＜無甜後宮＞唔係呀？二十歲先黎讀番中學！？: 開學日

~咇咇咇~咇咇咇~咇咇咇~咇咇咇~
我慢慢睜開眼晴，望一望個鐘。「仆街！！！第一日番學就遲到！！！」原來已經7點15分！！熄完鬧鐘就立即衝入廁所梳洗。

其實學校係要8點前番到去，而且由屋企番去要步行15分鐘路程。
可能你地會問「仲有成九個字時間番唔到學校？？？」
但我好認真咁同你地講……真係唔得！！！！我係一個好注重儀容既人兼且習慣每日起身都要沖個靚涼，gal少少頭先出到街，至少搞半個鐘……

我叫駱梓軒，大部分朋友都叫我做“軒仔”。個樣都算唔錯，可惜上天係公平，得175高，係依個年代作準算係矮。雖然讀緊中四，但今年已經20歲。係我16歲個年因為無心向學，最後決定結束我中學生涯。退學無耐我就去左一間西餐廳到做，一做就做左4年。係4年入面曾經有誤入歧途過，有花天酒地過，有動地驚天愛戀過，係今年最後堅決轉做part time後重返校園，重拾當年失去既校園生活。

沖完涼，着好校服，噴少少香水，gal好個頭（請原諒我係咁貪靚），用繃帶包好手臂就衝出門口。因為我手臂上面有個紋身，所以要遮住去，如果唔係連學都唔洗番。



9月1日，係眾學生既死期；
學校，係眾學生既地獄；
但對我黎講，係一個新開始，可以重拾當年無珍惜過既生活。

從今日起，我立志要努力讀到中六！