呢一刻,我望住啱啱把聲好聽到我覺得自己好似中咗化骨綿掌一樣嘅女醫生,佢著住醫生袍簡簡單單一件白色恤衫黑色短裙仔再加對黑絲,的確係好撚誘人。就算波路唔講,但我都夠膽講一句,無論邊個男人望到佢一頭金毛眼細鼻扁唇厚兼而成面粉,都無可能扯得起!雖然我的的確確無花無假就係楊過,但小龍女佢係一定唔會化埋呢啲MK妝架!我望到呆咗,仲係不能夠接受呢個事實,點知個MK妹無啦啦開口話:「做咩眼金金望住我呀?哈哈,未見過靚女醫生咩?」屌,喊出嚟…… 

「我姓陳,你可以叫我做陳醫生。不過好多病人都鍾意叫我個名多啲,所以你都可以叫我做嘉薰醫生。你叫咩名呀?」 

「我姓楊……唔係,我姓佘,佘文樂。」 

「你好呀,文樂。咁啱啱你媽媽呀佘太入嚟都有交代過你呢幾個月嚟嘅情況,咁我大致上都知道你發生過咩事嘅。不過咁,我循例都要幫你做返個調查,睇吓你生活如何呀,健康O唔OK咁啦。如果你明白嘅話,不如我哋開始?」 

「好,可以開始架喇。」





「你係屋企呢幾個月有冇見到或者聽一啲你唔識嘅人同你講嘢呀?」 

「無,如果有嘅話,我諗佢第一句同我講嘅一定係打劫。」 

MK妹雖然面有難色,好似食咗屎咁,不過佢嘅專業操守提醒佢唔可以鬆懈同放棄:「OK……咁你情緒嘅波動會唔會好大?有陣時可能會好開心,成個人好有自信,可能會買好多嘢,又或者有陣時忽然會好唔開心,咩都唔想做?」 

「醫生,咩買好多嘢呀?我老母無同你講我係屋企三個月無出過街咩?」可能我真係無必要用咁嘅態度同佢講嘢,但我不知不覺間因為小龍女而對呢條MK妹有一種強烈嘅反感,佢講啲嘢真係好低B架…… 

「Sorry,我一時之間醒唔起。咁你有冇啲我啱啱講嘅情況發生?」 





「嗯……我有時候諗嘢會諗到覺得有啲迷惘同埋無助,我諗都算係唔開心,的確,我覺得自己諗緊嗰啲嘅問題如果得唔到一個真正嘅答案,好可能以後我生存係世上都唔會再覺得開心。」 

「咁文樂你一直諗緊嘅問題究竟係咩?不如你講我知吖。」 

「算啦……我講出嚟都驚嚇親你……」 

「唔緊要,你講出嚟我先可以知道點樣幫你架嘛。可能個問題我識得答呢?你可以信任我,你可以同我講架。」 

「好啦……」 





「嗯。你講啦……」 

「屌你老母,點解你唔係小龍女又要生把咁嘅聲出嚟?」 

「吓……」
已有 0 人追稿