那年玩社，四位靚女: 序

校園生活，點解永遠都係咁難忘？ 

係因為温書温到通頂？
係因為同同學上堂訓教、傳紙仔、抄功課、屌老師？
係因為玩學會搞活動識好多新朋友？ 係因為放學後跟埋班死黨去街場打波，挑隔離學校機？ 
係因為恰班低form bb仔好過癮？
係因為狗公新黎既大波miss？ 

對我，康洛文黎講，通通都唔係。
因為我那年玩社，有四位靚女。

諗番起嗰陣時既日子，真係好正。

自我介紹下先，我叫康洛文，嗰年我16歲，讀緊 form 5，啱啱由一間港島名校（唔係做人不要太）​轉去另一間新既學校--屯門涼糖清夷紀念中學。話說當年特首夫人涼糖清夷生cancer瓜左，涼特首同啲富豪為左紀念佢，就起左呢間新學校。

你可能會問：好好地讀緊名校，點解我會係嗰年轉校？

唔怕同你講，我係一條公認嘅麻煩友黎。即使我成績有幾咁出眾，考過幾多次第一，過過幾多次九成都好，我既操行從來冇突破過丙。日日放左學就係同隔離學校啲學生口角，繼以動武。年年都比人記缺點、記小過，最後記大過。好彩我成績係校內係數一數二，先未比人踢出校。但係嗰年，某一日放學之後，我如常咁同隔離學校啲學生打交。不過今日有啲唔同，就係班友仔call馬，我嘅對手唔再係一兩個人，而係七個。

七個，鬥一個。

十四隻手，鬥兩隻。
德國，鬥巴西。

仆你個街點打呀！

當我正想走既時候，先發現我已經無路可退，因為七個人已經將我圍住。

無計，要頂硬上。

我一拳打落其中一個學生塊面度，突然佢跌左落地，仲不斷大嗌隻腳好痛。李華度黎既喂！

依個時候，佢班 friend 即刻指住我，仲話我打傷左佢，要打999 call 猶太人。

「喂你唔好屈得就屈喎！我打佢塊面，佢話隻腳好痛？冇野呀化？」

「總之你宜家就係打傷我地個 friend！」

擾攘左一陣，猶太人黎左，帶曬我地番差館錄口供。所有野搞掂曬，猶太人叫我地走，遲啲再搵我地。

第二日我照常番學，訓導兼我既老朋友麥sir叫我去自修室。

其實我都估到咩事，但係循例都要問一問：「阿麥sir，咩事。」

「文仔，琴晚訓導組開左個特別會議，關於琴日你同史佛恆班人打交件事。本身我都想保你，但係事態嚴重，連校長都介入。所以全體老師一致通過，記多你一個大過，宜家冇quota剩，你要走。」





我知我隨時有一日會比人踢出校​，所以我一早有曬心理準備，但係聽到依個消息，我都係有少少 sad。

「麥sir，點都好，多謝你……」

「哇，好彩得我地兩個咋，男人老狗比人睇到自己喊，好瘀架。」

「其實宜家科技咁發達，你想揾我聚舊既話，咪打個電話比我，或者 send 個 whatsapp 比我囉。我反而擔心有冇學校收你，話曬你個底咁花，唔係間間學校都肯收你架……」

個日開始，我就開始揾學校。但係真係比麥sir講中左，間間學校見到我咁難搞，都即刻拎頭 say no。搵多兩搵，我都有啲灰心，準備可能出黎做野，又或者去外國讀書。

不過，皇天不負有心人，一間學校竟然肯收我。

「咩話？涼糖清夷中學？」

聽都未聽過，係火星㗎？

「係呀，係一間新中學黎架。阿仔呀，難得人地肯收你，唔好周圍搞事啦。」

「得啦得啦。」呀媽係就係煩左啲，但係佢講得冇錯，機會真係好難得。於是我決定唔再打交，真係認真讀書。

就係咁，我嘅人生有咗一個大改變。