2014年6月11日 星期三

腸胃炎到今日都仲未正常返,停左食止疴藥都仲未去到廁所。今日Miki介紹左我飲每朝健康,希望有效啦。已經得返幾日...我同佢都越來越唔捨得對方...之前我仲教緊佢分清楚理性同感性就可以全身而退,但係我今日想咩都唔理,淨係想擁有佢...

我地識左短短一個月...都未夠...但係因為一個星期會見六日,返工放工都係咁見面,令到我地既感情升溫得好快。又可能因為我地兩個都係同一類人,即係回應對方感情既人,所以一旦有左感情,佢回應我,我又回應返佢,佢再回應我,我又回應佢,而依個循環會令感情不斷加深,亦令我地越踩越深...

我今日約左Miki睇戲。我同佢只能夠係黑暗中偷偷摸摸咁親熱,除左我屋企,就只得返戲院。雖然我地睇既係一套喜劇,但都無阻我地深情既吻互相送贈。食飯之前我帶佢去左食龍記雲吞,佢原本都唔太食有蝦既雲吞,不過佢都覺得好好味,食得好開心。我好鍾意見到佢笑既樣,真係好甜,見到佢個笑樣,會不自覺咁自己笑埋一份。

我感覺到佢好愛我...不過...佢男朋友仲有幾日就返...我地都必需面對依個事實。我同佢講左我會等佢,喺九月佢男朋友離開香港返去讀書既時候,我地再重續我地之間既愛。而佢會盡量有機會既時候就會搵我,我唔可以主動搵佢。佢話...如果到左九月我都仲等緊佢,佢一定會更愛我,而且比依家多好多!



最後倒數6日...
已有 0 人追稿