[我好正常]我老母單手的咗我入精神病院: 十

 　　當然，此食絕非彼食，我嘅意思只係想吞噬呢條MK妹嘅存在，等佢唔好再問我啲無聊問題：「唉，醫生，不如我哋都係入返正題啦。」 

　　「吓……好呀……咁我哋繼續啦。」 

　　「如果十分係滿分，零分就係最低分，你覺得你而家嘅生活值幾多分？」 

　　「屌，老老實實，點樣畀分呀？數字呢家嘢咁空泛咁概括性，真係可以適切形容到我而家嘅生活係好定唔好咩？對於我嘅生活，你知條春咩？不過算，我要畀嘅話，零分，零分係畀你嘅，醫生。」 

　　「嗯……咁你嘅生活呢？你會畀幾多分？」屌。 





　　「零分。」 

　　「文樂，啱啱我同你媽媽都溝通過，我同佢講，如果我發現同你嘅溝通入面，發現你嘅生活稍微偏離常軌，有可能會建議你入精神病房留院做一個詳細嘅觀察……你媽媽亦都同意咗，不如……」 

　　「屌你條MK妹，講唔掂就想的我入青山？發夢啦你！咩叫生活偏離常軌？常軌係乜？乜撚嘢係常軌？係每日返工放工食飯屙屎，放假得閒就出去睇場戲，係屋企同女朋友扑吓嘢就叫常軌？點解你哋全部人都唔諗吓自己生存係呢個世界上有咩意義？你哋掔大隻屎眼睇清楚，你哋而家過緊係乜嘢狗屎生活？可唔可以？屌，我真係好撚慶，我同你講，我好撚正常，我接受過高等教育，但我都唔明自己點會咁撚ON9聽我老母講嚟睇精神科！你哋成個醫療制度根本就ing sucks，你咪駛旨意的我入青山呀！八婆！」 

　　「你冷靜啲先啦文樂……唔係入青山呀……青山係畀一啲更有需要嘅病人入去療養，你淨係入我哋醫院嘅精神病房架咋……如果日後有需要，先至會轉介你去青山醫院……」 

　　「食屎啦你！入你間濕鳩醫院個精神病房同入青山有咩分別？有咩分別呀我問你呀！你答唔答得出呀？」 





　　條MK妹就緊係畀我問到口啞啞咩都講不出聲啦，但呢個時候，居然畀我見到佢隻手慢慢向住枱面嘅電話不斷移動……

　　「八婆！你想做咩！」我即刻喝撚住佢，搵得電話，唔係班馬吹雞，唔通會係呢個時候打上去新香蕉俱樂部分享心事咩？ 

　　MK妹隻手已經禁住咗部電話，但佢畀我嚇撚咗嚇，已經唔夠膽將個電話拎起，正當我起身諗住衝埋去拎開佢隻手之際，門外似乎有人聽到房入面啱啱嘅吵鬧聲而有所反應。 

　　我一擰轉頭望去後面，度門已經打開咗，探頭入嚟嘅唔係邊個，正正就係我老母：「樂仔！你係度做咩呀！」 

　　今日真係發生咗太多我畀唔到反應嘅事喇……我呆咗一陣，再擰返轉個頭去前面，MK妹已經拎起咗個電話，而且仲講緊：「係呀……你哋快啲啦……」 





　　我腦入面瞬間飄過一絲不安嘅念頭……阿輝，我終於知道當人面臨很危險、生命受威脅嘅絕境時會有咩出於本能最自然嘅第一反應喇……點解當日我食咗你嗰半蛋治你都仲可以咁鎮定咁問我係咪癡撚咗線？不過我以後好可能再無機會親身係你面前問你呢條問題喇…… 

　　此時，老母啱啱正想入嚟間醫生房，但我一個馬步已經衝到門前，仲推埋我老母落地，奪門而出。 

　　屌！條走廊點解好似水蛇春咁長？我跑嘅每一步點解又會好似特別沉重咁？我諗如果要解釋，一定係因為今日，因為呢件事，一定會係我人生中，係神（而家嘅我假設佢確實存在）賜予我咁撚多個苦難之中最撚危急嘅一個，佢會直接影響到我今後嘅未來，我今後嘅去向……我嘅未來，我嘅去向，好可能會係點？好可能會係畀人的入青山！