千禧港女神探（一）春風化雨殺人事件: 第十六話　幫兇反悔

第十六話　幫兇反悔

這天放學後，徐梓俊傳訊息給68923928，亦即是自稱麥劍蘭的守護天使。

徐梓俊留言：「乜搞到死人咁大鑊呀？我仲估你只係打Victor一身。(16:30)」

68923928回覆：「呢種淫渣打佢一身咪益咗佢，佢唔死Tina唔會得到安息。(16:30)」

徐梓俊留言：「你明明話放咗一粒落咗瀉藥嘅車厘子喺我櫃桶，叫我喺切蛋糕嗰陣，





趁大家唔為意就換咗原本嗰粒，依家Victor中毒死咗，唔會係關粒車厘子事吓話。(16:32)」

68923928回覆：「你好醒目，咁都俾你估中。(16:32)」

徐梓俊留言：「咁搞法！我咪即係變成幫兇？(16:33)」

68923928回覆：「你依家先至知道太遲喇！你唔單止係幫兇，你唔好忘記，

係你親手將粒有毒嘅車厘子放落個蛋糕度，你先至係負責執行死刑嘅兇手。(16:34)」





徐梓俊留言：「咪住先！你叫我將個蛋糕切成『井』字形，再將中間有車厘子嗰份遞俾Rainbow。

點解中毒死嗰個反而係Victor？你嘅目標究竟係邊個㗎？(16:36)」

68923928回覆：「Rainbow都有份間接令Tina毀容，一樣咁抵死。

Victor死又好，Rainbow死又好，總之可以幫到Tina報仇就得。(16:37)」

徐梓俊留言：「咁即係報到仇，可以收工。(16:38)」





68923928回覆：「乜你認為應該死嘅人死曬喇咩？(16:38)」

徐梓俊留言：「咁你仲想殺邊個？你應承過我幫你就會放我一馬，唔可以反口。(16:39)」

68923928回覆：「放心，我好守信用。只要你繼續幫我，我保證饒你一命。(16:39)」

徐梓俊留言：「唔係吓嘛！仲要殺人？我又唔知道你係邊個，咁樣對我好唔公平。(16:40)」

68923928回覆：「我當然唔會俾你知道我係邊個，你只需要照我俾你嘅指示去做。(16:40)」

徐梓俊留言：「咁我咪好唔抵，我唔同你玩，我要退出。(16:41)」

68923928回覆：「你已經洗濕咗個頭，你認為仲有得揀咩？(16:41)」

徐梓俊留言：「我唔照你嘅意思去做，你奈得我何咩？(16:42)」





68923928回覆：「你唔記得暑假嗰陣你哋對Tina做過嘅好事，有重要證據喺我手咩？

仲有你依家已經係謀殺案嘅幫兇兼執行者，我哋已經坐埋同一條船。(16:43)」

徐梓俊留言：「咁搞法警察遲早會查到我，就算你唔殺我滅口，要我坐監都夠曬慘。(16:44)」

68923928回覆：「放心，我已經諗好呢單謀殺案應該由邊個成為兇手去頂罪。(16:44)」

徐梓俊留言：「咁都好啲！不過，係咪真係十拿九穩？我係咪真係唔使上身？(16:45)」

68923928回覆：「你肯照我指示去做，我包你一定無事。(16:45)」

徐梓俊留言：「咁來緊你想我點做？唔係又要我落毒吓嘛？(16:46)」





68923928回覆：「唔使落毒，今次要你做嘅嘢簡單好多。(16:46)」

徐梓俊留言：「你係至好講，你識我都知道我無乜大志，做唔到大事。(16:47)」

68923928回覆：「我明白，呢幾日風頭火勢，等風聲無咁緊，我再俾你指示。(16:47)」

另一方面，張宇傑亦主動傳訊息給68923928，也是投訴古偉達竟然被殺一事。

兩日後，趙芷芳致電校務處找蔡智勇，詢問關於古偉達死前的進食情況。

蔡智勇說：「Madam Chiu妳好！係咪已經出咗驗屍報告？」

趙芷芳說：「無錯，驗屍報告證實古偉達死於食物中毒。」

蔡智勇說：「食物中毒？咁係中咗乜嘢毒呢？」





趙芷芳說：「喺佢嘅胃部殘留物搵到巴豆同尼古丁，佢同時食咗急性瀉藥同劇毒。」

蔡智勇說：「咁大鑊？邊個同佢咁大仇口？」

趙芷芳說：「睇來個兇手一定好憎佢，相信好大機會係為咗報仇而殺人。

我哋要調查一吓古偉達嘅人際關係，另外仲要調查佢死之前食過乜嘢。」

蔡智勇說：「據我所知，古偉達份人平時蝦蝦霸霸，得罪人多，稱呼人少，

相信淨係學校入面已經有唔少仇家。佢死之前好似係參加咗一個生日party。」

趙芷芳說：「係邊個嘅生日party？其他人有無食咗瀉藥或者中毒？」





蔡智勇說：「真係唔覺其他人有事喎！大家都有食生日蛋糕同飲汽水，但係只得古偉達出事。」

趙芷芳說：「咁會唔會兇手無特定目標，古偉達只係唔好彩中招？」

蔡智勇說：「妳嘅意思係『隨機殺人』？都有咁嘅可能！」

趙芷芳說：「咁唔該你幫手召集案發當日有份參加生日party嘅所有人，我要逐個盤問。」

蔡智勇說：「我會叫佢哋放學留低，請妳大約4:00來到學校。」