「喇!講明先,我本身就唔補中四嘅,不過見你咁想補,我冇理由阻你學習嘅,係咪?所以,你就着數喇,你將會可以享受免費 LM Hong & his elite team 單對單試堂一星期,有中文才女同英文星級導師幫你補。滿意嘅,可以再落訂,即係請我食飯!」

「咁正?咁我就試一個禮拜堂喇喎!」倩怡笑到見牙唔見眼。

於是,我嗰陣除咗放學用個幾鐘時間,幫自己同一大班友仔溫書之外,夜晚六至八,就喺M記,或者去嘉瑜屋企,三對一同倩怡補下數同通識,倩怡同嘉瑜一樣,都有修Bio,嘉瑜就順便同佢補埋。有陣時係M記,我地三個幫倩怡補到興起嗰陣,會有其他學校嘅人坐係隔離到聽,仲試過有mk係咁裝 Serena 對長腿,比我怒啤咗五分鐘;有毒撚見我同女女補習,對我做出妒忌嘅表情,對此我就唔知點做好。

冇幾耐,倩怡已經對我地嘅服務好滿意,好快已經請我地食飯。

不過,有一日,好似係星期五,當我地呢個 elite team 又出動幫倩怡補習嘅時候,比我撞到個老朋友。



「喂文仔!咁多女仔嘅?」

M記玻璃窗出面傳嚟熟悉嘅聲音,坐喺窗口位嘅我即刻擰轉頭望出去。

「麥sir?」

冇錯,就係我喺XBS嗰陣嘅訓導,麥sir。

麥sir 可以話係重新定義咗我對訓導嘅形象。喺成間XBS入面,佢應該係唯一一個由始至終都保我,或者叫支持我嘅老師。可能係佢做咗我一年班主任,知道我成就究竟可以去到邊,所以先至咁撐我。



但係冇計,嗰次我比人屈得幾嚴重,再加上本身我個底都係花,佢想保我都冇用,佢只能夠跟規矩做嘢。

不過都好,逃離呢間所謂名校,好過冇。

同三個女仔介紹咗麥sir 之後,我就諗住同麥sir 敍吓舊。

「係喎,點解老麥你會喺度?」

「哦,我有個朋友今日請我去呢度對面間酒樓飲吓茶。你知我㗎喇,唔係太熟屯門,咪早啲入嚟囉,估唔到比我撞到你。」麥sir 著住一套好普通嘅 polo 衫,似乎嗰日嘅聚會都係敍舊性質居多。



「自從我退咗學之後,我都係第一次見你,之前話咩要同你出嚟食吓嘢,都冇咗件事。」

「做咩事咁忙呀,掛住追女仔?」

「女朋友已經有喇,嗰邊綠色風嬲嗰個。今日只不過係幫吓女同學補習咁解姐。」

「犀利喎,睇嚟你嚟咗涼糖清夷之後,做咗山寨王,反而修心養性喎!」

「你嗰句山寨王算點先?」我笑笑口咁,飲咗手上面嗰杯咖啡。

「唔係咩?你班同學以前嗰間學校,都只不過係 band 2尾,band 3頭㗎咋。以你係XBS四年嚟嘅水準,你隨時下年就係準狀元,做狀元都唔算好難,勤力少少就得㗎喇。你而家係一間 band 3 地區學校,真係甘心咩?」

的確,我一直冇諗過呢個問題。我其實一直當呢間新學校係我嘅休息站,其實我有冇諗自己嘅未來?
已有 0 人追稿