《唔係啩！真係有個老婆教我追女仔！》: 第十六章
翌日我醒來的時候，小惠已經不見了，她在我桌上留了字條。
「我出街啦，你咪唔用得whatsapp嘅，我會用Line同你聯絡啦，拜~」
她們三個女孩子，情人節的今天約了去幹甚麼呢? 不會是逛街吧? 還是...跟故事一樣到『Fiona』家裏做朱古力呢?
若是這樣的話，我能收到Fiona的朱古力吧！
想一想我就忍不住要偷偷竊笑了，還好沒有旁人在。
嗯...那麼小惠會送給我嗎?
這時候我卻不能肯定小惠的心意。她有時待我如糖黐豆的向我撒嬌，有時又如水溝油的將我一腳踹開；很落力的幫我追Fiona，但在關鍵時候又像在說謊；會呷我的醋，但明知Roy想追求她也會跟他約會。
嗚......小惠到底是怎樣想的......
對了！那個Brian是誰? 趁小惠不在時讓我調查一下吧。
我拿起電話，又多了兩個Fiona的未接來電，whatsapp也累積了幾個訊息。
雖然我也很想Fiona，但我還是忍住了現在就找她的衝動。
今晚我會來向你表白的！等我啊Fiona！
我先按了133，然後再按下那個Brian的電話。
嘟......嘟嘟............嘟嘟............
等待的同時，我緊張得心跳加速。
「喂? 」一把男聲傳來。
接通了！接通了！真的是個男的！
..................
糟了！我只顧打電話，可沒想到接通後要說些甚麼！
「喂喂? 請問搵邊位呀? 」男聲很有禮貌。
怎麼辦? 怎麼辦? 要說些甚麼嗎? ......對了！
「你好，我哋係獅子銀行打嚟㗎，請問你有無卡數嘅煩惱呀? 我哋有個優惠低息貸款比返先生你㗎。」
「哦，我無需要呀，唔該你。」
他真的好脾氣，要是我的話二話不說就掛線了，那有這麼好的耐性。
「咁唔阻先生你啦，再見。」
「哦，拜拜。」
我馬上掛斷電話，手按心口重重呼了一口氣。
真的緊張死我了！下回還是計劃清楚才行動吧。
不過現在想想，就算有Brian的電話也沒有作用，我總不能直接問他跟小惠是甚麼關係吧！
這時候傳來Line的音效。
是小惠！
我打開一看﹕「Fiona一見到我就問你消息啦，我話仲未知，跟住佢又變得悶悶不樂咁」
這是好消息吧。
我馬上回覆﹕「繼續觀察！隨時匯報！唔該！」
「哼！一個唔該駛死人呀！請我食嘢！」
唉......怕了她......
「好好，榴槤雪糕好未? 」
「嗯，咁就差唔多」
「記住今晚你哋差唔多走嘅時候話我知呀」我跟小惠約好，她今晚會和Fiona一起吃飯，回家之前會通知我，讓我待在Fiona回家的路上，好讓我突然出現給她一個驚喜。
「你...今晚見到佢......諗住講咩呀? 」
「無呀，say個sorry，同佢解釋吓我呢兩日去咗邊咁囉」其實我是打算表白的，但小惠還是會像上次一樣阻止我吧，所以我沒有向她說實話。
「喂！Fiona返嚟啦，我遲啲再同你講」
就是這樣，我到了傍晚時份才再次收到小惠的訊息﹕「我哋而家去食飯啦，差唔多返屋企就話你知啦。」
我馬上沐浴更衣，整理儀容，務求以最佳狀態迎戰。
不知不覺弄了個多小時，我又收到小惠的訊息﹕「我哋食完飯，諗住返屋企啦，我諗大概8點半返到去九龍塘地鐵站，你自己就時間啦」
Fiona從地鐵站回家從來都只會走同一條路，於是我待在她的必經之處靜靜的等待。
說起來，這裏......好像是豪宅區啊。
我東張西望，入目的都是不超過十層高的低密度住宅，難道Fiona住在這裏?
