千禧港女神探（一）春風化雨殺人事件: 第十七話　錄取口供I

第十七話　錄取口供I

5A班班會幹士來到校務處會客室，蔡智勇提供個人資料，各人逐個接受盤問，高子峰進行筆錄。

趙芷芳說：「林嘉慧，Charlotte，5A班班會財政，請妳講吓10月15日生日party發生過嘅事。」

林嘉慧說：「嗰日我哋4:00去到四樓活動室，開始玩遊戲，之後等肥隆拎生日蛋糕返來。」

趙芷芳說：「妳所講嘅肥隆即係謝隆恩？」





林嘉慧說；「唔係佢仲有邊個喎！二百幾磅肥騰騰，論論盡盡。」

趙芷芳說：「既然佢咁論盡點解唔搵第二個去？」

林嘉慧說：「鬼叫佢係班會總務咩？呢啲濕碎嘢唔係佢做邊個做？」

趙芷芳說：「照妳咁講，個蛋糕都係由佢去買？」

林嘉慧說：「梗係唔係啦！我哋八個一齊去揀㗎！」





趙芷芳說：「你哋八個即係邊八個呢？」

林嘉慧說：「咪除咗Rainbow之外其餘八個班會幹事囉！」

趙芷芳說：「妳係話除咗葉雨虹之外包括死者古偉達？」

林嘉慧說：「係呀？生日party前兩日，我哋一齊喺小圓邨嘅聖康妮餅店揀㗎！」

趙芷芳說：「大型連鎖餅店應該會有閉路電視，可以證明。」





林嘉慧說：「我哋原本都心大心細，Victor話買栗子蛋糕，Winson又話買黑森林。」

趙芷芳說：「妳講嘅係古偉達同黃傳聲。咁妳呢？有無俾到意見？」

林嘉慧說：「我主要考慮價錢，三磅太貴，一磅唔夠食，兩磅最啱。」

趙芷芳說：「結果最後買咗乜嘢蛋糕？」

林嘉慧說：「最後Edward話自己最清楚Rainbow心意，決定買芒果蛋糕。」

趙芷芳說：「妳講嘅係黎國光。除咗芒果之外個蛋糕仲有乜嘢特別？」

林嘉慧說：「蛋糕上面仲有八粒士多啤梨，中間有一粒車厘子。」

趙芷芳說：「咁即係葉雨虹喺生日party之前未見過個蛋糕啦！」





林嘉慧說：「梗係未見過啦！咁樣先至有驚喜嘛！」

趙芷芳說：「今日問住咁多先，到下一個。」

趙芷芳說：「何四悅，April，5A班班會宣傳，請妳講吓10月15日生日party發生過嘅事。」

何四悅說：「嗰日4:00至4:30，我哋喺四樓活動室玩遊戲，直至肥隆返來。」

趙芷芳說：「遊戲進行期間有無乜嘢事發生？」

何四悅說：「無乜嘢特別，之後肥隆返來，我哋就食蛋糕。」

趙芷芳說：「即係謝隆恩拎蛋糕返來就即刻食？」





何四悅說：「唔係！Charlotte將個蛋糕放入雪櫃，過咗一陣，我就拎返出來。」

趙芷芳說：「妳講嘅係林嘉慧。咁過程之中有無打開過蛋糕盒？」

何四悅說：「無呀！直至我拎蛋糕出來先至打開！」

趙芷芳說：「咁之後呢？由壽星女切生日蛋糕？」

何四悅說：「Rainbow許願之後，的確切咗一刀，不過之後唔係佢切。」

趙芷芳說：「咁係邊個切蛋糕呢？」

何四悅說：「咪其中一隻狗公Jeffery囉！」

趙芷芳說：「妳講嘅係徐梓俊。咁佢切蛋糕嗰陣有無乜嘢唔妥？」





何四悅說：「梗係唔妥啦！係人切蛋糕都係『米』字咁切，佢竟然切『井』字。」

趙芷芳說：「點解要切『井』字咁怪雞呢？」

何四悅說：「可能班會有九個人，切成『米』字難分九份。」

趙芷芳說：「就算係咁，切成『井』字太唔自然，會唔會仲有其他原因呢？」

何四悅說：「咁應該係關士多啤梨同車厘子嘅事！」

趙芷芳說：「點解咁講？請妳詳細講個原因！」

何四悅說：「蛋糕邊有八粒士多啤梨，中間有一粒車厘子，用『井』字切啱啱好分曬。」





趙芷芳說：「原來係咁！咁怪得來都算合理！咁之後發生乜嘢事？」

何四悅說：「之後Kenneth分派紙杯、紙碟、膠叉，大家就開始食蛋糕，飲汽水。」

趙芷芳說：「妳講嘅係張宇傑。之後古偉達嘅情況點樣？」

何四悅說：「佢突然間話急屎，之後衝咗出去，就無再返過來。」

趙芷芳說：「明白，問得差唔多，到下一個。」