「都唔爭在喇,我呢排咁鬼忙,你得閒幫我抄下notes啦。」

「呀屌你,你洗人洗到咁盡嘅?」

「幫下我手啦,唔該。」

「唉好啦好啦,見你都叫做幫過我手,算啦。」

「多謝Yvonne姐!」



就係咁,我就可以係中史堂到瞓覺。

仲有一日就係社辯第一場比賽,雖然話我哋執稿已經執咗好幾個禮拜,但係我哋難免有少少緊張,郭玲玉都唔例外。

「同我再check多次。康洛文,幫我睇下,如果有任何point你覺得有機會俾人駁嘅話,即刻同我講,諗埋應對嘅稿。」

呢個時候,又係佢嘅領導能力,令到我哋好放心。

應該冇死啦呱?



「比賽同學,唔該去到301室集合。」

「你緊唔緊張呀?」我似乎好鍾意問人呢個問題。

「傻啦,我驚你緊張過我呀。」

「挑,郭玲玉,有你係度,我點會驚姐?」

「嘉瑜嬲啦。」



「頂。」

講就咁講,我一入到比賽嘅課室,我即刻攞咗支水,係咁飲,一飲飲咗半支。

係咁意講咗啲比賽規則之後,比賽正式開始。

應該係我太專注係份稿到,我一直都冇留意對面黃社有咩人喺度,後來睇番,都冇一個人識。

「......我哋雙方今日嘅辯題係香港運動行業應該商業化,而我方係絕對同意呢個講法。首先......」如果我可以講到好似做主辯嘅 Serena 咁有自信就好。

康洛文,你得嘅!

雙方都講左幾輪,而家到王知秋上場。

「......剛才友方同學曾經提及過商業廣告係香港嘅市場成效唔大,呢一個範疇,我方認為係值得商榷。正如我方同學頭先提到......」



王知秋同我一樣,都係有少少淆。

「喂,你好似講漏咗個point。」

「我知,但係唔夠時間。」

「得啦,我幫你睇下我講唔講到。」

「康洛文,唔好講!你講你自己嘅總結就夠。」係 Serena。

「但係唔講,我哋會少啲分...」

「你講咗,俾人扣得仲犀利!」



好啦,我聽你講。

「而家有請主方結辯同學發言。」

「唔好淆!淆我就笑鳩你!」

為咗唔好比 Serena 笑鳩,加油!
已有 0 人追稿