那年玩社，四位靚女: 九。一

（之前原來出漏咗 sorry）

準備充足，萬眾期待嘅社際足球比賽決賽—紅社對黃社即將開始！

今次，我哋紅社決定用返同上一場一模一樣嘅陣容，務求再一次大勝而回。

我戴上隊長臂章。「Sky，有冇信心？」

「掂過碌蔗！」





「咁就最好。」

「嗌返聲先！紅社！」

「Red house！」

今日，紅社嘅看台唔單止有紅社社員嚟打氣，仲有一班由嘉瑜帶領，專誠嚟食花生嘅綠社人。

我同嘉瑜打咗個眼色，佢班friend即刻做嘢。「康洛文！康洛文！」





屌，爽到。唔講仲以為我打緊世界盃，爭在未有我嘅海報姐。

跟住嘅打氣，終於變返做正經啲。一邊大嗌紅社，一邊就嗌黃社。

不過最難做嘅，就係莉曦。一邊係佢嘅社，一邊有佢嘅男朋友，都唔知佢撐邊邊好。

兩隊球員列隊握手。我同申屠子成都係隊長，我同佢握手個陣，大家都不自覺咁握得最大力。

「祝你好運。」





「大家咁話。」

紅社對黃社，隨即開始！

黃社先開波。申屠大腳傳俾佢哋嘅中場，跟住一直控球在腳，好穩陣。但係比賽初段，大家都冇乜有威脅嘅攻勢，大家都只係互相試探一下。

過咗大概十分鐘，我鏟走咗黃社中場嘅波，發動攻勢。黃社嘅後防，甚至係申屠都反應唔切，機會嚟啦！

招牌禁區外重炮，董之英龍門都擋唔住，何況係黃社嘅龍門？

輕輕鬆鬆，一比零。看台上面繼續大嗌我嘅名。

「唔錯呀，我哋開始啦。」面對申屠嘅挑釁，我竟然有少少淆，始終，佢都好犀利。

果然，佢開始開turbo，插花插足三下，仲搞到天元成個仆咗落地。申屠話咁快已經進入單刀狀態。





我唔想咁快輸返一球，用盡力跑去禁區防守。

係我跑到佢身後嘅時侯，佢大腳一抽！

好彩，我哋嘅龍門文以立伸盡手臂，掂到個波，個波再中柱出界，角球。

「立仔，好嘢。」

黃社即刻開個角球出嚟，我哋都仲未mark好人，所以走甩咗申屠。佢係門前一頂，立仔都反應唔切。

一比一，拳來腳往，相隔僅三分鐘。

我哋兩位只係稍微展現真正實力，就已經令到比賽變到好刺激。





我同申屠都大概知道對方嘅實力，就無謂再拖泥帶水，大家打得放好多。

我多咗係中場破壞對方攻勢，再放波比黃展賢。佢嘅速度可能仲快過我，係邊路不斷製造威脅。打打下，連陳天元到大發神威，不斷接應黃展賢出嘅高波，頭槌攻門，有一球甚至頂中楣。而黃社亦都拳拳到肉，申屠嘅插花，我哋點防都防唔住，好彩文以立上晒身，大大話話救咗五六球。

膠著情況有上半場帶落下半場。就算我哋雙方開始換人入嚟，戰況依然無乜大改變，比數維持係一比一。

去到比賽最後大概兩三分鐘左右，發生咗一件大事。

申屠突然訓低，原來佢賣老抽。睇嚟呢場比賽嘅體力消耗都好大。

「喂，你掂唔掂。」

佢似乎痛到連嘢都講唔到。於是，我幫佢拉下筋。

過咗一陣，佢嘅情況好返好多，可以企返起身。





我拍一拍佢膊頭。「大佬，唔好咁快死。冇你，唔好玩。」

不過，佢企就企到起身，但係都係就住就住，令我哋有機可乘。

我照樣放球長波比莫錦佳，佢再出高波。呢個時候，陳天元係禁區外飛奔入去，跳到盡，頂到個波，個波應聲入網！

二比一！無仇報！

我哋忍住唔慶祝住，返去防守。係申屠受傷嘅情況下，黃社冇辦法組織攻勢，再加上我哋嘅浪費時間戰術，戰況再冇改變。

「嗶——」

冠軍！





我哋攬住天元慶祝。

「屌你老味！你條仆街平日唔入波，一入就冠軍！」

真不愧為大賽球員。

申屠再一次訓咗落地。我估佢頭先都係死頂。

莉曦即刻去睇下申屠。「你見點呀？」

「申屠子成，唔好死頂啦，我抬你返去。」

「唔使啦康洛文，我行得郁。」

「你行埋今日，聽日如果隻腳廢咗，唔關我事架。」

最後，我同莉曦扶住申屠，送佢返屋企。

我估成班友仔應該去咗新墟打邊爐慶祝，不過算，我至少將一個情敵，變成一個朋友。