這時小惠告訴我她們已回到九龍塘地鐵站。
我連忙收攝心神，留意著Fiona將會出現的地方。
過了幾分鐘後，我又收到小惠的訊息﹕「我同Fiona分咗手啦，你喺邊度等佢? 」
我迴避了她的問題，免得她走過來阻撓﹕「你返hall先啦，我今晚再同你講」
她倒也沒有追問，只是說知道了。
又等了幾分鐘，我終於看到Fiona的身影從遠處向我慢慢接近。
我打電話給Fiona，她見到是我的來電馬上停下來了。
「喂，Sam? 你去咗邊呀? 我搵咗你好耐啦！」
「哈......sorry呀，尋日朝早老豆突然拉埋我返大陸，話我堂家姐結婚一定要我返上去喎......我啱啱先返到嚟咋，見到你搵咗我好多次，咪即刻打比你囉。」
「......等我仲以為你有咩事......咁...其實你堂姐結婚點解一定要你返去嘅? 」她又繼續步行了。
「哈，我都唔知呀。我老豆話我係我嗰代唯一嘅男人喎，所以一定要我去做個唔知乜鬼嘢代表，總之係啲家族傳統嘢，我都唔知咁多。」我頓了頓，又道﹕「係呢，你搵咗我咁多次係咪有咩事? 」
「無...無呀......無咩事，就係想問吓你去咗邊啫............係呢......咁...你啱啱先返到嚟係咪好攰呀? 」
我誇張的打了一個呵欠﹕「都係㗎，我而家好想瞓落張床度。」
「咁...咁你快啲去瞓覺啦，我唔阻你啦......」
我聽到她的語氣好像有點不捨，希望不是我聽錯吧。
我笑道﹕「不過喺瞓之前，我想做一樣嘢先。」
「嗯? 咩呀? 」
「見一見你。」
「見我? 」
就在此時，Fiona剛好走到一個路口，看到我正在路口的一旁。
她放下電話，驚訝的看著我﹕「Sam? 」
我走上前跟她打了個招呼﹕「Hi！」
她的表情很複雜﹕「點...點解你會喺度嘅? ......」
我微笑道﹕「我啱啱咪講咗囉，想見你呀嘛！」
她聞言羞澀的低下了頭﹕「你...你......」
我沒等她說下去，將一朵藏在身後的玫瑰花送給她﹕「送比你㗎，情人節快樂！」
Fiona接過後奇道﹕「紙...玫瑰? 」
「係呀，我諗住新鮮嘅擺幾日就謝，呢個就唔怕啦。我學咗好耐先識摺㗎！」這個我是實話實說的，為了學懂摺這朵他媽的紙玫瑰，可真死了我不少腦細胞。
她笑了笑﹕「好靚呀！多謝你！」
「Fiona！」
她給我嚇了一跳﹕「嗯? 」
我的樣子變得很認真﹕「其實...我係第一次送花比女仔，而且仲要喺情人節......我意思係......」
Fiona雙頰緋紅，靜靜等待我說下去。
我吸了一口氣，道﹕「我鍾意你！你可唔可以做我女朋友呀? 」
大概我說得有點大聲，路過的一對中年大叔大嬸停下了腳步，有點愕然的看著我倆。
Fiona發現給陌生人盯著，羞得滿臉通紅拉著我的手就跑。
跑了一小段路遠離了剛才的花生友，Fiona終於停了下來。
「嗄......你......嗄嗄......你傻咗咩...做...做乜講得咁大聲喎.......」她鼓起腮問我。
她這個生氣的表情可真可愛，我忍不住逗她﹕「我驚你聽唔到嘛，咁咪大聲啲囉。」
「你......」
她猛然發現正牽著我的手，想鬆開我的時候，卻被我眼明手快的反牽著她。
我笑道﹕「拖住咗就唔比放啦。」
我感到她的手又縮了縮，但我當然緊緊的抓住不放。
她紅著臉看了我一眼，一臉的不知所措。
我抓起她另一只手，認真道﹕「Fiona，我鍾意你。」
Fiona看著我，神色有點猶豫﹕「但...但係......」
