話咁快,又去到大考。佢哋成班溫足通宵,但係我可以照樣十二點前瞓,最多都係溫多一陣,去到十二點半。

第一日考嘅係中文,亦都係我唯一一科都唔係幾幫到佢哋手嘅科目,畢竟自己都唔係中文好勁,可能隨時差過嘉瑜。

冇計,既然自己都唔係好掂,咪唯有同大家一齊溫書。

「嗱,今次我自己都未必搞得掂㗎,唔好話幫你哋喇。我哋倒不如去補 yy 算。」

「吓,我覺得 yy 講啲嘢好廢咋喎。」





「咁呀莫嘉瑜小姐,唔通你有乜嘢神奇嘅惡補中文方法?過兩招嚟好喎!」

「妖,簡單啦。下個禮拜考中文呀嘛,你哋日日嚟我屋企,我有少少中文心得分享下比你哋,到時你哋中文實有進步。」

其他人對嘉瑜講嘅嘢半信半疑,但係橫掂我中文本身個分都唔差,補 yy 都只不過想睇下會唔會有進步,咁倒不如唔好俾錢燈塔學校賺,攞啲時間幫襯下嘉瑜。

我問申屠:「喂,佢啲嘢,信唔信得過㗎?」

「其他嘢我唔夠膽擔保,你都知架喇。但係,中文呢樣嘢,我覺得應該冇乜問題。」





第二日,我,Serena,申屠同埋另外三四個人,就去咗嘉瑜屋企,睇下佢究竟有啲咩神奇嘅方法,可以起死回生。

「嗱!其實呢,個方法真係好簡單嘅姐。」佢指住擺係佢枱上面嘅一大疊試卷。「每人攞一份先。」

「除咗康洛文之外,我估大家仲記得邊個係何志敏架喇?」

其他人聽到呢個名之後,都忍唔住笑咗出聲。

我問:「佢係邊個?」





「佢係我哋以前間中學嘅中文科主任,冇跟埋過嚟教。我哋 form 3 個年,佢教我哋中文,但係成日上堂就係到講笑話,大部分人都覺得佢好廢。」

「咁佢真係廢呀嘛!」申屠一出,全場爆笑。

「咁佢又唔係真係咁廢嘅。」嘉瑜係櫃桶裏面攞出一本筆記簿。「我個陣中文考得幾好,以 band 3 嚟講成績好好,所以佢話幫我額外補下習,仲教咗我好多幾實用嘅技巧。」

我哋每人攞咗一份 past paper,嘉瑜就開始講佢本筆記簿上面寫低嘅技巧。

「見唔見到條作文題目?雖然條題目好短,但係可以拆咗做幾個部份。呢幾個部分,我叫佢做取材同主旨。」

我突然醒起,我仲係 XBS 讀緊個陣,都好似有個老師教過類似嘅嘢,但係我個陣都係冇專心聽書,睇嚟而家要再努力少少。

「我講咁多,你哋其實明唔明?」唔經唔覺,原來嘉瑜一講講咗成個幾鐘。

「我其實明嘅。」似乎全場淨係得 Serena 同我一樣明白。





「我 get 唔到。」Yvonne 雙眼流露住近乎絕望嘅眼神。

「其實收到收唔到,真係唔係靠彩數。」嘉瑜全身都充滿住自信。「既然大家都好似唔係好明,咁倒不如我哋一齊溫下其他科。」

結果,本身係中文探索之旅,變咗做溫習團。係之後果幾日,我哋都有共識咁去到嘉瑜屋企到溫書,嗰度似乎變咗做我哋嘅溫習勝地。不過,通常我同嘉瑜係溫完書之後,都會有一啲後續活動。
已有 0 人追稿