那年玩社，四位靚女: 二十七

打開屋企嘅鞋櫃，攞返呢對成年都冇乜著過嘅波鞋。

我記得，記得我點樣著住呢對鞋，一嘢射破董之英嘅大門，幫學校贏到精英賽冠軍。

雖然獎牌真係屋企嘅櫃都，不過，往事始終要拋低。因為，我要展開人生嘅新一頁。

我覺得，我正式唔當呢間中學，係我嘅休息點；佢係我重新出發嘅地方。

為咗更快重拾狀態，我係比賽之前三個鐘，已經係運動場隔離跑圈。





見住成班隊友慢慢帶住我哋嘅同學嚟到，我感覺到我嘅鬥志，正係我嘅心裏面燃燒。

「喂，球王！」係 Yvonne，佢拉埋成班姊妹，一齊嚟支持我哋。「你今場一定要贏到喎，你贏唔到唔好返嚟！」

「通常你咁講呢，我哋就會輸架啦，我哋盡力啦。」

「屌你啦。」

換返上一身裝備，我哋全隊步出球場。





「今次呢場波，對手雖然有實力，但係我哋只要盡全力，要贏唔係好難。大家落到場，盡全力好唔好？」

呢句，係我嘅肺腑之言。

「好！！！」

今場，紅社三人組－陳天元，莫錦佳同黃展賢打三箭頭。申屠，我同綠社嘅譚兆倫打中場中。

係吳 sir 嘅戰術底下，我係打一個比較墮後嘅位置，暫時負責做多啲防守，因為防守係我哋較弱嘅一環。





一開波，我哋就開始撳住攻，以兩翼嘅速度，加上申屠同譚兆倫嘅後上射門能力，仲有看台上面有成三十條友仔為我哋吶喊助威，已經做成對面龍門好大威脅，基本上唔需要我上前幫手進攻，我可以專心防守。

果然，我哋強橫嘅攻擊力，終於令我哋好快取得優勢。申屠禁區外插兩下花，好似撚狗咁撚，再放直線比黃展賢，黃展賢不負所託，直情扭過埋龍門再射入！

但係，正如蘇格蘭足球天才莫耶斯所講，「領先一球永遠是最危險的」。我哋唔知攻好定守好，仲比對面搶到幾次機會，好彩有白文翰保住後方。

似乎，我嘅機會嚟啦。

「倫哥，你墮後，我上前。」

「食粥食飯睇你啦。」

上返上進攻中場嘅位置，我可以盡情釋放我嘅能力。攞到波之後，我即刻彈俾陳天元。而佢都好識做，同我做個 one two，咁就過咗兩個守衛。

跟住，就係我招牌重炮射球出場嘅時候啦。





攞好角度，一射，網都穿！

「二比零！！」

入咗第二粒，我哋就安心好多啦。鍾意可以壓上少少，見唔對路可以縮後守，對面冇我哋符。

就係咁，上半場帶住兩球優勢，下半場我再入一粒，再加上申屠一扭三嘅入波，同埋白文翰一球神救，我哋十六強戰以四比零勝出。

努力真係冇白費，我向我嘅目標，踏出咗第一步。

比賽完咗之後，我哋全隊同其他未走嘅同學一齊去附近大牌檔食嘢。

「喂呢，你頭先嗰球砲彈式射球，又真係幾犀利喎。以為你上次社足符籙入姐，今次又入多次！」Yvonne 仲係度回味緊我嘅入球。





「梗係啦，你估我學界MVP個名托架？」

「其實，點解你係XBS撈得咁掂，點解你要嚟呢度讀？」Serena 好奇一問。

「邊有撈得掂呀。」講到呢度，我就好感慨。

「嘩，似乎有啲名校內幕消息喎。」

「申屠，唔好睇得多 facebook 個名校 secret，就當自己好熟名校先得架。如果你想知嘅話，我講下都冇妨嘅。」