那年玩社，四位靚女: 二十八

係申屠嘅不斷追問下，我終於係個一晚，同我所有嘅同學解釋一次，點解我會離開，應該話係俾人係XBS踢走，跟住去到涼糖清夷呢間 band 3 學校讀書嘅原因。

我由我 F1 開始講起，話說我果陣，啱啱入到去呢間名校，心諗自己小學成績咁好，入到嚟應該冇太大問題，可以跟得到掛。

結果，又真係跟得到。除咗第一次考試唔係咁熟個考試玩法，考好似唔知第五定第六之外，F1去到F4所有考試都係頭三。

係F1嗰年，因為我成績都叫做出眾，而且我本身間小學實力麻麻，所以老師見我出身咁特別，所以都好留意我。其中一個，就係老麥，亦即係我F1嘅班主任。

名校成績頭三名，又踢到下波，照咁睇，應該係天之驕子掛？





今次，我就冇咁好彩喇。

係呢間學校裏面，大部分嘅人似乎有一種排外嘅意識。呢班人大部分都係喺直屬小學嗰度升上嚟，唔知直屬小學係咪佢哋作為藍血人嘅象徵。佢哋似乎覺得，要係呢間學校到讀，一定要血統純正，出身正統。雖然，呢班人平時會分做唔同嘅小圈子，但係如果有其他人企圖破壞呢個系統，就會突然「團結」起嚟，攜手鬥垮呢個敵人，就算呢個敵人本身冇任何敵意，甚至想釋出善意。

我記得係我第二次考試考到第一，而且係足球隊有立足之地之後，開始有人想同我打好關係。冇記錯嘅話，最開頭係一個女仔嚟，名唔重要，嗰條友仔我直接叫佢做「八婆」就算喇，因為佢真係一個八婆樣，講嘢八婆聲，睇埋晒啲八婆嘢。

個陣調位，老麥安排佢坐我隔離，我呢一世人應該會最恨佢呢個決定，因為呢條八婆開始咗我三年半嘅惡夢。

換完位之後第一堂，八婆已經開始撩我講嘢：「喂文仔呀，我想問你之前考試係點溫書架？」





「我冇乜溫書方法嗰喎。同埋，唔好叫我文仔，叫返我全名就得架啦。」

跟住，我就聽到佢用超能力，係好細聲，但係我又可以聽得到嘅聲線講咗一句：「屌，懶係勁。」

我果陣時對佢哋嘅所作所為其實冇咩反應。我仲係覺得，係呢間學校，只要我不犯人，人就會不犯我，大家好好地讀埋書，日後好相見。

點知，事實將我呢個小小嘅幻想擊沉，將我同我嘅天真打落萬劫不復嘅深淵，再冇翻身之力。

過咗一個禮拜之後，八婆繼續想盡辦法撩我傾計。雖然我知道佢已經開始好唔耐煩，但係我依然冇乜點理佢。





果然，最後一次嘗試都失敗之後，佢終於開始發爛渣：「呀康生，你係咪咁串呀！我哋想認識下你姐，你洗唔洗咁囂張呀？」

「如果你覺得我咁樣係囂張嘅話，咁不如你返去自己諗下自己發生咗咩問題。」

「你！」八婆比我激到冇嘢好講，唯有 call 埋佢班 frd 過嚟，圍住我張枱。如果唔係老麥早咗入嚟課室備課，我估我應該比書扑頭。

之後，老麥同我講咗兩句，真係兩句，內容都係叫我注意下人際關係。跟住去到 F3 嗰年，我哋先有多啲接觸。

八婆努力未果，比老麥調走咗。但係之後，換嚟嘅都唔係咩善男信女。

「hi，我叫麥...」

「我知，考第二嗰個麥思宏丫嘛。聽講你數學好勁個喎，你可唔可以教下我？」想當年，我嘅數都仲係麻麻。

「好呀，咁你教返我英文轉頭？」





講真，我到而家都覺得呢個人好 nice，不過佢嘅一刻足以破壞我對佢嘅遐想。

 
最近首飲歌：
https://www.youtube.com/watch?v=_mDxcDjg9P4