《唔係啩！真係有個老婆教我追女仔！》: 第十八章
八時五十五分，我來到飯堂，看見Roy已經到了，並獨自的吃早餐。
「早晨。」
「早晨，坐吖。」他示意我坐下。
我坐在他對面，急不及待的問﹕「小惠佢......」
他截住了我﹕「我噚日追返佢之後，發現佢喊緊......」
然後，他就告訴我昨天發生了甚麼事......
「小惠！小惠！你去邊呀? 」我在她跑到小矮人屋之前，終於追到她了。
她拼命用手抹臉，頃刻，她轉過身笑道﹕「我無事呀。」
我見她雙目通紅，臉上猶帶有淚痕，很明顯剛剛哭過了。
「你...真係無事? 」
「真係無事呀。」
剛才去hall can之前還好好的，怎麼突然就哭了? 是因為看見Sam和Fiona......?
這時候Roy問我﹕「你同Fiona一齊咗? 」
我點點頭。
Roy點點頭，又繼續說下去。
小惠又道﹕「Roy，你而家得唔得閒呀? 陪我去食啲嘢吖。」
她的樣子又變得很正常了，好像甚麼事也沒有發生，她是在死撐嗎?
「你想食咩? 」
她笑道﹕「甜品。」
然後她就招了的士，將我拉了去九龍城。
我們隨便走進一間甜品店，然後小惠點了一桌子的甜品。
我笑問﹕「你食得哂啦? 」
小惠對我眨了眨眼睛﹕「有你呀嘛。」然後就一口一口的吃著甜品。
直覺告訴我她是因為看見Sam和Fiona才會變成這樣的，而且她剛才明明哭過了。
我試探道﹕「頭先我好似見到Sam拖住Fiona隻手喎，佢哋拍拖呀? 」
小惠聞言停了一下，然後又若無其事的繼續吃甜品﹕「我都見到呀，我估係啩。我表哥佢追咗Fiona咁耐，終於都比佢追到啦，真係恭喜佢！」
Roy說到這裏，對我說﹕「唔知點解，我覺得佢係真心恭喜你。」
小惠她...她......
我跟小惠吃完了甜品，就打算送她回宿舍。
「Roy，你聽日得唔得閒呀? 」
「嗯? 得呀。」
「你可唔可以陪吓我。」
「好呀，去邊? 」
「嗯......我都唔知呀，諗住四周圍行吓。」
「好呀，咁約定聽日啦，我今晚諗吓去邊，而家我送你返宿舍先啦。」
她搖搖頭﹕「我唔返去啦，我返屋企。」
「哦，好呀，你住邊，我送你呀。」
她微笑道﹕「唔駛啦，我坐的士返去得啦，你走先啦，我哋聽日見啦。」
屋企? 小惠那來的屋企? 她除了宿舍，還有棲身的地方嗎?
Roy已經說完了，他直視我的雙眼﹕「乜你唔覺得，小惠佢係鍾意你咩? 」
我給嚇了一跳﹕「吓? ！」
「乜你唔知咩? 你唔覺佢平時望住你嗰個眼神係唔同嘅咩? 」
知道我是知道的，但我......
「我唔知你係點諗，亦無興趣知道，我只係唔想你令到小惠唔開心。」
我.......我.......小惠............
是我令小惠不開心，是我............
我定睛的看著Roy﹕「Roy，你老實講，你係咪一個好人? 」文中的『小惠』說『Roy』不是好人，確是令我對他有一點戒心。
Roy吸了一口氣﹕「以前，我的確唔係，但我識到小惠之後......」
看著他的眼神，我知道他沒有說謊，所以我沒有讓他說下去。
我狠下了決心，道﹕「得喇，你等一等，我上房攞啲嘢。」
我衝上房間，拿了準備送給小惠的生日禮物，然後回去飯堂。
「嗄......呢個，你送比小惠啦.......」我將一個盒子遞給Roy。
Roy接過盒子，有點不明所以﹕「呢個係? ......」他打開一看，是一枚手錶。
其實這枚手錶，就是小惠在青衣城看上的那一枚，本來想託Fiona幫我送的，但看來現在交給Roy比較適合。
「生日禮物，小惠佢今日生日。」
「咁你比隻錶我......」
「當係你送㗎啦，佢會鍾意。仲有你今日帶佢去海洋公園啦，佢好鍾意玩機動遊戲，但係佢畏高喎，你唔好帶佢坐纜車。仲有佢最鍾意食榴槤做嘅甜品，希望你都鍾意食啦。」這些我都是從故事中得知的。
Roy表情複雜的看著我﹕「你...想我......」
我點點頭﹕「你鍾意小惠呀嘛，你會對佢好，係咪? 」
Roy點頭﹕「我會，唔該你。」
我癱軟在椅子上，長長呼出一口氣﹕「你約咗小惠幾點呀? 走啦，早啲去搵佢啦。」
Roy站起來，離開之前又看了我一眼，然後就走了。
看著Roy的背影，我的心像被掏空了，那種撕心裂肺的痛，比起讓Gary約會Fiona更甚。
我站起來想要回房，但發現視線有點模糊，眼前就像矇了一層水膜，阻擋住我的前路。
我這才發現，小惠在我心目中的份量，比我以為的重得多。
我跌跌撞撞的回到房中，抱膝坐在床上。
我到底有沒有做錯? 若然小惠真的是我未來老婆，她回來是幫我追Fiona，現在我已經成功了，那她是否就要回到未來? 但若然她是騙我的，那她為甚麼喜歡我，但又幫我追Fiona? 我現在將Roy推給她，她會不會接受?
