那年玩社，四位靚女: 十

之前英文吳sir叫我幫下其他同學手做功課，呢個計劃意外地獲得咗好多老師嘅支持，我都吹佢哋唔漲，唯有幫下手。

而家完咗社足，係時候要履行我嘅責任。

「喂，咁多位快手啲，早啲收工返歸！」

今日要交50條數，成班男人數底勁，唔使我教，好快搞掂。但係女仔除咗嘉瑜之外，其他都搞唔到，連角度都唔識計。

「...因為係三角形，所以姐係180度再減63度，咁等於117度，B囉。」





雖然我已經逐步逐步咁同佢哋解釋，但係我唔知佢哋聽得明幾多成。

尤其Yvonne，我覺得佢應該連F3數都唔識做。

「Yvonne 姐呀，你當畀面我，做返一兩題好冇？」

「我冇你個嘉瑜bb啲數咁好吖嘛！」

係呢，點解我個嘉瑜啲數咁好，可以快手快腳做完再抌低我？





「唉...好啦，今晚M記，我同莫嘉瑜試下幫你搞搞佢。你咁玩法，你 DSE 2咗個數就好難入大學。」

聽到入大學，Yvonne就好緊張，二話不說就應承我去補數。佢仲搵埋佢個好姊妹郭玲玉嚟，搞到我變咗補習天王。

我call咗嘉瑜十幾次都冇人聽，睇怕佢又去咗瞓覺。

「咪瞓呀豬」

咁代表咗，我要一個人對住兩條煩膠，教佢哋做數。





好痛苦。

點都好，呢鋪我康洛文就小試牛刀。如果呢兩條友啲數咁屎，我都搞得掂，咁我仲唔係補習界明日之星？

我攞住係以前學校做落啲數，拎比Yvonne同郭玲玉做下。

「哇！咩黎架！」Yvonne睇到啲數，驚到嗌咗出聲。

「吓，基本sin cos tan嚟炸喎。我仲有啲難少少嘅數比你哋做，但係都知你搞唔掂，遲啲先啦。」

「邊個話我搞唔掂！我張依韻就要至少攞返個4，點都要入大學！」好有鬥志，幾好。

數學攞4，講就容易，我做都容易，但係對於初中數學堂瞓咗一半嘅張依韻嚟講，係一個艱鉅嘅任務。

於是，我就幫佢哋補數，補足四個鐘，教數熟到教到我覺得我應該兩粒星無難度。但係，Yvonne似乎冇乜進步，甚至係佢隔離嘅郭玲玉都開始做到幾題果陣，佢都仲未有基礎嘅概念。





「算啦，搵日再搞下，時間仲有嘅。」

嗰晚，郭玲玉send咗whatsapp比我。

「hi [laughcry] 我係serena 其實你教數都幾好haha 至少我聽得明 yvonne佢應該係有啲心事 諗緊啲嘢 先會搞咁耐都搞唔掂」

吓？諗緊啲嘢？

「唔好介意我咁八卦 我想知佢諗緊啲咩」

「我都唔係好知 總之佢呢排心情都唔係幾好」

有啲唔係幾好嘅預感。





「咁算啦 你去開解下佢啦[laughcry] 我最關心嘅就係我幾時可以搞掂 唔駛教數姐」

Yvonne姐，唔好煩到我呀。