《唔係啩！真係有個老婆教我追女仔！》: 第二十六章
一星期後，她們幫我約了小惠在同一個地方，而她們則簇擁著小惠令她無處可逃。
Jodi向小惠打招呼﹕「Hello小惠，好耐無見。」我則跟在Jodi身後。
本來小惠看見Jodi是想打招呼的，但她看見了我馬上站起來跟Bonny她們道﹕「我...我走先啦......」
她們三個馬上站起來攔阻住小惠，小惠愕然﹕「你哋......」
呀Wing道﹕「小惠，逃避唔係辦法，你同佢傾吓啦。」
小惠怒視著我﹕「陳洛鋒！你對我啲朋友做過啲咩呀? 點解佢哋會幫你㗎? 」
晴晴安撫她道﹕「小惠，你繼續係咁只會繼續唔開心，我哋唔想你咁呀。」
沒想到兇巴巴的Bonny也幫我說話﹕「小惠，你咪聽吓呢條友有咩同你講，唔啱聽嘅就一巴車過去囉。」
小惠望望Bonny，又望望晴晴和呀Wing，終於道﹕「哼！我就聽吓你有咩講！」
晴晴她們交換了一個眼色，很有默契的夾了Jodi離開。
Jodi喊道﹕「喂喂喂！我留低聽得唔得呀? 」
呀Wing道﹕「你比啲私人空間佢兩個啦。」
她們離開後，我們默然相對，小惠只是面無表情的看著我。
「無嘢講呀? 無嘢講我走喇。」說罷她已經站起來。
我連忙拉住她的手﹕「小惠，唔好走！」
她甩開我的手，覆又坐下，不耐煩道﹕「點呀你? 要講又唔講，仲係咪男人呀? 」
其實我不知道應該說甚麼才能令她留在我身邊，我只好道﹕「小惠，我真係鍾意你。」
小惠不屑道﹕「你之前都話好鍾意Fiona㗎，而家咪又係搞成咁。」
我急道﹕「唔同㗎！今次我知道係唔同㗎！我知道，我心裏面最鍾意嘅人係你呀！」
小惠的神色很猶豫﹕「我點知...你會唔會好似對Fiona咁對我㗎......」
我沉默了一會，然後道﹕「我到而家都唔知點解你要話自己喺未來返嚟，又要認係我老婆，然後幫我追Fiona。但係我知道，我同你一齊住嗰
陣，係我最開心嘅日子；我想每日返到房都見到你，我想日日都可以同你嗌交；我想整蠱你，激嬲你，但係如果搞到你喊，我又會好心痛，想
即刻呵返你；見到你同第二個男仔一齊，我會唔開心；之後我同咗Fiona一齊，我唔想比你知係因為我驚你知道咗會唔開心，而且會離開我，我
唔捨得你，唔想你走......」
我苦笑一下﹕「雖然到最後你都係知道咗......你嗰日走咗去，我先知道你對我係幾咁重要，我竟然出賣Fiona比Gary，等佢可以約Fiona去街，就係為咗攞呀Roy個電話問你有無事......我知道係我令你唔開心，所以我將呀Roy推比你，以為你接受咗佢就可以忘記我，但係我...我又好唔想咁做......之後我見到你同呀Roy一齊，又避開我，你知唔知我...個心係幾痛...........」
小惠聽我說到這裏，突然間掩著臉跑掉了，連手袋也沒有拿。
我愣了愣，到回過神來，她已經突破外面的包圍網逃掉了。
「小惠！小惠！」我跑出去想追她，但她已經掩沒在人海之中，又那裏找得到。
晴晴拉住了我﹕「唔駛追啦，佢眨下眼就唔見咗人，呢度咁大又點搵呢? 」
我焦急的左顧右盼，希望能在人海之中找到小惠的身影。
我的後腦被拍了一下﹕「死蠢！你而家即刻搭的士去小惠屋企門口等佢啦，佢點都要返屋企嘛！」
對啊！還好得Jodi提醒，我馬上跑往的士站。
我聽到Jodi在背後叫喊﹕「喂！等埋我呀！」
我們躲在小惠家附近的一處暗角，已經等候了一個多小時了。
