《唔係啩！真係有個老婆教我追女仔！》: 第十七章
接下來的兩星期我跟Fiona拍拖拍得有點鬼鬼崇崇，這是因為我不想給熟人碰見了而間接令小惠知道我們拍拖的事。
所以每天晚上我和Fiona的電話對白大概如下﹕
「Sam，聽日我上完lecture你嚟接我去食飯好唔好呀? 」
你明天的lecture不是跟小惠一起上課嗎? 那豈不是會給她見到?
「呃......我聽日想去拉記做功課，順便print notes，一係你上完堂過嚟拉記搵我好嗎? 跟住我哋先一齊去食飯吖。」
「你又唔嚟接我呀......」我可以想像到她正噘著嘴說話。
「乖啦，你嚟拉記咪見到我囉，我唔想做做吓功課停低，咁會洩咗度氣㗎。」
「哦，咁好啦。」
除了圖書館之外，我還會利用舊校，甚至是又一城，反正是找那些比較低機率碰到熟人的地方拍拖。而放假的時候，我正好大條道理的帶著Fiona遠離市區，所以一直進行得很順利，Fiona也沒有注意到我不想公開我們的關係。
二月尾的某天晚上，我拿起電話想跟Fiona情話綿綿之時，電話就響起來了。
這個時候肯定是小惠。真搞不懂她，只是在lounge看電視而已，有甚麼想說回房就能說了，幹嗎一定要用電話? 而且總是每天晚上找我一次，說的十之八九都是些無聊事。
「又點呀? 」我拿起電話，有點不耐煩。
「咩又點呀? 而家嫌我煩呀? 」
「唔係......」
「哼！好心無好報！我啱啱醒起過幾日係Fiona生日，睇吓你有無準備咋！」
甚麼? Fiona生日? 糟了！我根本沒有想到這件事，Fiona會不會以為我知道，心裏正暗暗期待的?
對了！這麽大的一件事故事沒可能沒有記載的，讓我先看一下有沒有更新吧。
「喂！你比五分鐘我，我再打比你。」沒等她回應我就掛了電話。
我馬上打開紙言，第十一章果然發表了。
都怪我自從跟Fiona一起後，都沉溺在熱戀當中，對這個故事越來越不重視了，這一星期我幾乎忘記它的存在。
原來Fiona的生日是3月2日，幸好還有幾天時間讓我準備。
不過故事裏『我』跟『Fiona』慶祝的方法看來不能用了。她已是我的女朋友，若我那天「消失」的話，我想不但會讓Fiona擔心得要死，我怕最後也會不得好死......
才看到生日當天晚上『我』終於在『Fiona』眼前出現，小惠就回來了。
由於有多次被她撞破我看紙言的經驗，我已經能不變應萬變。我不動聲色，待她沒有留意才轉了個頁面。
「睇完電視喇? 」
她白了我一眼﹕「無嗱嗱cut人線！等你5分鐘做咩呀? 」
「無...無嘢呀......」我連忙拉開話題﹕「我點會唔知Fiona 3月2生日喎，我頭先想諗下點樣同Fiona慶祝啫。」
「咁你諗到未吖? 」
「未......」這麼短的時間怎麼想得出來.......
小惠不屑的看著我﹕「唓！都知你㗎啦，我一早已經幫你問咗，佢話約咗人，我估係屋企人啩，所以你唔駛諗啦。」
Fiona說她約了人? 她約的那個「人」，不會就是我吧?
我喃喃自語﹕「約咗人呀......」
小惠看了我一眼﹕「唔駛咁嘅樣，我橋都幫你度埋啦。嗰日晏晝我哋會同佢慶祝食蛋糕，不過你唔好出現喎......」
咦? 她說的不正是故事裏的橋段? 但現在情況是，我不出現的話會死的！但出現的話，小惠肯定會知道我跟Fiona在拍拖了，怎麼辦?
嗯......若果我一早跟Fiona說明下午因事缺席，而晚上跟她兩個人去慶祝，她應該不會怪我吧。好！就這麼辦！
接著小惠就跟我講解當天的計劃，果然跟故事裏的一模一樣。
到了Fiona生日當天的中午，我收到小惠的whatsapp﹕「我哋而家同Fiona返hall啦」
小惠說好會現場直擊報導Fiona的反應給我，雖然我知道不會出現故事中的情況，不過我還是很有興趣知道。
小惠續道﹕「不過Gary都一齊喎」
What? 怎麼讓他跟來?