想起剛才我拜託Roy的事，我的心又隱隱作痛。
為甚麼我的心在抽搐著? 我就這麼喜歡小惠麽? 但我明明是喜歡Fiona的......
我去洗了一把臉，然後打電話給Fiona。
我盡量將聲線變得溫柔一點﹕「喂，起身未呀? 我好掛住你呀！」
「嘻，起咗啦，冤氣鬼。」
「我...我好想見你呀，不如去又一城食早餐吖。」
「好呀，一陣見啦。」
我在遠處已經看到Fiona在麥當勞門口等待著我，我馬上跑過去將她緊緊擁入懷裏。
「我好掛住你呀！我好掛住你呀！」我雙手用力的擁著她，想把她溶入我的身體裏。
「喂呀！好多人望住啦！」她的聲音，有點害羞。
我放開了手，凝視著她，然後朝她的唇上重重的吻了一下。
唇分後，Fiona紅著臉嗔道﹕「做咩無端端錫人喎！呢度大庭廣眾嚟㗎！」
「我好鍾意你！我好鍾意你！」我重覆的呢喃著，像是怕自己忘記了。
Fiona甜笑道﹕「知啦，你今日做咩呀? 咁癡纏嘅? 」她拉著我進入了餐廳。
「你唔鍾意聽咩? 」
她白了我一眼﹕「係啦，鍾意啦，快啲去買嘢食啦。」
「知道。」
跟Fiona吃完早餐，又卿卿我我了好一會兒，我才捨得送她回家。
由於我今天都要到不同的地方補習，所以只能約她晚上吃飯。
或許這是好事，工作麻痺了思想，一整天我都沒有再想起任何有關小惠的事。
晚上，終於又回到九龍塘了，我在約定的地方見到Fiona和Gary。
我馬上牽著Fiona的手，對Gary說﹕「真係辛苦哂你呀Gary，幫我陪Fiona去聽管弦樂，我真係對呢啲嘢無乜興趣，如果要我陪佢嘅話，我肯定瞓著！」
Fiona拍了我一下﹕「興趣可以培養嘛，你下次一定要同我去呀！」
我親了她的臉頰一下﹕「係！知道啦女朋友大人！」
哼！Gary，雖然我讓Fiona跟你去聽甚麼管弦樂，但你可別想再有甚麼進一步發展！
我得意洋洋的看著Gary，他則臉色鐵青的瞪著我。
我刻意道﹕「我哋而家去撐枱腳喎，你一唔一齊呀? 」
Gary像是強忍心中的怒火﹕「唔...唔駛啦，費事阻住你哋啦。」
這個時候，Fiona的說話中斷了我倆的唇槍舌劍。
Fiona指著一個方向﹕「喂，你哋睇吓，嗰邊嗰兩個咪係小惠同呀Roy? 」
我朝她所指的方向望去，赫然見到小惠和Roy就站在不遠處，Roy的樣子很認真，像是要對小惠說些甚麼要緊的事。
Gary﹕「咦係喎，佢哋講緊咩呢? 我未見過呀Roy個樣咁認真喎。」
我的心臟劇烈的跳動了一下，像是猜到將會發生甚麼事。
Roy拿出了我給他的那件禮物，送給了小惠，看他的口形應該是說「生日快樂」吧。
小惠接過盒子，打開一看，她有點難以至信的掩著嘴巴，看了看手錶，又看了看Roy，然後說了一句話。
Roy回覆了小惠，然後他執著小惠的雙手，向她說了一段話。
Roy是向小惠表白嗎? 他是向小惠表白嗎?
