金庸今年出食譜？: 八

「叮噹——叮噹——」放學鐘聲響起。

我拖著緩慢腳步向留堂室進發。

「喂，同學你去邊呀？」一把熟悉既死人聲又闖進我耳朵。

「 咩事呀，Miss Chan？」我擰轉身講，其實我想講「關你咩事」，但費事「奶屎上身」都係好聲好氣答佢算。

「聽黃sir講前面好似係留堂室黎架喔，莫非你......」Connie陰陰嘴笑。





「我係領袖生黎既，而家去留堂室維持秩序，係咪咁都唔得先，Miss？」

「哦...原來你係prefect，就咁既，頭先黃sir叫我拎呢張留堂名單俾你，叮囑你地記得點名，咁prefect你係咪要點翻自己個名呀？呵呵！」

仆你個街！

我心裡暗罵。

「哎，我唔同你講啦，夠鐘走人係咁先啦。」佢遞張名單俾我，然後臨走前仲提醒我話：「係啦。唔好話我唔提你，你今晚翻去記得準備笑話喔，聽日你要上台同大家講。記得啦。拜拜！」





此刻我心入面有千萬句粗口不停咒罵條死八婆。不過呢度係學校，我費事同佢嘈免得損壞我既形象。（其實我係怕被黃sir聽到。）

最後我響留堂室留到差唔多六點半先做曬d功課。

翻到屋企我打開電腦，發覺上次同我對戰果個「菊花大俠」響網上狂開post，標題寫住：超級魚腩韋一笑，內文post左我個樣同聯繫電話，大肆宣稱話我係懦夫、魚腩，上邊仲有一條當日我求C哥放我一馬既全過程影片。

我當堂淆曬底：今次死啦，傳到去學校俾我d同學知道，我顏面何存呀！！！

呢個「菊花大俠」肯定係上次被人燒左本書心生不忿，而家玩報復上網唱我。





奶野啦今次！！！

仆街啦！