我馬上抗議。
「咁唔通我say no咩，我又唔係Fiona邊個，而且Fiona都話ok」
可惡！這個混蛋！想乘我不在時討好Fiona嗎? 門都沒有！
不過我還是很擔心，我馬上要小惠幫我留意著，有甚麽風吹草動要馬上通知我。
「我哋返到hall啦」
「奇怪，點解Fiona無問你去咗邊嘅? 」
「樂言已經專登喺佢面前話你好似有急事，成朝都唔見你，但佢好似無乜嘢，又話唔駛理你喎」
然後......
「喂！點解Fiona話知道你有事嚟唔到㗎? 你做乜同佢講呀? 你唔係要比驚喜佢咩? 」
唉......我就早知道會是這樣子了，我根本不可能讓Fiona裝作不知道我不會出現。
我還在想怎樣回覆小惠，她已經致電來了。
「喂！做乜唔跟個plan呀? 你唔比驚喜Fiona喇? 」
「唔...唔係......我都唔想㗎...今朝...我行行吓都撞到Fiona，咁...咁同佢傾多兩傾唔小心講咗出嚟......」我唯有亂作藉口。
「你真係無鬼用！咁今晚個計劃有無變呀? 佢唔係都知道呀? 」
「無！無！我緊係無講啦，今晚按原訂計劃進行。」
「咁你今晚醒醒定定啦！喂唔講啦！我要入返去啦！」然後就掛斷了線。
一會兒後，現場報導又繼續。
「Fiona吹完蠟燭啦，Gary送咗份禮物比佢，細細份包得好靚咁，Fiona收咗但無拆到，唔知係咩呢? 」
「我哋食完蛋糕啦，而家同Fiona去上堂。就算佢唔見你出現心情都好似幾好喎！唔通佢知道今晚就見到你? 」
我想...應該是吧......
「吓......唔會啩，可能因為有一大班人同佢慶祝啩......」我唯有這樣說。
「點都好啦，你準備好今晚點做未? 」
「放心，準備好哂」
我準備的，當然不是小惠想出來的那個計劃，而是悉心安排的蠋光晚餐。
我們剛吃完了飯，我正送Fiona回家。
「今晚開唔開心呀? 」
Fiona挽著我的手，身子緊靠著我，甜笑道﹕「有你陪我喎，緊係開心啦！」
「係咩? 我以為係因為你收到好多禮物開心咋。」
「都唔係好多咋嘛，有你嗰份、爹地、小惠、仲有Mandy嗰份咋嘛。」
我開玩笑道﹕「得咁多? 我聽聞Gary都有送喎！」
她像恍然大悟似的﹕「係喎！我都唔記得咗添！」
「咩嚟㗎? 」我當然很好奇想知道他送甚麼給Fiona。
「唔知呀，我都未拆，仲喺手袋裏面。」然後她就在手袋裏掏出一個小盒子。
只看包裝，應該是頗名貴的首飾。
Fiona解開絲帶，再打開了盒子。
「嘩！好靚喎！」
裏面是一枚小小的皇冠吊墜，鑲在上面閃閃生光的，不會是真鑽石吧?
Gary這份禮物看起來比我的貴重多了，我不禁有氣﹕「哼！你鍾意佢呢份多過我嗰份呀? 」
Fiona看了看我的臉色，笑道﹕「點會呀? 我緊係鍾意我男朋友送比我嗰份多啲啦。」然後就親了我的臉頰一下。
Gary是因為還未知道我和Fiona的關係才會繼續攻勢吧，要怎麼做才能讓他知難而退呢? 直接告訴他Fiona已經是我的? 那麽會不會讓小惠也知道了?
Fiona見我沒有作聲，以為我還在生氣﹕「仲呷醋呀? 我同Gary都無嘢。」
你沒有不代表Gary沒有啊！Fiona你太單純了。
我悶哼一聲﹕「係呀，呢份禮物太貴重喇，你去還返比佢啦！」這樣子的話，Gary應該明白Fiona的意思吧。
Fiona想了想，道﹕「嗯......我都覺得係，咁我過幾日比返佢啦，咁你就唔準再呷醋啦！」
我親了她一下，笑道﹕「唔得！我最鍾意就係呷醋！」
她馬上給了我一個老大的白眼﹕「小氣鬼！」
送了Fiona回家獨自回宿舍的途中，我閒著無聊打開紙言，將還未看完的第十一章看畢。
吓? 原來小惠是3月7日生日? 那不是只剩下幾天了嗎?