我心跳加速，不期然踏前了半步，想聽到小惠要如何回答。
小惠緊抿著唇，像是很為難的樣子，她看著Roy，想說甚麼卻說不出口。Roy這時候說了一段話，小惠聽到後呆了呆，然後閉上了雙眼，像是思考著甚麼。
就在小惠閉著眼的時候，Roy慢慢湊過去想要去吻她！
小惠她答允了嗎? 她不是我的老婆嗎? 怎麼會接受別的男人?
我忍不住又踏前了一步﹕「小惠......」
手上馬上傳來一股拉力，我這才醒悟到正牽著Fiona。
縱然我的聲線不是很大，Roy和小惠還是聽到了，Roy停下了動作，小惠則驀然驚醒過來，他倆同時看過來。
小惠看見是我，馬上甩開了被Roy握著的手，口中喃喃自語，她是喚著我的名字嗎?
我的目光跟小惠的雙眸接上，剎那間時間停頓了，整個宇宙混沌一片，只剩下我和她。
小惠眼中像是有千言萬語要對我細訴，但卻像我一樣，甚麼都說不出口。
Fiona的聲音打破了我們的沉默﹕「Hi！又會咁啱嘅，我哋趕時間走先啦，你哋繼續啦。」然後輕輕拉我的手，輕聲道﹕「我哋唔好阻住佢哋啦，走囉。」
小惠好像終於發現了Fiona的存在，她嬌軀一顫，看了看我又看了看Fiona，然後別過臉去，牽著Roy的手，對他說了些甚麼。
這是我最後看到的一個影像，因為我已經被Fiona拉走了。
Gary笑道﹕「睇嚟呀Roy成功咗喎，我見小惠最後都拖住呀Roy隻手呀。呀Sam，呵~」最後他卻意有所指的對我說。
我有點心煩意亂，但Fiona就在身旁我也不能表示甚麼，於是我只是敷衍的回應﹕「係...係囉呵......」
跟Gary分別過後，我就跟Fiona兩個人去吃飯，不過整頓飯我都有點心不在焉，只是有一搭沒一搭的跟Fiona聊天。
我牽著Fiona，正在送她回家的路上。
「Sam，你做咩成晚都喺度發吽竇呀? 」
「吓? ......無...無呀......有咩? 」
「你呀，頭先又唔講嘢，問你嘢呢，一係就聽唔到，一係就答非所問。」
「哦.....係...係咩? 可能我補咗成日習，有啲攰啩......」
Fiona停下來，看著我﹕「嗯......你諗緊小惠? 」
我嚇了一跳，怕被她看穿了甚麼，連忙道﹕「唔...唔係呀......」
她卻自顧自的說下去﹕「其實我都諗緊佢哋兩個，頭先Roy佢應該係同小惠表白啦，唔知小惠有無接受呢? 」她頓了頓，又道﹕「你呀，頭先做咩出聲呀！我見Roy差啲錫落去啦，搞到我幾緊張呀。」
Fiona一臉責怪的樣子，她大概沒有看穿我在想甚麼吧。
我順著她的口氣道﹕「咁...咁我頭先都好緊張嘛......咁...咁咪唔小心出咗聲囉。咁話哂佢都係我表妹，我都擔心佢同咩人拍拖嘛。」
Fiona牽著我又繼續走，她若有所思道﹕「表妹呀......係呢，Sam，你細細個就同小惠一齊玩啦? 」
我有點心虛﹕「係...係呀......」我又補了一句﹕「咁佢呀爸，即係我舅父，佢都有同我交帶過要幫佢照顧小惠，所以我頭先緊張過你呀。」
「嘻...講到你好似係小惠爹地咁，佢識男朋友都要問過你呀? 」
我裝神氣﹕「咁緊係啦！」然後開了一個玩笑﹕「而家應該要問埋你添呀！」
Fiona雙頰緋紅，嗔道﹕「咩呀！又關我事? 」
送了Fiona回家，我獨自走在回宿舍的路上。
剛才連Fiona也看出了我的不妥，她會不會連我心底在想甚麼...也知道了?