我截住了她﹕「你鍾唔鍾意我? 」
Fiona靜默了數秒，但最終還是輕輕的點點頭﹕「嗯......」
我大喜，牽著她手舞足蹈起來。
她嗔道﹕「傻...傻瓜......唔好跳啦.....其他人都望過嚟啦......」
我嘻皮笑臉的﹕「怕咩啫，我啱啱搵到個咁好嘅女朋友喎，緊係要比其他人知道啦！」
她拍了我一下，佯怒﹕「你再係咁我唔睬你啦！」
我馬上乖乖的靜下來，笑道﹕「知道！我最聽女朋友話！」
Fiona白了我一眼，又幽幽的道﹕「Sam...嗯......其實...我都唔知點講.......」
我牽著她走回商場的方向﹕「你有咩想講呀? 不如我哋行多陣先啦，我仲想見多你一陣。」
Fiona點一點頭，就由得我牽著她走。
在商場內四處閒逛時，Fiona突然問我﹕「Sam，其實...你真係鍾意我? 」
我笑道﹕「係呀，好鍾意好鍾意！」
她停下了腳步﹕「你......成日都嘻皮笑臉咁，我都唔知你係咪認真......我...我係會好認真咁對待一段感情，我唔想隨便玩玩吓。」
原來Fiona是這樣想，我可不能讓她對我失去了信心。
我停下來情深款款的看著她﹕「我都會好認真㗎，我會對你好好㗎。」
Fiona凝視了我一會兒，忍不住「噗」一聲笑了出來﹕「你認真個樣好搞笑呀......」
我萬分無奈﹕「唓！又係你話認真，而家你自己又喺度笑。」
Fiona挽著我的手臂繼續走，笑道﹕「係啦係啦，係我唔啱啦。」
頃刻，她想起甚麼東西似的﹕「呀！我送啲嘢比你吖！」說罷從手袋拿出一個精美的盒子。
「呢盒係? ......」
「你打開睇吓咪知囉。」
我將絲帶拆開，打開一看，原來是一盒精美的朱古力。
「送比我嘅? 你幾時買㗎? 」
「頭先同小惠行街嗰陣買㗎。」
我蠱惑的笑道﹕「哦~原來有人一早就想送情人節朱古力比我。」我以為已經偏離了原故事那麽遠不會收到朱古力，想不到還是收到了，雖然不是親手做的。
她窘道﹕「咩...咩喎......我...我行過見到幾靚先至順便買咋嘛......」
我盯著她笑道﹕「真係順便? 」
她嗔道﹕「係呀！你係咪唔要吖? 唔要比返我！」說罷伸手想搶回去。
我馬上迴避，並放了一顆入口﹕「唔...好味......不過如果係親手做嘅話呢，我會更加鍾意。」
Fiona甜笑道﹕「下年先整比你啦，好唔好? 」
我當然大點其頭。
逛著逛著不經不覺已經差不多十時了，我也要送Fiona回家了。
來到商場外的那條岔路，Fiona道﹕「你送到呢到得啦。」
往日以朋友的身份當然不能問她為甚麼，但今非昔比，我當然拒絕就此離開。
我搖搖頭﹕「唔得，我要送到你去屋企門口。」
Fiona臉現難色﹕「唔...唔駛啦......真係唔駛啦...我好快就返到去㗎啦。你今日咁攰，我唔想你又行多段路，你早啲返去休息吓啦。」
我堅決的搖搖頭﹕「我唔攰，我要送你返屋企。」
Fiona顯得很為難，像是有甚麼難言之隱的。
到底是為了甚麼呢? 故事裏沒有說，難道是怕給父母看到嗎? 她的家教有這麼嚴厲嗎?
我試探道﹕「你驚比你爹地媽咪見到我? 佢哋唔比你拍拖? 」
Fiona搖搖頭，卻又沒有再說些甚麼。
到底是甚麼原因呢?
「你唔話我知咩原因，我唔會走㗎，我會跟埋你返屋企。」
Fiona向她家的方向望了一眼，又轉頭佯怒道﹕「你再係咁我唔理你㗎！」她開始有點不高興了。
我順著她的目光看了一下，只見淡黃的街燈之中，映照著一幢又一幢矮矮的平房。
啊！難道是因為......
