《唔係啩！真係有個老婆教我追女仔！》: 第二十五章
當我下課後再回到小惠的家，發現剛才貼的大字已經給撕掉了。
我不知道是給小惠還是其他人撕掉，反正我已經回來，所以都沒所謂了。
還好現在是春末初夏，氣溫不太熱也不太冷，坐在街頭也不算太難受。
等著等著，天色漸黑，小惠的家也亮起了燈，我的肚子開始有點餓了。
其實小惠她知道我在等她嗎? 怎麼她還能忍心不出來見我? 算了，不管了，就算她現在不知道，我一直等下去她總有一天會知道的。
就在我猶豫著要不要先去買點吃的，我聽到樂言的聲音。
「喂，知你一定仲等緊，拎咗嘢比你食呀。」他手上提著一個外賣飯盒。
「Thank you so much！」我忍不住吻了他的臉頰一下。
他推開了我，拿出紙巾一邊抹臉，一邊駡道﹕「屌！死開啦！我唔係小惠呀！」
我坐在路邊打開飯盒狼吞虎嚥起來，樂言坐在我旁邊問道﹕「喂！你諗住等到幾時呀? 」
我口中含飯，模糊道﹕「等到佢肯見我為止。」
樂言點點頭，沒有再說甚麼，然後拍一拍我肩膊，道﹕「祝你好運啦。」他站起來，又道﹕「我今晚返屋企呀。星期日晚先返嚟，你小心啲啦。」
我揚手示意沒有問題，他就離去了。
吃飽了飯，又呆等到晚上十一時左右，我正不斷搔著被蚊子叮咬的癢處。
他媽的！早知就先去買蚊怕水或是蚊貼甚麼的，現在這麼晚了超級市場已經打烊了吧。
我一邊搔癢一邊碎碎念，卻感到一滴一滴的水點打在臉上。
我抬頭望天，不禁又駡了一句髒話。
『屌！唔撚係呀? 而家先嚟落雨? 唔通連個天都唔鍾意我? 』
雨點由毛毛細雨逐漸變得如紅豆般大，我再多站一會的話怕會全身濕透了。
怎麼辦? 要回去嗎? ......不行！不能就這樣放棄的！
我想了想，馬上跑到附近的超級市場，果然給我找到了給丟棄了的紙箱。
我拿了幾個回去，一個蓋著自己，另外的墊坐著，繼續等下去。
又等了一個小時左右，老天爺好像無視我的苦況，雨好像下得比剛才更兇，現在的我跟全身濕透已經沒有多大分別了。
我感到電話在震動，拿出一看，是樂言發來的訊息﹕「喂而家黃雨喎，你仲等緊呀? 你嗰邊無落雨咩? 」
Fuck！怪不得像是要水浸的樣子，老天你還真會選日子啊！
我簡單的回了樂言﹕「我ok」然後又低下頭默默的等下去。
過了一會，我好像感到雨有點變小了，暗喜的我抬頭看了看，發現一個暗黑的身影正撐著傘替我擋雨。
是小惠嗎? 她終於給我感動了！
我正想開口叫她，「她」卻已經跟我說話﹕「你返去啦，小惠唔會嚟見你㗎。」
吓? 男人來的?
我藉著昏黃的街燈再看清楚，高挺的身形配著英俊的臉容，卻不是Brian是誰?
我連忙站起來道﹕「我...我一定會等到小惠出嚟㗎！」
Brian搖了搖頭，似是嘲笑我的愚不可及。他將手上的另一把傘給了我，然後就回去了。
我...不會放棄的......
我撐起了傘，又重新等著，有了雨傘的幫助，打在我身上的雨是少了很多，但對於已經濕透的我，也沒有甚麼分別。
我就在雨點聲中，挨著牆矇矓的睡去，直至一連串的狗吠聲將我弄醒。
「汪！汪汪！嗚......！」一頭老虎狗對著我呲牙裂齒的吠叫，像是我搶了牠的骨頭似的。
「No！ No！」一個外傭拼命拉著老虎狗不讓牠衝過來，好不容易才拉走了牠。
我站起來伸了個懶腰，骨頭格格作響的，睡在街頭還真不好受。
今天是星期六，我可以等一整天，今天小惠會出來見我吧?