唉......其實連我自己都不清楚自己的想法......Fiona，我是一直喜歡的，到現在我也沒有改變過對她的心意，Gary要來搶走她的話，我會毫不猶豫的將他擊退。但小惠......我是嫌她有點煩，有時候又很囉哩囉唆，但...她一心一意的來幫我，而且...跟她吵吵駡駡的這段日子，可以說是我這輩子來最快樂的時光。
難道......我變成了我從前最討厭的那些賤人? 得一想二? 坐這山，望那山? 手裏拿著一個，嘴裏吃著另一個，眼睛還要瞄著桌子上的一個? 嗚呀！我不是！我不是這樣的！我喜歡Fiona！我想令她快樂！但我也喜歡小惠！我也不想令她傷心啊！
我迷迷糊糊的回到宿舍，然後迷迷糊糊的睡著了，翌日起來，小惠還是不在，看來她昨晚也沒有回來。她又「回家」了嗎? 到底她在哪裏留宿?
今天我還是要去不同的地方補習，本來想跟Fiona在晚上約會的，不過她說有約，那我只好回家吃飯了。
吃完了飯回宿舍，在途中我又忍不住思考我跟小惠和Fiona的事情，直想得我頭昏腦脹。
「唉哎！」正當我想得萬分苦惱時，我不小心碰到了別人。
「Sor...sorry呀，你無事嘛? 」我扶起了跌倒在地的女生。
「Sorry......咦? Sam? 」我碰跌的，原來是Jodi。
「做咩你個樣咁苦惱呀? 」Jodi問我。
我回她一句﹕「你夠嗱口嗱面咯。」
「係咩? 唔係呀。」Jodi抹了一下臉，然後問﹕「諗咩呀? 諗到行路唔帶眼? 」
「無...無乜嘢呀......」我怎麼能將我的苦惱說出口......
「真係? 」Jodi用銳利的眼神盯著我，然後突然拍了我一下﹕「喂！恭喜你喎！你終於追到Fiona啦！」
「你又知? 」是誰告訴她的? 小惠? Mandy?
「我啱啱喺街撞到Fiona同小惠呀，跟住同佢哋傾偈嗰陣咪知囉。」
Fiona和小惠? 她們是碰巧還是約好了的? Fiona是因為約了小惠所以沒空嗎?
我有點急燥﹕「佢哋講咗啲咩呀? 」
「冷靜啲，你咁緊張做咩? 」
「係...係咩? 無呀......」我深呼吸一下冷靜下來，道﹕「我哋坐低先講啦。」
我們坐在飯堂外的椅子，Jodi開始敍述剛才的事。
咦? 在那邊coffee shop聊天的，不正是小惠和Fiona嗎?
我走進咖啡店裏，向她們打招呼。
「Hi，又會咁啱嘅? 你哋一齊行街呀? 」
她倆看見了我也有點愕然，但瞬間Fiona就笑容滿面的向我打招呼﹕「Hello！又會咁啱嘅，過嚟一齊坐呀。」
我坐下後，問道﹕「你哋行完街呀? 」
Fiona﹕「係呀，本來諗住去食飯嘅，但周圍都好多人，咪諗住喺度食件蛋糕飲杯咖啡算囉。」
小惠她今天怎麼了，鬱鬱寡歡又有點沉默寡言，她平時都是最多說話的那一個的。
「小惠，你唔舒服呀? 」
「唔...唔係呀......我無事呀......」
「嗯? 但你平時好多嘢講㗎，點解而家粒聲唔出嘅? 」
「可...可能係行街行得有啲攰啩......」
Fiona俏皮的笑道﹕「我就話唔係喇，我諗小惠掛住緊某個人。」
小惠有點慌張﹕「邊...邊係喎......」
Fiona她是甚麼意思? 她指小惠正在想念的，是我? 還是Roy?
「咁跟住呢? 」
Jodi看了我一眼﹕「咁我咪問Fiona小惠掛住緊邊個囉。」
Fiona笑了笑，向小惠噘噘嘴﹕「你自己問佢啦。」
我以眼神詢問小惠，小惠接觸到我的目光馬上迴避，並慌張道﹕「無呀！我無掛住邊個呀！」
Fiona道﹕「無? 我噚日同呀Sam見到呀Roy好似同你表白喎，你最後仲拖住佢隻手添！」
「原來真係呀Roy......係呢，Fiona，呀Roy噚日點同小惠表白㗎? 」
Fiona微笑道﹕「你自己問返當事人啦，我嗰陣企得遠，都聽唔到佢哋講咩。」
小惠繼續矢口否認﹕「無呀無呀！我哋無一齊呀！」
Fiona蠱惑的指著她戴著的手錶，笑道﹕「仲話無? 呢隻明明就係噚日呀Roy送比你嗰隻錶，你連定情信物都收咗，咁都仲唔認? 」
小惠馬上慌張的想遮掩著手腕，不過給眼明手快的我早一步抓著﹕「睇吓......係幾襯小惠喎，呢個呀Roy啲taste都唔錯。」
小惠有點語窒﹕「我...我同佢......唔...唔係......」
我聽到這裏，不禁問道﹕「佢話唔係? 」
小惠她接受了Roy的禮物，還已經戴上了，這是不是代表她接受了Roy? 但她為甚麼要否認跟Roy的關係呢? 還是只是因為臉嫩?
