那年玩社，四位靚女: 三十一

（一路走來，並不容易。如果呢一刻嘅你仲有睇緊呢個故嘅話，我 Jenmen 衷心感謝你。）

坦誠相對，先至係朋友相處之道。呢班友仔似乎感覺到，我真真正正當咗佢哋係朋友，之後都各自講咗自己嘅故事出嚟。

當中最好笑，令我記到而家嘅，一定係申屠點樣追到陳莉曦。

「我呢，其實份人就比較怕醜嘅。」申屠笑笑口咁講。

「你份人怕醜，怕條撚咩！你怕醜嘅話，我咪係梁振英？」





「你咪唔好信囉洛文哥。至少我去到F3之前，我份人面皮都仲係厚。我追呀曦個陣，都好撚驚。」

話說當年F2，當呢班友仔仲係喺另一間學校嘅時候。陳莉曦第一次同申屠。當年真係小毒撚嘅申屠對呢個跌入凡間嘅天使（根據佢自己嘅描述）一見鍾情，心諗一定要追呢個女仔。

但係，啱先先講完佢係毒撚嚟架嘛，咁佢係點樣最後成功追到女神呢？

「喇，就好簡單嘅：」

首先，因為佢同陳天元都一齊入咗足球隊。申屠冇嘢叻，最叻就係帶住個波，一扭十。咁啱，第一次訓練，莉曦嚟咗諗住睇佢呀哥表演下；又咁啱，申屠同陳天元係分咗練習打對頭。於是，係佢嘅女神面前，申屠示範點樣係二十分鐘之內，連續扭過同一條友差唔多十幾次。





「之後，我請咗 Sky 哥食幾餐飯。但係呢幾餐飯都抵，換嚟嘅係曦姐開始留意到有一條毒撚，叫做申屠子成。」

「嘩，咁你個戀愛故事都幾勵志下喎。相比嚟講，我嗰個真係好簡單，自己送上門。」

「得喇，知你勁啦。」

傾下傾下，嗰晚大家食完飯，仲直落去市中心 Oldway 唱K。

酒肉朋友，係你最成功嘅時候，手指連腳趾都數唔晒；知心好友，係你落難嘅時候，十個都未必有一個。好慶幸，呢班俾人睇死嘅 band 3 仔女，冇睇死自己，仲對一個外來人咁友善。





嗰啲自稱係未來精英，社會棟樑嘅人，其實係幾咁扭曲人性。以自己嘅利益為先，見到有任何會損害到佢哋利益或者地位嘅嘢，無論對方有幾咁無辜都好，佢哋都會用最強嘅力量，將對方擊潰。我真係唔明，反而係社會差唔多最底層嘅呢班「差」學生，雖然有好多嘢唔到佢哋決定，但係仗義多為屠狗輩，呢班人反而先係最有良心，最有義氣嘅人。畢竟，佢哋已經冇利益可以失去，計較亦無用。

但係，係呢個社會裡裏面，似乎只有計較得失，先能夠成功，做到成功人士。

我已經分唔清之間嘅因果關係。

無論如何，我身為兩個世界都身處過嘅人，我始終覺得，我有責任同佢哋，做一啲人哋認為佢做唔到嘅嘢。

為咗自己也好，為咗嘉瑜也好，為咗紅社也好，為咗足球隊也好，呢個已經成為咗我嘅目標。