20XX年9月1日,

一個我呢一世都唔會忘記嘅日子。

我個陣時住係元朗村屋,所以番位於屯門嘅涼糖清夷中學唔算好遠。以前我嫲嫲住屯門兆麟苑,我細個周不時都會入屯門搵佢,所以我對屯門都叫做熟悉。至少,我識搭輕鐵。

我6點鐘起身,着起白色恤衫、灰色長褲,一套整齊嘅校服。

講起校服,涼糖清夷嘅校服普通到冇得再普通,而女仔嘅校服就係一條白色長裙,加條帶,完。



搞掂曬所有野之後,我6點50分出門口,7點鐘上輕鐵,展開番學嘅旅程。

車門一開,差唔多一百人湧上本身已經好狹窄嘅輕鐵車廂,令到車廂猶如密閉空間,連我坐係到都差啲抖唔到氣。

一個身穿白色長裙,扎住條馬尾嘅女仔跌跌撞撞咁入左車廂,泛紅嘅臉頰令佢係人羣中更加突出。最令人驚喜嘅係,佢冇玩手機,而係温緊書。

點解我會咁注意依個女仔?

(我知,佢係主角呀嗎!)



錯,大錯特錯。雖然佢真係主角,但係其實係因為佢嘅攻擊性武器--oh sorry,係胸前嘅涼糖清夷校章。

少女經過一輪混戰之後,終於搶到我隔離嗰個十分寶貴嘅座位。佢搶到座位個陣時,列車已經駛到何福堂站,距離目的地安定站得番幾個站。

少女一坐低,就問:

「咦?你都係讀涼糖清夷? 」

「係呀。」



「Form 幾?」

「5。」

「吓?你咁生面口既?」

「我係今年喺XBS轉校過黎既,所以你未見過我都好正常。」

「XBS? 啫係嗰間學生好勁,facilities 超先進嘅港島名校?」

「你啱。」

「咁你應該好勁架喎,點解你要轉校過黎?」

「有機會再同你講,我有啲眼瞓.」



「懶係神秘咁。」

「咁你想我講啲咩?講下我係XBS啲嘢?我驚你唔想聽姐。」

「我都冇興趣,我希望你唔好做人太咩姐。」

「哦。」

我注意到佢手上面攞住份厚疊疊嘅中史notes。

「乜你修中史㗎?睇唔出喎。」

「係呀。咁唔知你睇唔睇得出我曾經係中史全級第一?」



「又真係睇唔出喎。」我偷笑咗一下。

「係喎,咁你修咩科?睇你個樣,肯肯定係修physics。」我唔知佢係點樣從我個樣得出我讀physics呢個結論,總之我唔係讀phy。

「比你挑通眼眉,但係都係唔夠我嚟。小弟其實係中史geog加econ嘅。」

「估唔到,你都係中史jj。你掂唔掂㗎?」

「嗱,我全身上下到到都掂,包括我個腦。中史?XBS咁多年嚟無人夠我嚟!」

跟住我地再傾左一陣,原來少女叫做張依韻 Yvonne Cheung,之前讀另一間中學,但係舊年學校比人強制拆卸起豪宅,當時引發過幾大爭議,仲有人係學校示威;但係政府無動於衷,所以最後大家都冇左件事,而 Yvonne 同佢班同學就逼於無奈,要黎呢度讀書。由於成個 form 除左我之外都係由 Yvonne 以前間學校轉過黎讀,所以 Yvonne 知道我讀 form 5 之後先會咁驚訝,我竟然係難得一見嘅新同學。

「dododododo……」輕鐵到達安定站,係時候番學校。但係 Yvonne 話要去買包當早餐,我望一望手錶:

7:45,未遲到。



眨眼間,Yvonne 已經消失係我眼前。

我地之間第一次見面,就此結束。

由輕鐵站行去學校只係需要10分鐘,慢慢行都唔洗驚。

涼糖清夷中學比我嘅感覺就係一座好乾淨既六層高建築物。入面有兩個標準籃球場,附近有一個足球場,仲有一個小花圃。總之就係好新淨。

我望向操場。咦?做咩咁多人係嗰度?

我行埋去睇下,原來係分班結果。其實基於某個特別原因,我已經一早知道自己讀咩班,但係就冇特別睇下其他同學啲名,不過我記得我果班好少人,好似得十幾個人。橫掂仲有時間,不如順便宜家睇下。

5B班
陳莉曦 Chan Li Hei


張依韻 Cheung Yee Wan Yvonne
方幼儀 Fong Yau Yi
郭玲玉 Kwok Serena Ling Yuk
莫嘉瑜 Mok Ka Yu
楊曉琳 Yeung Hiu Lam
白文翰 Bak Man Hon
陳天元 Chan Tin Yuen
陳偉賢 Chan Wai Yin
康洛文 Hong Lok Man
顧顯融 Koo Hin Yung
申屠子成 Shentu Zhicheng
已有 0 人追稿