「係呀，佢係咁答。」然後Jodi流露出一個很複雜的表情，也不知她在想甚麼。
Jodi又繼續她的敍述。
我又轉過頭問Fiona﹕「係呢，咁你呢? 你同呀Sam又點呀? 」
Fiona刷地耳根發紅﹕「我...我哋一齊咗啦......」
我訝道﹕「一齊咗? 幾時嘅事呀? 」
「都差唔多一個月啦。」
我笑道﹕「成個月喇? 估唔到你兩個都收得幾埋喎。」
Fiona﹕「咁我哋又唔係話專登唔比人知，只係無咁張揚啫......你又知我同佢啲嘢嘅? 」
「呀Sam晨早就講咗我知要追你啦，仲叫我幫佢添！小惠都知㗎！」
Fiona有點訝異﹕「小惠你都知? 」
小惠點了點頭。
Fiona沒有再說話，好像思考著甚麼似的。
「無喇? 」
「跟住講嗰啲係女人嘢喎，同你無關係。」
Fiona和小惠，在Jodi出現之前有沒有說過甚麼呢? 不過看樣子應該是Jodi出現後才開始說感情事。但她們為甚麼今天會約好呢? 純粹逛街? 還是......
「喂！你知唔知小惠點解好似唔開心咁? 」
她不快樂，是因為我和Fiona嗎?
「吓? 我......我唔知呀......」
Jodi直視我的雙眼質疑我﹕「你真係唔知? 」
這個時候我的電話響起來了。
「咦，Fiona打比你喎。」
「吓? 哦。 」還好Fiona剛好找我，不然我也不知道怎樣回答Jodi。
「喂? Sam，我返到屋企啦，你而家喺邊呀? 」
「我...我啱啱行到返hall。」
「你掛唔掛住我呀? 」Fiona的聲音甜得滴出蜜來。
我瞄了瞄Jodi，實在有點不好意思在她面前說這個「掛」字。
「嗯? 」Fiona在催促我了。
「掛......」我只好掩著嘴輕聲道。
不料Jodi還是聽到了，她「噗」的一聲笑了出來，然後用食指輕輕摑著臉頰取笑我。
「嗯，算你啦。我今日同咗小惠行街呀。」
Jodi向我揮手道別，然後逕自的回房去了。
「哦，係呀。係呢，小惠同呀Roy係咪開始咗啦。」
Fiona笑道﹕「做咩呀? 你都咁八嘅? 」
「咁...咁小惠係我表妹嘛，咁我八吓都好正常啫。」
「咁又係。但佢無認到呀，但又戴住Roy送比佢隻錶喎，我諗佢怕醜啫。」
嗯......我也想不明白。
我回到房間，小惠還是不在，她不打算回來了嗎?
我洗完澡後，有點坐立不安，在房中踱步。
總覺得好像有甚麼事情沒有做的，到底是甚麼呢?
我看了看鐘，現在是十時四十分。
對了！小惠每天晚上都是這個時間給我電話的，現在沒有收到她的電話，弄得我站也不是，坐也不是。
我陡然醒起，我是不是中了小惠的「心錨」? 從我每晚定時找Fiona開始，小惠也是在差不多時間找我的，這兩個多月來從沒間斷過。
我猛搔頭皮，沒想到現在輪到我中招了，我現在倒十分清楚Fiona那晚找不到我的感受。
Damn！小惠為甚麼要這樣做? 她要我想念她嗎? 好吧！你成功了！快點讓我找到你吧！
我忍不住打電話給小惠，但卻沒人接聽。
夠了！盧家惠你別再耍我了！快點聽電話吧！
差不多每隔一小時就撥她的電話一次，又whatsapp了她好幾次，但還是沒有任何回覆。
我瞪著眼看著天花板，差不多到了凌晨四時才昏昏睡去。