2014年5月21日

星期三終於來到第一次約會!第一次約會約人食早餐,咁奇怪既諗法我諗就算我唔係第一個,都唔太多人會咁做。我地提早出發,喺佢公司附近食,佢九點返工,我九點半,食完早餐半個鐘岩岩返到我公司,非常完美既計劃。

今日見返Miki,感覺一d都唔陌生,同上星期五見到既佢根本一模一樣,不過我留意到佢今日畫左眉。但係佢話俾我聽,原來星期五嗰晚佢都有畫,只係我無留意姐。不過佢依然係行可愛路線,白色上衣,高腰裙,白色小皮鞋,加埋佢個個可愛既面貌,好有青春氣色。令著住裇衫西褲皮鞋既我不禁覺得自己同佢既年紀好似相差好遠。

我地食大排檔,佢之前一直話自己食野食得好慢,今日終於可以親眼目睹依個事實,我要每食一啖之後,放低餐具,等大約三分鐘先再食第二啖,先勉強跟得上佢食野既速度。如果佢去嗰d軍營食飯,我好肯定成枱既野食清哂佢先食緊第二啖飯。

早餐好安全咁食完,大家都無出羞。其實之前一路佢都俾一個信我唔過既感覺我,但食完早餐之後,我覺得佢好似開始信任我,好感都多左。而我就唔洗問啦,雖然佢中唔哂我所要求既完美,但都中左某d既,例如識煮飯,鍾意戶外活動。而佢好似對識煮飯既男人特別有興趣,而我咁鍾意煮野食,搵日要喺佢面前表演一下先。



今日既重點可能唔係放喺個早餐度,而係應該放喺放工嗰度。因為佢竟然放工嗰陣,間接咁要求見我,然後俾我送佢返屋企。依件事係我點都估唔到,果然佢對我既感覺真係越來越多。

今日我地有討論返相識個晚既野,佢話可能因為我個晚好規矩,唔會急住咀佢,所以之後先會覆我message聽我電話。其實我覺得我地真係幾有緣,我地大家都唔中意夜浦既人,但係就會係LKF相識,真係拍戲都覺得唔合乎邏輯啦,但偏偏就係我身上發生。
已有 0 人追稿