[我好正常]我老母單手的咗我入精神病院: 三

　　公司同事M：「吓，我到而家都唔知發生咩事囉。嗰啲係我嘅朋友，唔係咩兵，咩狗公囉。我同朋友聯絡吓我唔覺得有咩問題囉，好正常囉。佢入咗青山？都係好事嚟嘅，佢呢種人留係世上都只係污染環境囉。」 

　　公司同事S：「佢平時唔係咁架，佢平時粗口都冇句架，係嗰日唔知做乜發神經。係大家姐面前又話要吞筆筒又盛，好似畀啲污糟嘢上身咁，但個筆筒咁撚大個，佢緊係吞唔到落肚啦。之後？之後佢辭咗工喇，好似係屋企匿咗幾個月……哦，我知啦，畀人的咗入青山吖嘛。屌，都唔知佢搞咩，我自己其實都覺得好可惜嘅……喂，等等，我真係無返過大陸叫雞架喎！仲有我個名唔係叫撚樣，我叫S......」 

　　公司同事F：「佢搶咗我嗰半件蛋治嚟食嘅時候，我其實真係畀佢嚇咗一跳……不過，點講好呢……應該咁講，又驚又喜啦。我其實暗地裏留意咗佢都幾耐架喇，佢一入嚟公司我就開始留意佢架喇……佢對眼真係電得死人架……嗰日我真係唔係想問佢係咪癡咗線架！不過……你知架啦，我哋呢啲……喂！畀我講埋落去啦……」 

　　上司P：「嗰日佢話要吞個筆筒落肚，又話咩睇吓個筆筒會係邊度出返嚟……唉，我都唔知佢搞咩。而家佢都唔係公司嘅人喇，無咩特別事就唔好再問我佢啲嘢啦，我每秒鐘幾百萬上落，我好忙架。」 

　　中學同學G：「中學嗰陣嘅佢？無咩特別吖，睇落去都算係試試正正嘅，不過最弊就無咩嘢講咁囉！籃球打得幾好囉。吓，咩佢入咗青山咩？唔係啩？咁耐無聯絡佢搞咩嚟呀？」 





　　鄰居C：「哦，佢細細個我睇到佢大架喇。佢細細個嗰陣好乖好孝順父母架，書又讀得唔差喎！佢阿媽好擔心佢架，都唔知佢匿係屋企幾個月做咩，工又唔返，街又唔出……唉，我聽佢阿媽講起都心痛埋一份咯！」 

　　朋友E：「吓？我同佢都半年有多無聯絡架喇喎。乜佢原來入咗青山咁大鑊？佢無同我哋講過嘅……佢份人點？無咩特別，幾NICE，但總係好似無辦法同佢去到好深交咁樣。」 

　　前女友A：「你係佢邊位？我同佢分咗手都好耐喇喎。佢點？渾渾噩噩唔知自己想點咁囉，所以我先至同佢分手。我最憎呢啲毫無人生目標嘅男人，唔通我仲要畀佢繼續拖累落去咩。吓入咗青山？吓……唔通分手真係對佢有咁大打擊？吓……算啦，你唔好再問我喇，我同佢已經無關係架喇……」