「你係驚我知你住喺邊? 」
Fiona聞言顯出一絲不安。
看來我猜對了，她怕我知道她家境跟我差太遠，所以才不讓我送她回家。
我微笑道﹕「其實你行呢個方向，又咁快返到屋企，除咗係下面嘅豪宅區之外，仲會住喺邊吖? 」
「我............」
我裝作受了屈委﹕「定...定係你覺得我襯你唔起...覺得我失禮你，所以先唔準我送你返屋企? 」
她急道﹕「唔...唔係呀......只係...我只係驚......」
我將她擁入懷裏，在她耳邊柔聲道﹕「傻瓜，其實屋企係點都同你個人無關係㗎，唔通我係屋村仔就要自卑，唔敢去追你咩? 」我頓了頓，笑道﹕「如果我自卑唔敢追你嘅話，你咪無咗個咁好嘅男朋友囉。」
Fiona馬上推開了我，笑駡﹕「唔知醜！邊個話過你好呀? 」
我定睛看著她﹕「無咩? 我聽到有人個心裏面係咁諗喎。」
Fiona俏臉一紅，別過臉道﹕「無呀！我無諗過！」
「呵！我都無話係邊個，有人鬼拍後尾枕自己認咗！」
「你！...你蝦我！」Fiona瘋狂拍打著我的手臂。
我捉住她的雙手，笑問﹕「好喇好喇，咁我而家可以送你返去未? 」
Fiona甜甜笑道﹕「咁我就准你送到我去屋企門口啦！」
跟Fiona手著牽手，慢慢走在昏黃的街道上，不時相互對望然後靦腆的笑一下。我終於知道為何人們總是用甜蜜來形容愛情。我真希望可以牽著Fiona就這樣一直走下去，直到天荒地老，只可惜送她回家這段路總會走完的。
雖然我倆已經刻意的放慢腳步，但還是不到十分鐘就來到她的家門口了。
「我到啦。」Fiona停下來看著我。
嗚呀！好想跟她來一個吻別啊！但剛剛才牽手馬上就索吻會不會太急色了一點? 有沒有辦法呢? .......................
有了！
我依依不捨道﹕「咁...咁好啦，拜拜啦......」我輕輕放開她的手。
她轉身走了兩步，又回眸一笑﹕「拜拜，你返到去打比我啦。」
「等等。」我喊停了她。
我續道﹕「你啲眼睫毛好似黐住咗啲嘢。」
Fiona聞言想用手揉眼睛，我連忙上前道﹕「唔好郁，你合埋眼我幫你整走佢。」
她乖乖的合上雙眼，靜待我替她弄走睫毛上的異物。
嘿嘿嘿！Fiona還真的單純，她太好騙了！
我忍住了笑，道﹕「合埋眼唔好郁啦，我而家整走佢啦。」
我慢慢湊近她，然後在她的唇上輕輕親了一下。
我太滾動了！閒置了差不多廿年的初吻，今夜終於獻出去了！而且還是獻給我的女神！
Fiona嚇了一跳，馬上瞪開了眼睛。她看見我不懷好意的模樣，終於知道我在幹甚麼。
她紅暈滿臉，拍了我一下嗔道﹕「你...你個衰人...你呃我......」
她雖然口中駡我是「衰人」，但臉上並無慍怒之意，應該只是害羞而已。
我笑道﹕「頭先你啲眼睫毛真係有啲嘢，但轉眼就唔見咗喇。咁我見你都合埋咗眼，咪......」
她瞪了我一眼，「哼」一聲後別過了臉。
我拉了拉她的手，撒嬌道﹕「唔好唔睬我呀，最多我下次問咗你先錫啦。」
Fiona「咭」的一聲笑了出來，但又裝作生氣﹕「哼！今次就算啦！下次一定要問咗先！」說完她自己都忍不住掩嘴偷笑。
「係！知道搣時！」我馬上舉手﹕「搣時！我有嘢想問！」
她瞅了我一眼﹕「咩事呀? 」
我吃吃笑道﹕「可唔可以錫多啖? 」
Fiona的臉又紅起來(她可真容易面紅)，嗔道﹕「啱啱先錫完，又錫? 」
我不要臉道﹕「係呀搣時，我今次好乖問咗先喇。」
她斷然拒絕﹕「唔得！」
我當然不肯放過她，憑著我死纏爛打的功夫，她終於允許了。
Fiona道﹕「不過今次輪到你合埋眼。」
哦? 沒想到Fiona也會這麽主動。
我當然沒有意見，反正我親她跟她親我還不是一樣?
