學期過咗一半,我發覺我自己已經好適應呢間新學校嘅生活。上堂好玩,老師又nice,社活動精彩,連功課壓力都唔算大,sba 都輕鬆 ko,仲有時間幫下 Yvonne 補習。

點解我唔早啲嚟呢到讀?咁就唔使嘥四年時間係嗰啲名校到,自己又唔係有咩得著。

講返補習嗰度,幫 Yvonne 補下補下,唔知係咪我嘅威力,佢 econ 同中史 quiz 成績似乎又真係有進步,甚至連中史呀 sir 都要係堂上面公開表揚佢。

「今次呢,最高分一定係文仔架啦,不過,我見依韻嘅成績都好有進步,值得我哋去讚下。」

「喂,Yvonne 姐,話就話唔收你錢姐,請食飯都好應該掛?」



「得啦得啦知你勁,單車都比你變左做摩托喇。不過話時話吖,你啲溫書方法咁有用,point 又準,你唔喺度讀書,都可以去燈塔嗰度做補習名師喎。」

「去燈塔做好似幾好,到時 LM Hong & his elite team 實有你份嘅!」

「屌,又自high。」

「咁你而家入唔入我個 elite team 先?見你之前幫我抄咗咁多份 notes,就送個優惠比你,補全科又點話。」

「你補我全科?好似幾正咁喎!等我叫埋 Serena 一齊報!」



「得!俾埋個新生優惠,買一送一!你哋今次坐五望星不是夢!」

就係咁,LM Hong & his elite team 真係正式成立。係5B班房,我開始開班授課。由最初一對二,去到過咗兩個禮拜之後嘅十幾人,全部係嚟補我呢個名師嘅,甚至有隔離班嘅人走埋過嚟。我仲有下面一班 elite members-即係嘉瑜(中文才女)同郭玲玉(英文星級導師),幫埋手做收生程序,政學生證,派 coupon...

所以,個陣時大考之前,我其實係幫緊差唔多廿個人溫書。

「各位,知道隔離班 maths 聽日 quiz,如果大家 pass 到嘅話,記得影番份卷上 whatsapp group 到,我哋會有專人通知你嚟同我影返張相架啦!」

「好呀!」隔離班有條友仔真係做咗我嘅信徒,冇記錯嘅話佢好似叫做列凱程。



呢個時候,有個女仔係出面,一直望住我哋。

「喂!喂叫你呀!」

我拍埋手掌叫住佢,佢先有反應。

「你係咪想嚟補下呀?」

「唔係...係,係呀!我係嚟補習架!」

我即刻叫佢入嚟搵個位坐低。

「你叫咩名?讀邊班?我真係唔係太熟你哋。」

「我...我叫咗做石倩怡,係...係4A班!中四收唔收架?」



「中四?我哋呢度專補中五嗰喎!」

少女臉上稍有失望。

「不過見你咁有誠意,等我諗下可以點樣搞你個特別案例。」

「真係嘅?聽講你以前係XBS到讀,好犀利嗰喎!」

「係呀係呀就嚟全校都知。」
已有 0 人追稿