那年玩社，四位靚女: 三十

自此之後，呢個班長就接受咗老麥嘅任務，開始乜都幫我手。小至借筆，大至趕走嚟串鳩我嘅蝦兵蟹將。個陣時，如果唔係佢成日幫我擋住個班人，我估我應該差唔多去自殺。

但係，呢個麥思宏，從來都唔係一個好人。

應該話，佢只不過係一班仆街裏面，冇咁仆街嘅人。

「康洛文呀，你等我一陣，我去搵麥 sir 攞啲嘢先，整間再教你數。」佢一支箭咁行出去。

等咗一陣，我突然覺得有啲急，所以行咗出去班房，諗住去廁所解決。





點知，比我見到麥思宏，同另外一班人一齊。兩邊似係傾緊一啲嘢，而另一班人之中，有八婆。

「班長，你嗰邊搞成點？」

「咪都係咁。不過，你真係覺得咁樣係好？」

「你唔好唔記得佢係邊度嚟至得架！佢喎！」

麥思宏好激氣：「我梗係記得啦！但係，你唔知咩叫反作用力咩？你施加壓力越大，你受返嘅力只會更大。我地玩太大，最後唔會係好事。玩夠就收啦，好冇？」





「講到尾，你都只不過係唔想賴屎上身姐！你唔想玩落去就出聲啦！」

八婆拉埋佢班朋黨離開現場。而我終於知道，其實麥思宏都係呢班藍血貴族嘅一員。

但係我唔怪佢。至少佢係呢個已經接近失控嘅情況底下，嘗試維持自己嘅地位之餘，亦都保持人類應有嘅理智。

而佢都做得好成功，令我有一刻相信過佢，相信呢個問題會可以解決到。

麥思宏並唔知道我聽到佢地之間嘅對話，而我亦都冇同佢講。佢照樣幫我，我照單全收。咁唔代表我認同佢嘅行為，只不過我唔想佢難做姐。





自此之後，我任何人都唔信。只有自己先可以保護到自己，要幫助嘅，就搵運氣。

嗰班契弟一嚟，我冇再捱打，而係自衞反擊。佢玩我書包，我直接摷佢春袋，就係咁簡單。

去到 form 2，佢地終於唔夠打，停止對我嘅戰爭。我似乎獲得勝利，但係兩年以嚟嘅慘烈戰爭已經令我臭名遠播。我獲唔到應有嘅尊重，只有追求暴力。去到當日我比人踢人出校嗰日，現實先再一次整醒我。

「就係咁。」

申屠即刻拍一拍我膊頭：「你真係堅勁。比着我都未必有咁嘅膽量。」

Yvonne 甚至聽到眼濕濕：「康洛文，估唔到你受過咁嘅經歷。」

「而家都冇嘢啦。喺呢到，我似乎搵得返我嘅地位。」

「冇錯，你幫咗我地好多。」陳天元難得正經。「你又幫我地補習，又捱義氣，而且唔會囂張。」





「唔好咁講，係你地改變咗我。你地令到我搵到人生嘅意義。如果我冇嚟到呢間學校，我估我仲係喺街邊同人開緊片，等比人打死。」

「咁講嘅話，文哥你要請我地食飯啦！」

「屌你啦申屠。咁講嘅話，今日我嗰球入波，你全隊都要請我食飯啦！」

（鍾意嘅，記得追稿！）