我合上雙眼，伸長了嘴等待的時候，卻聽到鐵閘打開聲，和一連串的狗吠聲。
我馬上睜開雙眼，只見離我約一米處，一隻松鼠狗惡形惡相的瞪著我，不停向我吠叫。
還有一個跟Fiona有點像的少女，站在鐵閘旁驚訝的看著我倆，Fiona則滿臉通紅的看了看少女，又看了看我，有點手足無措。
少女好像明白發生了甚麼事，她走過來抱起松鼠狗，喃喃自語﹕「毛毛唔好叫喇，家姐未返呀，我哋返入去先啦。」說罷就無視我們走回屋子裏。
我搔搔頭，尷尬的笑道﹕「你...細妹呀? 佢...佢都幾幽默喎......」
Fiona的臉紅得像熟透的蘋果，嗔道﹕「一日至衰都係你！比...比嘉寶見到哂啦！」
我壞壞笑道﹕「反正都比佢見到咯，咁快啲做埋我哋頭先未做完嘅嘢啦。」
她沒好氣道﹕「衰人！合埋眼啦！」
我又乖乖合上眼睛，伸長了嘴，頃刻，卻感到臉頰給親了一下。
「今次得咁多，拜拜啦，記得返到去打比我呀，男．朋．友。」
我睜開雙眼，只見Fiona甜笑著跟我揮手道別，然後就消失在門後了。
聽到嗎? Fiona叫我男．朋．友！我終於成功了！
我興奮得像喝醉了似的，腳步浮浮的回到宿舍，打開房門就伏在床上傻笑。
電話響起來了，是誰呢?
我看也沒看就接聽了。
「喂你返嚟啦? 頭先喺lounge見到你行路搖吓搖吓，做咩呀? 飲醉咗呀? 」
嗯? 這是誰的聲音? 好像很熟悉的......
「喂！你頭先係咪見咗Fiona呀? 你哋做咗啲咩呀? 咁夜先返嘅? 」
我記起了！這是小惠的聲音！
我給她嚇了一大跳，連忙坐了起來。
糟了！我都忘了小惠的存在！怎麼辦? 要告訴她我已經表白成功嗎? 還是裝作沒事發生?
小惠回來是幫我追求Fiona的，那現在我已經成功了，她是否就會離去?
小惠她會走嗎? ......但...她會到哪裏去? 真的是回去未來嗎?
怎麼我覺得...我捨不得她離開? ......
腦袋裏胡思亂想，嘴巴已經結結巴巴道﹕「無...無呀，我同佢見面之後，去...去咗食糖水，解釋吓我呢兩日去咗邊，所以先夜咗返......」我的第一個反應，就是對她說謊了。
「係呀，咁佢反應點呀? 」
「無..無咩特別呀，話我咁唔小心唔記得帶電話，搞到佢有啲擔心......」
小惠喜道﹕「哦? 佢擔心呀? 咁咪即係開始著緊你囉！」
我支吾以對﹕「係...係啩......希望係啦......」
小惠道﹕「做咩呀? 啲語氣咁無信心嘅? 唔似你喎。」她頓了頓，又道﹕「係喎，晏晝我同Fiona行街嗰陣，佢話我知原來Gary真係有約佢，你又會估得到嘅? 」
「咁...咁將心比己，我都會約Fiona啦，Gary會約佢都好正常啫。」雖然我是從故事中得知的。
「嗯，算你都有用個腦啦。好喇我唔講啦，我要繼續睇電視啦，拜。」
趁著小惠在lounge看電視，看看故事有沒有更新吧。
嗯...沒有嗎......看來暫時沒有甚麼事會發生。
這時候我想了想，其實我現在已經成功了，還有必要看羊先生的故事嗎?
不過老實說，他的這個故事還蠻有趣的，而且是有關自己的事，我都忍不住要追看下去。或者可以知道更多有關Fiona的事也說不定。
啊！對了！要快點打電話給Fiona報到。
「喂，唔該呀Sam個女．朋．友吖。」
本來想跟Fiona開一個玩笑，卻不料首先聽到的，是一把少女大喊聲﹕「喂！呀Sam個女．朋．友！快啲嚟聽電話呀！你男．朋．友搵你呀！」然後少女續道﹕「你好呀Samuel哥，我係你女朋友個細妹，我叫嘉......」
她還沒有說完，我就聽到Fiona的聲音﹕「喂呀嘉寶！你做咩偷聽我個電話呀? 比返我呀！」
一輪擾攘之後，我終於聽到Fiona的聲音了，不過她一開口就埋怨﹕「依！一日最衰都係你啦！頭先我一返入屋就比嘉寶佢問長問短煩住哂啦！」
我有點哭笑不得﹕「佢咁大聲，唔驚比你爹地媽咪聽到咩? 」
