愛．限期（真人真事）－續集: <<第十集>>

2014年5月24日 星期六

我識左Miki一個星期啦，依個星期，我重拾自信，講野開始似返五年前，油腔滑調，肉麻到死。Miki男朋友6月18號就會返來香港，即係我同佢仲有25日既相處時間。為左爭取多d既相處時間，我決定唔再安排自己星期六日既活動，等佢一得閒我就同佢出街。

今日我約左佢睇戲。睇緊戲既中途，我隻手開始不安分，申左出泥拖住佢。起初佢有少少掙扎，但依個感覺係半秒內消失。佢笑笑口問我「做乜野姐」...我好意外...佢咁樣問，想我答咩呢？我答佢「抽緊水」...我都知依個答案好on9，但係我諗唔到可以點答啦。唔知道係緊張定係間戲院比較熱，竟然拖左一陣之後我就出手汗。但係已經唔緊要啦，因為之後Miki都已經唔再抗拒我拖住佢。

睇完戲之後先四點鐘，我就帶左佢去一間酒吧飲酒傾計。我同佢傾計真係好開心，真係好開心。好耐好耐冇試過依種感覺。我覺得我地既感情進展得好快。可能因為本身大家都俾大家外表吸引左先，然後再發覺內裡都幾夾，再加上唔洗諗將來，所有野加埋哂造就左今日既關係。而且，自從星期三食完早餐之後，我地每日放工都會見一見面，就算之後佢係返屋企，定約左朋友食飯，我都會陪一陪佢，搭幾個站，或者送佢返屋企。由相識到拖手，只係用左一個星期...雖然真正LKF入面通常都係10分鐘就會由相識到咀，但依個道理係唔可以套用喺我同Miki既關係。

其實我覺得我地真係幾夾，雖然依句說話喺岩岩先識左一個星期既當時人口中講出來好無說服力...但係我又想拖前女朋友落水...可能對比太大啦...身邊既人由樣樣野都無興趣，變成傾乜興趣都岩傾，個感覺真係好好。今晚我地行超級巿場，之後去食雞煲，我地兩個都好鍾意食雞煲。



我發覺，我真係幾鍾意佢。無論原因係咪因為對比大都好。希望25日後我能夠全身而退啦。