正當我滿懷希望的坐下時，有手拍一拍我。
我回頭一看，卻是兩個軍裝警員。
警員A問我﹕「先生，你喺度做咩呀? 」
我瞬間語窒﹕「我...我喺度等人......」
警員A打量著渾身濕透的我，疑惑道﹕「等人? 」
我忙不迭的點頭﹕「係呀！」我指了指小惠的家﹕「佢住呢度㗎！」
警員B問﹕「咁佢係你邊個呀? 」
小惠是我的甚麼人? 這還真不好回答。是老婆? 表妹? 同學? 好像甚麼也不是。
警員B見我答不上來，直接道﹕「先生，身份證呀唔該。」
我唯有將身份證給了他，他就閃到一旁跟對講機通話。
警員A以戒備的眼神盯著我，我只好道﹕「呀sir，我真係等緊人呀！佢...佢係我朋友嚟㗎！我同佢都係浸會大學學生，嗱，呢張係我學生證。」我又將學生證遞給他。
警員A反覆看了幾遍，等到警員B向他搖了搖頭示意，他才將身份證和學生證一起還給我。
警員A道﹕「我哋收到報案話有可疑人物喺度徘徊咗成晚，如果你真係搵人嘅就打比人啦，唔好喺度等喇。」
有人報案? 是小惠嗎? 她可真狠心啊！
我又望了望小惠的家，警員B已經不耐煩﹕「走喇！唔好留喺度喇！再有人報警我哋就要塔你返差館喇。」
無奈的我，只好兩步一回頭的回去宿舍。
回到宿舍洗了個澡，我呆坐在床上。
怎辦好呢? 電話她又不接，在她家門外等她她又報警......
Jodi有找到她嗎? 問問她吧。
「Jodi，你有無搵到小惠呀? 」
「搵就搵到，但係佢唔肯同我出街喎。」
情況跟Roy一樣......
她反問我﹕「咁你呢? 」
我嘆了一口氣﹕「佢連我電話都唔肯聽，咁我噚日開始咪喺佢屋企外面等佢囉，我淋咗成晚雨佢都無理到我，今朝仲報警等差人趕走我，我想等都等唔到呀......」
Jodi大駡﹕「死蠢！無人叫你擺明車馬等佢㗎！你偷偷哋匿埋一二邊等佢出嚟再跟蹤佢得唔得啫！」
Damn！愛情真的會令人變蠢的！這麽簡單的事我怎麼想不到！
「唔該你！我即刻再去！」
「喂喂喂！你等埋我一齊去喇，我費事你個人頭豬腦又搞禍件事。」
就是這樣，半小時後，我們又重新出現在小惠的家附近。
在一個轉角窺看了一會兒，Jodi打了一個呵欠﹕「喂我肚餓呀，我去買啲嘢食，有咩發現打比我啦。」然後她就離開了。
我繼續等著，正當有點納悶Jodi去了這麽久還不回來時，我看到小惠家的鐵閘打開了。
我的心臟怦然跳動了一下，然後身子向牆後一縮，只將窺看用的小鏡子伸出去。
會是小惠嗎? 求求你，一定要是小惠啊！
一塊俏臉從鐵閘旁探頭探腦的伸出來，這張讓我魂牽夢繫的臉龐，正是小惠沒錯！
只見她左望望，右望望，好像在確定我真的不在，才小心奕奕的踏出家門。
要現在跑過去逮住她嗎? 但她轉身就能逃回家中，要再次找到機會可不容易，還是先觀望一下吧。
我馬上致電Jodi召喚她回來，然後又繼續金睛火眼的盯著小惠。
她一直站在鐵閘旁並不離開，又不時看錶的，她到底在幹甚麼? 在等人嗎?
五分鐘之後，我終於知道答案了，一輛的士駛到她面前，然後她就上了車。
仆街鳥！我沒想到她才踏出家門就會乘的士，那我還怎麼跟蹤她? 附近有沒有的士? 的士......
我左顧右盼，這裏連人也不多，何況是的士......
嗚呀！難得等到小惠走出來，卻眼白白看著她乘車離開，我不甘心啊！
「喂！你踎喺度做咩呀? 」嗯? 是Jodi的聲音?
我抬頭一看，竟發然她坐在一輛的士裏。
正好小惠乘的那輛的士轉彎駛出大路，我連忙跳上車並指著前面吩咐司機﹕「追！追前面架的士！快！」
我向好整以暇的Jodi問道﹕「你又會坐喺架的士上面嘅? 你點知小惠會坐車㗎? 」
Jodi懶洋洋道﹕「小惠係千金小姐喎，出街點會行路呀? 就算唔坐私家車都會搭的士啦。」
......又是這麼簡單的道理我竟然想不到...嗚............