接下來我繼續看第十二章，生日當天『我』帶了『小惠』到海洋公園遊玩，由於種種原因，其他人都未能出席，只剩下『我』、『Fiona』和『小惠』三人行......
『Fiona』因為看到『我』和『小惠』玩得很高興而覺得自己不應該出現? 看來我是不能同時帶小惠和Fiona到海洋公園，那麽那天怎樣跟小惠慶祝呢? 還有的是，『我』買了上次在青衣城『小惠』喜歡的那枚手錶作生日禮物，『小惠』感動得獨自流淚，看來『她』真的十分十分喜歡『我』。那我應該買那枚手錶嗎? 嗯......買是沒有問題的，但不是由我送就行了，就交給Fiona當是她送的禮物吧。
來到了星期五，小惠生日的前一天。
今天我跟Fiona都是day off，本來想跟她去逛街看電影的，不過她說約了同學討論功課，那只好作罷。
「呵...欠......」接近中午的時份，我才伸著懶腰爬起床。
拿起電話看看，有一則Fiona的whatsapp﹕「起身未呀，懶瞓豬? 我而家傾project啦，傾完再搵你啦(笑臉)」
噢！戀愛的感覺真好！
我回她一個親吻emoji後，就帶著愉快的心情梳洗。
對了，小惠到哪裏去呢? 她今天也不用上課啊，難道去吃飯了嗎? 怎麼不叫我?
算了，不管她了，肚子餓，到hall can吃飯吧。
才走進飯堂，我就看到Fiona跟一個我不認識的女生坐在一角，正在討論著甚麼。
呵！原來她在這裏，怎麼不告訴我呢? 想給我一個驚喜嗎? 那就讓我給你一個驚喜吧。
我躡手躡腳繞到她背後的位置坐下，打算待會她討論完畢後，就給她從後來一個愛的抱抱。
我聽著她跟女同學討論著功課，心裏有點納悶時，我赫然聽到Mandy的聲音。
「喂你兩個咁早到咗嘅? 傾咗好耐喇? 」
Fiona答道﹕「唔係呀，啱啱開始咋嘛。」
原來Mandy也是功課小組的一份子，那我的「愛的抱抱」計劃豈不是要泡湯了?
為免給Mandy發現，於是我想悄悄離開，這時候我卻聽到陌生女生的說話。
「Gary佢啱啱whatsapp話差唔多到喎。」
甚麼? 原來Gary也是組員? 那我的Fiona豈不是很危險? 不行！我要留下來保護Fiona！
我等了一會兒，終於聽到Gary的聲音。
「Sorry，遲咗少少。」
陌生女生﹕「唔緊要，我哋都係啱啱開始啫。」
接著我就聽到椅子拉動的聲音，不用說，這傢伙肯定會坐在Fiona身旁的。
Mandy﹕「我哋頭先講緊呢度......」接著他們開始討論功課。
他們討論的內容很沉悶，過了大約半小時，我快要睡著的時候，陌生女生道﹕「我唔記得拎份notes落嚟，我返一返房先。」然後就離座而去。
Mandy也道﹕「咁等埋佢返嚟先再做啦，我去買嘢食，你哋要唔要? 」
「唔駛啦唔該。」
「我都唔駛啦。」
然後我又聽到離坐的聲音。
現在豈不是只剩下Fiona和Gary? Gary不會趁機對Fiona做甚麼奇怪的事吧?
