(無甜)上天給我的一個玩笑 (新增外傳): (6)

我一上到啊螢屋企放低個書包之後就開始處理定所有材料方便聽朝早煮
 
因為廚房空間有限，我同啊螢經常有身體碰撞，而百厭既佢有時用水潑我，而專心拆緊蝦殼既我完全無理過佢
 
「做咩呀?你嬲呀?」佢停左手望住我
 
「唔係呀…」
 
「咁你做咩唔還擊」佢個樣有啲疑惑
 




「因為…」我個哄過去啊螢嘅耳邊「我諗住整好哂啲蝦肉先至向你報復」我露出陰險嘅樣子望住佢
 
我快快手整埋手上最後一隻蝦，抹一抹手，然後望住佢，但其實我無諗住整佢
 
「唔好呀…」佢即刻跑左出廳
 
「做咩啫你」我大聲向廳個邊叫
 
「你話你整好哂就會報復呀麻，我…我咪閃開囉」
 




「唔好咁小學雞啦」我拎起個盆，準備將啲蝦肉打成膠「啲蝦肉都仲未打成膠，入返黎幫手啦」
 
「哦哦哦」佢亦都迅速咁行返入黎
 
整多一陣，所有既材料都準備好哂啦，而我亦都有半邊身比啊螢潑濕左…好彩我仲有件底衫，我入左洗手間，除左件半濕既校服，正係著住件黑色嘅背心底衫，坐左係梳化到休息一陣。
 
「辛苦你啦」啊螢遞左杯水比我，之後亦都行左入房換衫
 
我就係到參觀下，啊螢屋企嘅擺設
 




我被放係電視櫃上既相片吸引住，上面有啊螢同佢家姐兒時嘅合照，亦有一張係啊螢抱住一個岩岩出世無幾耐嘅嬰兒，我相信係佢家姐個女，相中嘅啊螢笑得好甜，好似一個天使保護住個嬰兒一樣

「喂，你係到睇咩呀?」啊螢向我行近
 
「你電視櫃上面嘅相囉」
 
「唔準睇」佢突然間擋住我嘅視線
 
「點解呀，你擺得出黎唔係預左比人睇架咩」我笑一笑
 
「個個都睇得，係你唔睇得」
 
我一臉疑惑「點解?」
 
「因為你一定話我細個個樣好傻…」




 
「你而家都係傻架啦」我講完之後背住啊螢偷笑
 
「喂呀…」啊螢係咁拍我背脊
 
「好啦，唔玩你啦，都晏架啦，我走先啦」我拎起書包轉身走向門口
 
啊螢同我肩並肩走到去門口「咁你記得聽朝早七點上黎啦WOR」啊螢順手開埋門。
 
「OK」
 
返到屋企後，啊螢抱住嬰兒個張相係我嘅腦海揮之不去，因為…佢真係笑得好甜…再加上我同啊螢一樣都係好鍾意小朋友，所以呢一幅相一直都刻係我腦海入面