍返屋企。行緊果陣，藍藍終於肯開口。 

『岩岩…大雄同我講左分手… 』 

『下！？咁突然嘅？ 』 



『佢話佢３個月之後就要出國讀書，所以長痛不如短痛… 』 

『係…係咪因為我？ 』 

『其實由頭到尾都係我一個人嘅錯，根本我就唔應該同佢一齊，咁我就唔會傷得佢咁深，就唔會搞成依家咁… 』藍藍講講下又喊左出黎，好彩條街唔係好多人，我即刻拎左包紙巾俾佢。 

望住藍藍喊到咁sad，我就知道大雄係佢心目中嘅地位一定好重要，佢真係好愛大雄。 

就算我幾愛藍藍都好，我諗我都要俾d時間藍藍，等佢完全放低左大雄，我先至諗點行下步。 



我而家唯一可以做嘅，就只係默默陪係藍藍身，幫佢盡快撫平情傷。 

跟住就係考試，或多或少都分散左藍藍嘅注意力，佢暫時都將精力放係考試度，個人都叫做有個目標無咁頹。 

我依家同藍藍又回復返以前嘅朋友關係，層隔膜又好似消失左，但係埋門一腳始終都係推進唔到。 

一個月之後… 

天氣越黎越凍(其實本來都已經好凍)，每日返學早起身都係一種折磨，不過好彩就黎放新年假。 



而咁岩嘅係，放假嘅第一日，正正就係藍藍嘅生日。 

我諗，我應該等夠喇，係時候要主動d，盡返自己做男人嘅責任。