我有點忐忑不安，不過聽來他們還只是討論剛才功課的內容。
但一會兒後，Gary道﹕「係呢Fiona，上次你話唔得閒一齊去睇畫展，咁聽日或者後日得唔得閒一齊去呀? 個畫展好似就嚟完啦，再唔去無得睇啦。」
果然！這傢伙還是在死纏爛打！
Fiona﹕「其實我睇咗啦，都真係幾好睇喎，你有學畫一定要睇呀！」
我頓時鬆一口氣，還好小惠那天陪了Fiona看畫展，不然以Fiona的性格定會答應了。
Gary﹕「係呀，咁唔緊要啦。」頃刻，他又道﹕「咁啱我有兩張管弦樂團嘅飛，係聽晚，喺大會堂，有無興趣一齊去睇呀? 」
TMD！這傢伙又用Fiona的喜好去打動她了！
果然！我聽到Fiona很興奮的聲音﹕「咦? 我想去睇呢個團好耐啦......」
不行！Fiona會答應這傢伙的邀約的！我不能靜觀其變了！
我霍然坐到Fiona旁邊，不由分說的摟著她的肩膊，在她臉上親了一下﹕「咦? 你又會喺度傾project嘅? 係咪因為太掛住我呢? 諗住喺hall can會容易啲見到我呀? 」
Fiona給我嚇了一跳，但馬上又滿臉通紅，輕聲嗔道﹕「喂呀！呢度好多人㗎！」
Gary則張大了口，呆若木雞的看著我倆。
我讓Gary看到我牽著Fiona的手，然後裝作驚訝﹕「咦? 乜原來Gary你都喺度呀? 唉哎sorry呀，比你睇到哂啲肉麻嘢添......」
Gary還沒有回應我，我就聽到Mandy笑道﹕「啊！原來你兩個一齊咗！唔怪得我硬係覺得Fiona呢排怪怪地啦！你哋都算收得埋啦！」她看了我的後方一眼，訝道﹕「咦！小惠你原來嚟咗啦? 做咩仲企喺度呀? 過嚟啦！咦? 呀Roy你都喺度嘅? 」
『小惠? ！仆街啦！咁頭先佢咪睇到哂? 』
我膽顫心驚的回頭一望，只見小惠呆呆的看著我倆，她的視線跟我一接觸，馬上如觸電般躲開。
她有點口齒不清﹕「Hi......hi......我...我......有啲唔係好舒服......我...我想下次先傾......」說完她就轉身離開。Roy有點不明所以，他看了看我，又看了看小惠，然後就緊跟著小惠而去。
這時候Gary冷冷的道﹕「Sam你唔追上去睇吓小惠做咩唔舒服? 話哂佢都係你表妹喎！」
是我的錯覺嗎? 他好像刻意強調「表妹」兩字，難道Gary知道了甚麼?
Fiona也有點擔憂﹕「係囉，不如你去睇吓小惠發生咩事啦。」
連Fiona也勸我跟上去，但我找到了小惠又可以怎麼樣? 我應該說些甚麼?
我很想追上去，但我發現根本甚麼都做不了。我有點沮喪﹕「呀Roy都陪住佢，應...應該無事嘅......」
整個下午我窩在房間裏，思考著我應該怎樣面對小惠。
她...是喜歡我吧，不然不會有這個反應的。但她來是幫我追Fiona吧，那她不是成功了嗎? 那待會見到她要不要跟她慶祝一下? .......不！我是瘋了嗎? 即使她的目標達到了，但看著自己喜歡的人跟別人在一起，又怎麽可能高興? 那麼她是否就要離開? 她要到哪裏去? 真的是未來嗎?
我在房裏踱來踱去，天色不知不覺已經轉暗，原來已經晚上十時半了。
怎麼小惠還沒有回來? 她到哪裏去了? 她平時都會這個時候打電話給我的，怎麼今天沒有?
我看著電話惴惴不安，忍不住打了給她，她倒是馬上接聽了。
我急道﹕「喂，小惠你喺邊呀? 咁夜都唔返嚟嘅? 」
她的語氣很冷淡﹕「我今晚唔返嚟瞓啦。」
「吓? 咁你今晚瞓邊呀? 」
「放心啦，唔駛擔心我，係咁啦。」
「喂? 喂? 」
她已經掛了電話。
我再次打給她，但她沒有再接聽了。
怎麼辦呢? ......嗯......剛才Roy有去追小惠，他找得到她嗎? 他會不會知道小惠的情況?
Roy...Roy.....誰有他的電話呢? Gary應該有吧......Damn！要我求Gary的話不如叫我去死！但...這是我唯一能知道小惠發生了甚麼事的方法......
無奈之下我也只好從Fiona處拿到Gary的電話，然後再打給他。
「喂，請問係唔係Gary? 」
「我係，你係......? 」
「我係Samuel......」
「呵！你呀? 請問咩事呢? 打嚟曬命? 」
我有這麽討厭嗎? 雖然中午時我的確是有心炫耀和宣示主權......
