《蒲英的約定》: 第五章──約定

「唔該，兩杯碎朱古力咖啡星冰樂，一杯走cream。嗯…再加多兩件藍莓芝士蛋糕。」買完之後，我就攞埋啲嘢食返咗揾位。當卓盈見到芝士蛋糕之後就興奮咁講：「咦，係芝士蛋糕喎，原來你重記得我鐘意食架？呵呵。」「係啊，你鐘意食就食埋我個件啦。」「唔，咁我唔客氣啦。」佢講完之後就真係唔客氣咁攞埋我個件。

「咦，係啦，你聽日唔使返工咩？」「唔使啊，我放兩日假。做咩？你想約我出街啊？」「唔係，我聽朝都要返返去韓國。」「吓，咁快返去？咁你今日返黎做咩啊？」「我返黎接詠英，佢老豆托我幫佢帶詠英返韓國避沙士。」「咁搞笑嘅，呵呵。其實我一直都諗緊你地兩家究竟係咩關係，點解你好似同師妹好熟咁嘅？」「會有咩關係？我地兩家咪只係好好朋友關係，所以唔使諗咁多。」「唔。咦，咁你記得聽日係師妹生日架可？」「吓，聽日係佢生日咩？」我頓時諗返起我同詠英嘅約定。
……………………………………………………………………………
「政哥哥，你記住要保重身體，仲要記住同我保持聯絡啊。而最最最最重要嘅係要快啲考完四段就返黎揾我啊。嗱，我最多俾四年時間你，你最遲要係四年後返黎同我慶祝生日。如果趕唔到嘅話，將來就要娶一個超超超核突似男人嘅女人，知道未？勾手指尾。」「哦，邊有人有呢啲咁嘅約定架。咁睇黎我要比心機先得啦，哈哈。」講完我就伸出尾指。「嗱，勾完手指尾，唔準反口架。」「知道啦，點敢啊，大小姐，哈哈。」最後佢就比咗一個緊緊嘅擁抱我。「力哥哥，你都要保重身體啊。」佢講完之後都比咗細佬一個擁抱。「唔。」

不過，係呢一日，我始終都見唔到我最想見嘅個個人。而佢亦都冇黎同我講再見。…期待。等待。
……………………………………………………………………………
「喂，發咩呆啊？」「哦，無啊。係啦，你啊哥畢咗業之後做緊咩？我無咗佢電話之後同佢失哂聯絡。」「佢？佢而家同鄧嘉師姐一樣當緊差。」「當差！？佢倆個？！哈哈，好難想像到。」「我都估唔到啊哥竟然去當差。」「唔，咁你呢，做咩做空姐？」「我？咁我鐘意坐飛機嘛，所以咪做空姐囉，呵呵。」「咁嘅理由我都係第一次聽，哈哈。」



「咦，係啵，你重有冇打籃球啊？」「有啊，做咩？」「無啊，重諗住你掛住練跆拳所以冇打之嘛。」「唔係啊。我逢一三五六練跆拳，二四打波架。所以如果話跆拳係我嘅生活一部份，咁籃球就係我最大嘅興趣。哈哈。」「唔，我一直都覺得做運動嘅男仔好有魅力好陽光，特別係打波個啲。」「嘻嘻，比你咁講我都唔好意思添。」「唔使唔好意思喎，話哂你以前中學個時都係籃球隊長兼MVP啵。」「你唔提起我都差啲唔記得添。唉，真係有啲掛住以前返學嘅時候添…想當年，中一嘅時候突然常打籃球所以就拉埋你啊哥一齊，點知最後我地竟然可以係中五嘅時候就擔任咗正副隊長呢個重責，真係好笑。」「點只啊？」卓盈突然欲言又止咁奸笑道。