第一日大考,相信所有人嘅心情都係緊張,成個禮堂就充滿住不安嘅氣氛。

呢個時候,有一個神情從容嘅𡃁仔,聽著音樂,走入禮堂。

冇錯,嗰個咁摟打嘅𡃁仔,就係我。

「屌,第一日考中文,輕鬆啦!」

「𡃁仔,咁撚臭串?」申屠仲攞住本書,氣起勢咁樣刨。



「梗係!我康洛文嚟個喎!」

果然,收到份試卷之後,望住試卷上面嘅題目,我用返嘉瑜教我嘅方法去拆解題目,的確係對我理解成篇文章有好大作用。

「輕鬆啦。」

漫長嘅中文卷考完之後,我哋決定出嚟食嘢。

「頭先份卷,其實唔難。」



嘉瑜和應我嘅講法。「我都係咁話。」

「我跟咗你之前教我嘅做法,的確成分卷易明咗。」

「哈哈,都話咗中文係我強項架啦!」嘉瑜再一次笑到見牙唔見眼。

「不過,過咗今日之後,就係我嘅天下喇!」

「屌你返去真係唔撚洗溫書個喎。」Yvonne 啱啱好食完碗麵,即係連珠爆發。



「呢啲你哋恨唔到架啦。」

「家下名校仔好叻咩?」

「Yvonne 姐呀,我冇讀名校好耐架啦,同埋我真係唔想再同嗰班人再有任何關係。」

Yvonne 似乎知道自己講錯嘢:「對唔住,我唔係有心嘅。」

我即刻緩解返個氣氛:「唔緊要,唔好介懷。」

我哋食完嘢之後,再一次上去嘉瑜屋企溫書,不過今次嘅名師,就唔係嘉瑜,而係我。

「好喇,聽日我哋考嘅就係數學。我之前吹水都有講過,我 form 1 個陣數學其實麻麻地,不過之後我搵到方法去改善,就係操。如果你唔係天才,一望就識條題目嘅話,咁樣你唯一可以做嘅就係不停操數。」

「咁呀康sir,今日我哋係咪做好多份past paper?」



「係呀申屠同學,但係我哋唔係計時做,因為我發現大家好多連基本嘅 concept 都仲未打好,莫講話係高分喇。咁樣嘅話,倒不如我攞份 past paper 出嚟,俾少少時間你哋做,然後我逐題解俾你哋聽。」

我發現我真係好鍾意做數,尤其當我成功解決到一條數嘅時候,個種成功感係好特別,冇辦法被取替。

「嗱,我估你哋都唔撚記得咩嘢係 log 架啦,我而家同你解返。」

我望一望嘉瑜份試卷。

「咦?莫小姐,你啲數進步咗喎!估唔到你連呢題都識做。」

「梗係!有你呢個名師指導呀嘛!」

「真係識講嘢姐豬。」



「嘩,唔好係我哋面前放閃呀。」Yvonne 頂唔順了。
已有 0 人追稿