我陪笑道﹕「你真係識講笑......係咁嘅，我想問一問呀Roy個電話，我有啲嘢想問佢......」
「哦? 問咩呀? 你同佢......唔通你想問小惠嘅事? 你唔係佢表哥咩? 點會唔知小惠有咩事呀? 」他的語氣充滿諷刺的意味。
我只能繼續低聲下氣﹕「其...其實係因為我搵唔到小惠，所以想問吓呀Roy知唔知佢嘅情況囉......」
「比你都得，不過有一個條件。」
我有不詳的預感﹕「係...係咩呀? ......」
「對你嚟講好簡單啫。我想同Fiona兩個人去聽管弦樂團......」
你老......！竟然以此要脅我，要我出賣自己的女朋友！不行！
......
......可是...
......可是，還有好幾天才能在P.E.堂見到Roy，那時候我怕已經太遲了......
「點呀? 唔得呀? 唔得就算啦，反正你過幾日都見到佢啦，小惠應該無嘢嘅，都係等多幾日啫。好啦，我唔講啦，再......」
「等等！」
我心裏詛咒了Gary千百萬次，然後垂頭喪氣道﹕「我應承你......」
Gary的聲音像是已經把Fiona搶到手一樣﹕「哈哈！睇嚟小惠對你都好重要喎！連女朋友都可以出賣！」
不要再說了......我不知道...我不知道............
我不斷問自己，小惠在我心中，到底佔據著甚麼位置。
我像鬥敗的公雞﹕「咁你而家可以話我知Roy個電話啦。」
「我whatsapp你啦，拜。」
我掛了電話，頹然的坐在床上，不到一分鐘，我就收到Gary的訊息。
「我好講口齒，呢個係Roy電話，希望你都係」
我嘆了一口氣，打了電話給Fiona。
「喂，我呀。」
「嗯? 做咩你把聲好似唔開心咁嘅，做咩事呀? 」
唉......親手將自己的女朋友推給情敵和他約會，我還可以高興得起來嗎?
「無......係呢，今日晏晝Gary佢咪拎咗兩張管弦樂團嘅飛嘅......」
Fiona沒等我說完，就興奮道﹕「你係咪同我去呀? 好嘢！我想睇呢個團好耐喇！」
「其...其實我...問過Gary，佢話呢個團好受歡迎，啲飛已經賣哂......」
「噢......係呀，咁唔緊要啦。」
「其實呢，你想去睇嘅話呢...你聽晚可以同Gary去......」你能想像我要下多大決心才能說出這句說話嗎?
「咁你呢? 」
「我...我聽晚都要去同人補習，去唔到啦，而且都係得兩張飛。」
「吓? 但係你又唔去......」
「但你想睇呀嘛，而且其實我對管弦樂無乜興趣，我驚我會恰眼瞓失禮你。」
「嗯......你唔介意我同第二個男仔出街咩? 」
介意！介意得要命！介意得要死！
「我緊係介意啦！但係我信得過你嘛！男朋友唔係應該對女朋友絕對信任咩? 」雖然我沒法阻止他們這次約會，但我這樣說，Fiona會覺得我是一個很好的男朋友吧。
「嘻！我就知道你係最好嘅！我都絕對信任你㗎！所以你都唔可以有嘢呃我呀！」
我的額上滲出冷汗﹕「知...道。」
對了！雖然我不能阻止他們約會，但卻有一件事可以讓Gary死心。
我道﹕「係喎，咁你聽晚記得攞返件禮物比Gary，你話太貴重唔收得啦。」
「知道啦，你唔講我都記得。」
哼！Gary，這枚吊墜你就自己留著吧！
跟Fiona聊完，我萬般不情願的whatsapp Gary讓他自己約Fiona，然後就打給Roy了。
「喂，Roy? 我係Sam。」
「Sam? 咩事呀? 」
「無......我有啲嘢想問你......」
「問我? ............有關小惠嘅? 」
「係......」
「嗯......其實你唔搵我，我都有嘢想同你講，你聽朝得唔得閒，我哋喺hall can傾一傾。」
他有事跟我說? 是關於甚麼的? 也是跟小惠有關嗎?
「好......」
「咁聽朝9點見啦。」