Jodi安慰我﹕「唔駛咁灰喎，係我特別醒啫，唔關你事。」
的士來到了德福廣場的停車場落客區，我們待小惠下車走了一段路後，才悄悄的離遠尾隨她。
還好假日的德福廣場遊人如鯽，我們根本不怕被她發現。
只見她走進一間咖啡店，跟另外三個少女在聊天。
「咦? 嗰啲係小惠啲朋友呀? 全部都幾靚女喎。」
我看了Jodi一眼，沒想到她跟我有同一個感想。
Jodi視線沒有離開她們，卻道﹕「望咩啫? 愛美之心人皆有之。」
我繼續留意小惠和她的朋友們，最初只見小惠說話，除了左手邊的一個女生經常插嘴外，另外兩個都默默的聆聽。不久之後，小惠好像說完了，然後那三個女生則輪著發言，不過說話最多的，還是左邊的女生。
她們在說些甚麼呢? 小惠好像跟她們討甚麼意見似的。
我用手肘碰一碰Jodi﹕「喂，你哋啲女仔平時會傾啲咩㗎? 」
「唔定㗎，可以係明星，可以係電視劇，我哋連m巾都會講一大餐嘅。不過我睇小惠呢，應該係講緊感情事。」
感情事? 那不正是說我嗎?
當我觀察得眼睛有點亁澀，腰骨有點酸痛時，她們終於結束了對話，小惠正收拾東西準備離開。
只見小惠跟她的朋友道別，然後就撇下她的朋友獨自離開了咖啡店。
我馬上想繼續尾隨小惠，但Jodi卻拉住了我。
我急道﹕「喂！做咩拉住我呀? 小惠走咗去喇！」
Jodi懶洋洋道﹕「小惠呢，你幾時都可以再跟蹤佢。你而家繼續跟上去又點先? 過去捉住佢叫佢聽你講嘢? 你知唔知點解佢唔肯見你吖? 」
我愕然﹕「乜...乜唔係因為我同Fiona拍拖，但係又鍾意佢咩? 」
「呢個當然係其中一個原因啦，但我直覺覺得唔止咁簡單囉。」
「咁...咁係咩呀? 」
Jodi白了我一眼﹕「我點知啫！」她續道﹕「你連衰啲咩都唔知你諗住同佢講咩? 大庭廣眾拉拉扯扯，佢可能嗌非禮添呀。」
Jodi好像說得很有道理，但......
我看著逐漸離去的小惠急道﹕「咁...咁我哋而家應該要做啲咩呀? 」
Jodi得意洋洋的笑道﹕「我哋而家，緊係去搵『幫手』啦。」
「幫手」? 那來的幫手?
Jodi拉著我走進咖啡店，然後向小惠的那三個朋友走過去。
Jodi向她們打招呼﹕「Hi，你哋好呀。」
她們三人同時停止了對話，並疑惑的看著我們。
左手邊那個有著及肩黑髮的女生道﹕「你哋係......? 」
Jodi道﹕「我叫Jodi，佢係Samuel，我哋係小惠大學嘅朋友。」Jodi已經拉著我在她們對面坐下。
右手邊咖啡色長曲髮的少女問道﹕「你哋搵小惠? 小惠啱啱走咗喎。」
Jodi道﹕「我知呀，我哋啱啱都見到小惠走咗，不過我哋係專登搵你哋嘅。係呢，你哋叫咩名呀? 」
可能因為Jodi也是漂亮女生的原故，她們也沒有甚麼戒心，左邊的女生道﹕「我叫做Bonny。」
她指了指咖啡色長曲髮少女﹕「佢係呀Wing。」
呀Wing跟我們打了聲招呼。
然後Bonny又指著中間的黑長髮劉海少女﹕「呢位係晴晴。」
卻說晴晴定睛的看著我，似是沒有留意Bonny正在介紹她。
這個女生幹甚麼? 才第一次見面就老看著別人，令人好不尷尬啊......