Jodi一直跟晴晴她們whatsapp交換情報，她喜道﹕「喂喂，呀Wing話搵到小惠啦！佢哋而家夾緊佢返嚟呀！應該差唔多到啦！我會叫佢哋落車後拖延時間，你自己把握機會捉住小惠啦！」
說時遲，那時快，一輛的士正緩緩駛近，我金睛火眼的盯著，這一次絕不會讓小惠離我而去的！
的士已經停下，車門打開，首先下車的是Bonny，晴晴，然後是沒精打采的小惠，最後是呀Wing。
Bonny下車後東張西望，看來是想找到我們，晴晴跟呀Wing則伴著小惠，慢慢的走回家。
我知道再遲一刻小惠就會回到家裏，於是我以最快的速度跑過去。
小惠看見了我吃了一驚，並想逃回家中，但卻被晴晴和呀Wing抓住。
我在小惠掙扎時已經將她一擁入懷，在她耳邊道﹕「小惠，我唔會再比你走！我唔理你喺邊度嚟，又點解知道我咁多嘢，我只要你喺我身邊！盧家惠，我鍾意你！我好鍾意你！」
漸漸地，我感到小惠環抱著我，在我的懷裏飲泣﹕「呀鋒......我...我......我唔可以......唔可以同你一齊...嗚......我覺得自己好衰......係我令到你同Fiona散......嗚...我試過搵Fiona想同佢道歉...但係...但係佢都唔肯聽我電話......嗚......我覺得對Fiona唔住......我每一次見到你...我就會諗起Fiona喊緊嗰個樣......我就會覺得好內疚......」
我聞言想起了Fiona，心中也是一痛。
小惠趁我愣住的一刻掙脫了我的懷抱﹕「呀鋒...我哋就咁算啦...好唔好......我真係好辛苦呀......」然後她轉身慢慢走向家門。
我喊停了她﹕「小惠！」
「如果...如果Fiona唔再嬲我，又同你和好如初，你係咪會同我一齊呀? 」
小惠停下腳步，但又搖頭道﹕「Fiona佢今次咁傷心，佢一定唔會原諒我哋㗎......」
我呆呆的目送小惠打開鐵閘，又關上了門，直到Jodi叫喚我才醒過來。
「喂！你哋講咗啲咩呀? 做咩比小惠返入去㗎? 至衰都係晴晴佢哋啦，拉走我唔比我喺側邊聽......」
我沒有理會Jodi，向Bonny她們道了謝，然後垂頭喪氣的走了。一路上，我思考著如何令Fiona原諒我和小惠的方法，但那天我傷她傷得這麽深，又有甚麼辦法呢?
「喂！你條友真係打完齋唔要和尚呀? 好快啲講你同小惠頭先講過啲咩喎！」
我不想給她煩著，唯有將剛才的對話跟她說一遍。
「吓? 就係咁咋? 咁簡單? 」
甚麼? 簡單? ！
我激動得抓著她的肩膊不斷搖晃﹕「你係咪有咩方法令Fiona原諒我哋呀? 話比我知！話比我知！」
她按住我的雙手﹕「冷靜啲，冷靜啲。」
我停下了動作，用期盼的眼神看著她。
「雖然對你嚟講呢，呢件事就好難，因為Fiona連見到你都會避開呀嘛，係咪吖? 」
我連連點頭。
「不過對本小姐嚟講呢，其實就好簡單啫。我都仲有個辦法嘅，而且應該行得通。」
「係點呀? 係點呀? 」
她露出狡黠的笑容﹕「幫你都得，不過你要應承我一個條件。」
我爽快道﹕「咩條件? 講！」為了小惠，我傾家盪產在所不計！
「咪答得咁口響呀，我驚你到時反悔咋。」
「咁係咩條件呀? 你講嚟聽吓先啦。」
她搖搖頭﹕「nonono，如果我而家講咗出嚟，你一定唔肯，所以都係算啦。」
我急道﹕「你唔講又點知我唔肯呢? 」
Jodi哈哈一笑﹕「因為我嘅條件係要你一樣好重要好重要嘅嘢。」
我一件很重要的東西? 到底是甚麼? 她又知道我一定會拒絕，難道是.......
