那年玩社，四位靚女: 十七

我深呼吸一大啖氣，我見到 Serena 望住我，造口型叫我加油。

 頂硬上！ 

「……我地啱啱雙方都係頭先提及過好多論點，咁就不如等我為大家總結一下。」 

「剛才我方同學都提及過，香港嘅運動行業如果可以得到商業化，將會獲得更加高嘅薪酬。」

死啦，我突然唔記得咗自己要講咩，唔通真係奶嘢？





我即刻九秒九睇返份稿，安心好多。

我繼續好順暢咁讀埋份稿。我見到前面評判老師嘅樣，應該都係對我嘅發言好滿意。

「......唔通友方同學會想見到香港運動員就連一份穩定嘅收入都冇？如果冇一個可以維持正常生活嘅薪酬水平，體育訓練機構又收唔到足夠嘅資助，香港運動員又點樣可以係世界運動賽場上面追逐夢想？所以對於今日嘅議題，我方係絕對同意，多謝。」

啱啱好冇超時，我嘅發言就咁樣完結，亦代表今場比賽終於搞掂。

「你啱啱最後個段好有感染力。」Serena似乎都好認同我嘅表現。





「由我把口講出嚟，係應該有說服力啲。」

「不過而家點，睇下評判點睇啦。」

「應該都ok掛？」

「又唔係咁講，今次對面係睇得出佢哋好有準備，尤其是個第一副辯，連稿都唔係幾駛睇。」

「不過我哋有你，郭玲玉喎。」





「咁我都輸過嘅。」

「信我，今次唔會。」

「係信都唔信你。」

「好喇唔好嘈，整間佢話你哋太嘈，扣我哋分就奶嘢架啦。」王知秋果然有智慧。

過咗一陣，兩個評判老師應該已經完成評分，工作人員將張分紙攞去核對。

「而家宣布比賽結果，」

「正方隊伍，紅社，所得分數為164.5分。」

「而反方隊伍，黃社，所得分數為150.5分。」





「換而之，今場比賽，勝出隊伍為紅社。而最佳辯員則為紅社主辯同學郭玲玉。」

順順利利，晉級決賽。

「都話咗你信我就得架啦，而家咪贏咗囉，你又攞埋最佳辯員。」

「你條戇鳩仔又比你符碌過到關個喎。」

「你唔信我就真係戇鳩。」

「呀兩位，膠夠未呀。」

「未呀，知秋姑娘，請你行埋一邊，我哋兩個唔係人咁品。」





「咁你要唔要睇下另外嗰場嘅分數？」

「嘉瑜？」

我即刻行過去隔離班房，嗰度進行緊另外一場初賽。

嘉瑜就坐咗係觀眾席到，最得閒真係佢。

入面嘅氣氛都好嚴肅，應該係仲未公佈分數。

好喇，有動靜喇。

「而家宣布比賽結果，」

「正方隊伍，綠社，所得分數為161分。」





「而反方隊伍，藍社，所得分數為143.5分。」

「換而之，今場比賽，勝出隊伍為綠社。而最佳辯員則為綠社結辯同學吳德言。」

咁姐係話，連嘉瑜都入到決賽。

我即刻走埋去嘉瑜到。「入決賽喎，開心仔。」

「你就開心！大把嘢寫，又唔使瞓！」

「我陪你瞓你會唔會好瞓啲？」

「屌你啦。」