Bonny碰一碰晴晴﹕「喂，晴晴，介紹緊你呀。」
晴晴沒有理會Bonny，自言自語道﹕「又會咁似嘅? ......」接著她湊近呀Wing跟她耳語，呀Wing聞言後也是打量著我，好像我是甚麼怪物似的。
Bonny問出了我心中的疑惑﹕「喂，你哋做咩呀? 」
晴晴也跟Bonny耳語，Bonny聞言後看了我兩眼，然後道﹕「鬼記得咩！幾年前嘅事，佢又唔係特別靚仔！」
誒? 她們在討論甚麽? 是說我嗎?
我望向Jodi，她也是一臉茫然。
這時候晴晴問呀Wing﹕「你覺得呢? 」
呀Wing一邊打量著我，一邊道﹕「係有啲似，不過我唔肯定，晴晴你記唔記得叫咩名呀? 」
晴晴想了想，搖搖頭道﹕「個名唔記得......不過......」她轉而問我﹕「你中學嗰陣係咪學校嘅足球校隊呀? 」
我有點愕然﹕「吓? ...係玩過幾年啦......」
她又道﹕「你係守龍門嘅！」
咦? 她怎麼會知道的?
我點點頭。
晴晴的樣子似是解決了甚麼疑難似的，她又問Jodi﹕「你頭先話，你哋係小惠大學嘅朋友? 」
Jodi點點頭。
晴晴跟呀Wing互望了一眼，彼此均露出了恍然大悟的神色，而我和Jodi則一頭霧水。
晴晴問Bonny﹕「喂，咁你而家知道小惠係講緊邊個啦。」
Bonny鄙夷的瞅了我一眼﹕「唓！原來仲係同一個人，等我以為小惠去過美國啲taste會變好啲添！」
她突然變臉，兇巴巴的恐嚇我﹕「原來就係你令到小惠唔開心！我話比你知呀，我練開泰拳㗎！閒閒哋兩三個男人都唔夠我打呀！」
我嚇了一跳，不由自主的連聲道歉﹕「Sor...sorry呀......我都唔想㗎......」
晴晴抿嘴笑道﹕「Bonny你咪嚇佢啦，睇嚟佢哋係有事先會嚟搵我哋。」然後望向我和Jodi。
Jodi點頭道﹕「係呀，我就係為咗小惠同呢條麻煩友先嚟搵你哋㗎。」她指著我。
呀Wing雙手交疊胸前睥睨著我﹕「你而家真係鍾意小惠? 」
我點頭如搗蒜。
她又問﹕「咁之前嗰個女仔呢? 」
她的意思是Fiona? 呃......Fiona.....要說完全已經不喜歡她，是有點自欺欺人，但...我現在真的很喜歡小惠啊！怎說好呢......
Bonny指著我駡道﹕「啊！你諗！即係對之前嗰個餘情未了啦！」她轉頭對晴晴和呀Wing道﹕「我都同小惠講叫佢放棄啦，佢係都唔聽。呢個男人有乜好喎? 一無是處仲要三心兩意！」
我連忙澄清﹕「我而家係真心鍾意小惠㗎！我...我同之前嗰個女仔已經無哂關係啦.......」說著說著我都覺得有些黯然，大概Fiona這輩子也不會原諒我吧......
Jodi替我說話﹕「其實呢條友呢，應該就係真心嘅。因為佢好狠心咁hurt爆嗰個女仔，先至令到個女仔死心。佢而家已經成為咗校園裏面出哂名嘅賤男。你哋諗吓，佢而家先Year 1但個朵已經臭哂，仲邊會有女仔肯埋身吖。佢咁大犠牲都係為咗小惠咋。」
我驚訝的望著Jodi，她說的話，上半部都是事實，但把我杜撰成出了名的賤男，這未免.......太過份了吧！
Jodi白了我一眼﹕「望咩啫? 反正差唔多成間BU都知啦，多幾個人知有乜所謂喎。」
Bonny幸災樂禍的冷笑﹕「呵~抵死呀！」
晴晴則和呀Wing在耳語，片刻後，晴晴道﹕「雖然我唔明小惠點解鍾意你，但既然佢係因為你先咁唔開心，我諗都只有你先可以幫到小惠。」
呀Wing馬上補充﹕「我哋唔係幫你呀！我哋只係唔想小惠唔開心咋！」
Bonny道﹕「喂！真係幫呢個賤男呀? 」
晴晴道﹕「你都唔想小惠繼續係咁㗎? 」
Bonny默然半响，終於答應﹕「好啦好啦，你哋話點就點啦。」