我不禁退後了一步，手掩胸口面露難色。
Jodi看見我的反應，翻了翻白眼﹕「你唔係以為我想要你嘅貞操呀? 慳啲啦！我無興趣呀！」
呼......嚇了我一大跳......我的貞操可是要留給小惠的。那麼，她要的東西是甚麽?
我兩手一攤﹕「咁究竟你想要咩呀? 」
她邪笑道﹕「總之係你一樣好重要嘅嘢啦！我而家唔會講係咩，費事你到時唔認數！」
到底是甚麽東西? 很重要﹖......不會是我的手手腳腳吧﹖難道﹖！......
我看了褲襠一眼，又立刻搖搖頭。
Jodi應該不是那些甚麼變態人體器官收集狂吧，她想要的，會不會只是物質而已﹖
車和樓我是買不起的，若果只是名牌手袋的話，我努力點兼職賺回來就是，沒甚麼大不了的，比起小惠，簡直是微不足道。
既然如此......
「好！成交！」
「嗯? 真係無問題? 」Jodi的眼神很狡猾。
我有不詳的預感，但又想不通她葫蘆裏到底賣些甚麼藥，只好硬著頭皮答應了。
「係！無問題！」
「當真? 」
「果然！」
「最後答案? 」
「得啦係啦，係最後答案啦，問咁多次煩唔煩啫！駛唔駛立字為據呀? 」
她拍一下手﹕「哈哈！就係等你講呢句！我哋緊係要白紙黑字寫明啦！」
回到宿舍，她在一張紙上寫道﹕
「我 陳洛鋒 Samuel Chan，身份證號碼 Z346XXX(X)，今立此憑證。若 許佩琪 Jodi Hui，身份證號碼 Z372XXX(X)能夠幫助我，讓Fiona原諒我，並使她與小惠和好如初。我 陳洛鋒 Samuel Chan，身份證號碼 Z346XXX(X) 願意將自己最重要的東西讓給 許佩琪 Jodi Hui，身份證號碼 Z372XXX(X)，並無反悔。若違此誓，願從此禿頭、性無能加大肚腩。」
「喂，唔駛寫埋身份證呀? 」
「咁先夠認真嘛，快手簽個名打埋個手指模啦。」
「仲要打手指模? 喂喂喂！最後嗰句會唔會太陰毒呀? 改做五雷轟頂，不得好死得唔得呀? 」
「呢啲毫無阻嚇性。做咩呀? 你驚毀約呀? 」說罷Jodi以一個陰險的眼神盯著我。
「唔...唔係......」事到如今，她為刀俎，我為魚肉，我還能說不嗎?
我簽了名，又打了手指模，Jodi笑呵呵的將憑證翻來覆去的看了好幾遍，然後珍而重之的收好。
「咁而家你可以幫我啦！」我急不及待。
「冷靜啲啦，幫就一定幫嘅，不過就嚟考試啦，就算你唔駛溫書我都要溫㗎，所以我決定考完試先幫你。」
我差點被她激得跳起﹕「你個......」我霍然醒起現在有求於她，所以後面的「死八婆」給我吞回肚子裏，改道﹕「......過幾日就幫我得唔得呀? 」
她搖搖手﹕「好心你啦，人生唔係剩係得愛情㗎。就算你唔顧你自己，你都諗吓小惠同Fiona啦，佢哋都要考試㗎。而家搵佢哋咪盞煩住佢哋。」
唉......Jodi說得也有道理，那只好考試過後再說吧......