《蒲英的約定》: 第三章──再遇(上)

「先生，你識女仔嘅方法都幾out喎，呵呵。」空姐取笑道。「嘿嘿，咁我可能認錯人啦，對唔住，不過你真係好熟口面。但係你真係冇見過我？」「冇啊。」佢微笑道。「哦，咁好啦，唔好意思。」講完之後我就望咗佢個名牌一下就去咗厠所，而佢都繼續做嘢。「陳卓盈，陳卓盈，係邊到見過呢？真係好熟…」我一路行去厠所一路諗。

當我去完厠所返咗埋位嘅時候，陳空姐就捧住咗個飛機餐行咗埋黎。「先生，你叫嘅牛扒同熱朱古力少甜。」「哦，咁快。唔該。咦，等陣先，我係要熱啡唔係熱朱啵。搞錯咗？」我滿帶疑惑咁問。「先生，冇搞錯啵，個餐係你叫架，定係你想轉返？」我望到佢眼內閃過一絲狡黠嘅笑意。不過我冇加以理會。之後拍麻煩嘅我答：「咁可能我叫錯咗。其實朱古力我都鐘意飲嘅，所以唔使再轉咁麻煩。」「咁好啦，先生，如果再有咩需要就叫我啦。」說罷，佢就行開咗。而正當我想開始享用呢塊鮮熱多汁嘅牛扒嘅時候，我先發現有包咖啡糖係杯熱朱隔離。咁我再仔細啲睇嘅時候，就發現包糖有8個數字係度。不過我都冇再加以理會，因為我發夢都估唔到呢8個數字可以間接救我一命。

用完膳後，陳空姐就過咗黎執拾餐桌。不過佢就漏咗包咖啡糖，所以我好心同佢講，費事佢要再走多轉。「陳空姐，你漏咗包咖啡糖啊，我冇用到。」「唔。」佢冷淡咁回應咗一聲就攞走咗。

跟住我就因為太過無聊所以就繼續休息。
……………………………………………………………………………「陳卓霖。」「到。」「李政蒲。」「李政蒲。」「喂，李政蒲，老師叫你啊。」「啊啊，係到。」我即時大叫道。「哈哈哈哈哈。」眾同學都因為我發呆而捧腹大笑。「李政蒲重發咩呆啊，我知道你擔心今日統一派位嘅結果，但係都唔好掛住發呆啦。俾啲自信心，出黎攞結果啦。」老師說。「哦，唔係啊老師，我諗緊晏啲去邊到慶祝咋，嘿嘿。」我隨口串道。老師聽到之後都冇嘢好講。我攞完結果之後，我嘅老友陳卓霖即刻沖咗埋黎。「喂，你派到邊間啊。我如無意外咁入到第一志願啊yeah。」「give me five我都係入到第一志願啊。」另外一個好朋友鄧嘉講。「我都係啊。」我對結果感到完全唔意外地道。「咦，等我睇下先…我地三個都入到同一間中學啵。」鄧嘉講。「你傻咗啊，你係女仔點會入到男校啊？」陳卓霖問。「你先傻啊，間學校已經由上年開始轉咗做男女校啦。」鄧嘉答。「吓，係咩？點解我唔知嘅…唉…慘啦，成個中學生涯又要對住你添…唉」「對住我唔好咩，我都未話你就講先，死矮仔。」「你…」「好啦好啦，你地一人少句啦，唔好再打情駡悄啦。」我終於睇唔過眼要開口話佢地。「唔。」跟住佢地兩個都停止咗駡戰。「好啦好啦，我去揾我細佬先。」說罷，我就留低佢地走咗。

「咦，詠英喎，等我問下佢見唔見我細佬先。」「詠，咦。」當我見到一個男仔唔知想出手做啲咩嘅時候就即刻沖上前張開雙手擋係詠英面前。結果膊頭就捱咗一拳。「喂，你做咩對女仔出手啊？」我問。「關你咩事？…我認得你，你係隔離a班個個人嘛。唔好恃住自己成績好同埋學跆拳就黎多管閒事。」男仔講。我一望就記起佢係柔道隊嘅隊長，我重記得佢成日揾跆拳道嘅人打架。「又係你，成日撩事鬥非，今日重連女仔都恰，睇黎我今日要俾啲教訓你先得。」「咁即係你要護住個女仔啦，睇黎你地兩個都抵打，一樣咁多管閒事。」說罷佢就準備揮拳。「喂，你地係度做緊咩？」訓導主任朱sir突然經過。「哦，冇啊，我地砌磋武技啫，朱sir。」我靈機一動答道。「係呢度砌磋武技？…李政蒲，郭懷大，你地唔好又搞事啦。…咦，張詠英都係度嘅？你地兩個唔好教壞師妹啦，如果唔係就話比你地家長聽。仲唔快啲返班房？」「哦。」我地答道。「今次算你好彩，以後唔好再俾我見到你。」郭懷大臨走前不忘係我耳邊輕聲講。等到朱sir同郭懷大走咗之後，就剩低我，詠英同埋一個唔知幾時出現嘅女仔。個女仔鬆咗一口氣咁講：「好彩趕得切揾老師啫。係啦，唔該哂師妹，幫我趕走咗個麻煩人。」「唔使客氣，助人為快樂之本啊嘛。不過，如果要多謝就多謝政哥哥啦。」詠英唔好意思咁講。個女仔聽完之後就行咗過黎。而我發現佢竟然同我差唔多高。如果話我有米六高，咁佢就有米五九。「係，差啲唔記得咗添，呵呵。你好，我叫陳卓盈，唔該哂幫我趕走咗個麻煩人。」 佢臉紅紅道。