Fiona道﹕「我爹地媽咪出咗trip唔喺香港......」我又聽到她妹妹嘉寶的聲音﹕「家姐個男朋友，你幾時嚟我哋屋企玩呀? 爹地媽咪成日都唔喺香港㗎！同埋佢地都無話唔比家姐拍拖，所以唔駛驚喎！定係你驚我會阻住你哋呀? 唔怕喎！你當我透明得喇，你哋鍾意做咩都得㗎！好似頭先你哋喺門口做嗰啲都得㗎，甚至係......」
嘉寶還沒有說出「甚至」甚麼，就給Fiona喝停了﹕「連嘉寶！」然後又向我道﹕「你等一等。」
接著我好像聽到Fiona低聲駡嘉寶的聲音以及連串的腳步聲。
一會兒後，Fiona終於再次說話﹕「唉......我個妹真係好煩呀......」
我忍不住哈哈大笑﹕「唔係吖，佢幾得意呀。佢頭先想話『甚至』咩呀? 」
Fiona嗔道﹕「喂！陳洛鋒！」
我們就這樣打情駡俏的聊電話，內容是些甚麼都忘記了，反正熱戀中的情侶都是聊些言不及義的無聊事。
跟Fiona透過電話甜甜蜜蜜了好一陣子，突然之間房門打開，小惠回來了。
我嚇得馬上掛斷電話，才掛斷我就後悔了。
『大檸樂！心急得滯cut咗Fiona線添！今次PK喇！』
小惠見我拿著電話呆看，問道﹕「做咩望實個電話呀? 」
我的心虛得要命﹕「無...無呀......」這時候我的電話卻響起來。
仆街了！是Fiona！怎麼辦? 要接聽嗎?
我猶豫不決的同時，小惠問﹕「做咩唔聽電話呀? 邊個打嚟呀? 」
Damn！我幹嗎這麽慌張? Fiona打來而已，在小惠面前接聽又有甚麼問題呢。
想通這點後，我馬上接聽﹕「喂！Fiona，唔好意思，頭先好似收得唔係幾好斷咗線。」
Fiona道﹕「哦，係呀，等我仲以為你做咩cut咗我線添。」
我背上滲出冷汗，結結巴巴道﹕「哈...哈哈......點會呢......」
Fiona這時候卻向我撒嬌﹕「我呢...頭先突然聽唔到你把聲，就有啲掛住你啦，你掛唔掛住我呀? 」
怎麼要挑這個時候撒嬌? 小惠就在我面前，這個「掛住」我怎麼說得出口?
我留意著小惠的動靜，她坐在床上使用著手提電腦，好像沒有留意我在幹甚麼。
Fiona軟糯糯的聲音又傳來了﹕「Sam? 做咩唔出聲呀? 你掛唔掛住我呀? 」
嗚呀！Fiona的聲音騷得把我的骨頭都溶掉了！她剛才也沒有像這樣撒嬌的，怎麼回事?
我只好誇張的自言自語﹕「喂? 喂? ......又好似收唔到喇，我去搵個收得好啲嘅地方先......」然後我就大條道理的走到房外。
才關上了門，我就以一百米的速度跑到lounge。
我左望望，右望望，沒有人，clear！
「嗄......sorry...我哋可以繼續講喇......」
她埋怨道﹕「乜咁㗎? 你個電話又收唔到呀? 咁你咪聽唔到我頭先講咩囉......」
我連忙道﹕「聽到聽到！你話掛住我呀嘛！聽到！」
她嗔道﹕「喂呀！咁你呢！」
「我緊係掛住你啦，掛到我上心口添呀！」媽呀！這些對白真的肉麻死了！......
不過我喜歡！
我們就這樣「掛」來「掛」去，直到Fiona說睏了，我們才捨得掛上電話。
我看了看鐘，不知不覺竟然聊了兩個小時。除了腰骨有點酸痛外，連下巴都軟掉了。
拍拖還真累人，不過才過了這一陣子，我又開始想念Fiona了......
嗯，反正星期一上課也能見到她，現在先去好好休息吧，明天我還要去當一整天的補習老師幫補生計。
回到房間，小惠好像去了洗澡，然後我發現書桌上有一盒東西。
「睇你今日都係無收到朱古力啦，見你咁可憐，送一盒比你喇」
我拿走字條，原來跟Fiona送給我的是一模一樣的朱古力，她們是各自分開買的嗎?
小惠她...也送朱古力給我，真的是可憐我嗎?
接著我坐在電腦前想打開面書，卻發現有點古怪。
咦? 我剛才不是在看紙言嗎? 怎麼頁面停留在面書的? 還是剛才我有打開面書?
算了，大概剛才我已經打開了吧。