(無甜)上天給我的一個玩笑 (新增外傳): (5)

不知不覺又去到聖誕聯歡前幾日
 
經過個晚同啊螢係海旁既相遇，佢嘅心情已經回復正常，而佢家姐亦都已經出院
 
咁樣意味住，我同佢鬥氣既日子已經返哂黎啦，不過個感覺又好似有少少唔同，以前真係好似一個警察去捉賊咁，而家就好似兩兄妹嘈咁，不過呢種感覺幾好呀，至少唔會夾雜左敵意係入面
 
「喂，你條友又唔交功課，你又唔係唔識做」佢又拉住我
 
「唔做咪唔做囉，我又唔係唔識，我考試仲高分過你啦」我露出陰險嘅眼神
 




「呀!你條友仔呀…」啊螢無言
 
「嘻嘻嘻，唔順氣咪嬴我囉」
 
「啊Sir，佢又唔交功課啦」佢向住黑板大叫
 
「啊風，你唔好以為我聽唔到先得架，高分又點姐，唔交功課留堂啦你，無情講」班主任望住我
 
「啊螢你…」我有一種被出賣嘅感覺
 




「嘻嘻嘻，下次考試我要高分過你」佢又一次伸脷
 
「哼，我唔會比你得逞，小學雞」
 
唉…又比隻小學雞搞到留堂
 
不過每一次我比人罰係班房到做功課，都留係到溫書，所以…就算留堂佢都係我身邊…
 
當然我快快手搞店哂所有功課，準備走人嘅時候。
 




「啊風，過多幾日就係聖誕聯歡啦，你記住你係同啊螢一組呀，而家比你地揀，你地想準備野食定準備節目」啊Sir疊住我肩頭
 
唔係掛，就連聖誕聯歡我都係逃脫唔到，天呀點解要咁玩我
我望一望啊螢「喂啊螢，你話事啦」
 
「咁呀…你等一陣」佢係筆袋到拎左兩張紙仔應該係寫左節目同食物，仲將兩張紙收埋係後面「你揀左手定右手，揀到係咩就做咩囉」
 
「左手啦」我係佢左手接過張紙
 
打開見到係食物
 
「啊Sir，我地整野食，咁要整幾多」我向住啊Sir
 
「野食就整一款，份量就…全班學生加教過你地嘅老師就可以啦，至於錢方面，你地出住先，之後拎齊所有單據交比我，我會係班會到扣返比你地」
 




我同啊螢都擺出OK既手勢
 
正當我準備拎起書包走人既時候，啊螢拉住我
 
佢臉露出陰險既笑容，打開右手張紙，上面都係寫住食物
 
「…」我用射哩眼望住佢「你整蠱我?」
 
「嘻嘻嘻嘻」
 
「你學壞左啦」
 
「咩呀，又係你話既，中學唔應該咁循規蹈矩，咁我咪整蠱下你囉，唔係唔玩得呀?」佢個樣得戚到一個點
 
係呢一刻…我無言




 
「玩得你咁開心，你負責諗整咩野食」
 
「諗咪諗，總好過叫我去諗節目」
 
又比你講岩WOR，通常諗活動要諗啲男女岩玩，又要係學校玩得，真係仲難過叫我考試拎A
 
「你又岩WOR，不過最好同其他人傾下佢地整咩野食好過啦，陣間同佢地撞左到時就尷尬啦」
 
「又好」佢拎起支筆係張白紙到寫左啲野「拿，呢個我電話，方便我地聯絡，有Idea個陣Call我啦」
 
「OK，你唔好諗啲太難架WOR，我手藝麻麻」
 
「得啦，我都唔係好你好多」
 




經過幾日既討論我地兩個選擇左整炸蝦多士，好彩早上年家政老師有教我整，唔係唔知點算
 
就係聖誕聯歡前一日
 
「拿，各位同學，聽日就係聖誕聯歡啦，由於你地升左上高中啦，會同以往有少少唔同，就係個party係九點就開始，十一點就係聖誕崇拜，當日大家可以著便服返黎，不過要捐十蚊出黎比學校作慈善用途，今日係咁多，大家enjoy聽日既party啦」班主任講完後拎起書本離開課室
 
各位讀者，你地無睇錯，著便服係要捐十蚊，係我中一嘅時候聖誕聯歡係仍然都要著校服，但之後有學生同老師提議聖誕聯歡不如比學生有多啲唔同既感覺，先至爭取到可以著便服返黎，不過要捐款，對於捐款大家亦都唔拒絕，因為多多益善少少無拘。
 
我拎起書包準備走人個陣
 
「喂啊風」啊螢拍一拍我
 
「做咩呀」
 
「陣間同我去買材料呀」佢皺眉望住我




 
「係WOR」我坐返低等佢執好野「慣左SOR」
 
「行得啦」
 
我地兩個走左去附近既超市買需要嘅野
 
「喂啊風，你一陣得唔得閒呀?」啊螢突然撞一撞我
 
「得嘅，做咩呀」
 
「陣間上黎我屋企，一陣處理好哂啲材料，聽日你七點左右黎我到整好啲野食呀」
 
「吓…上你屋企，你屋企人…」我有啲驚訝，因為我未試過上女仔屋企
 
「怕咩啫」佢都露出奸樣「你唔係天不怕地不怕架咩」
 
「我怕你屋企人熱情啫」我諗唔到點答
 
「唔怕，我屋企呢個鐘數無人架」佢又一面正經咁講「而且我用慣左我屋企既廚具」
 
「哦，咁好啦」
 
我同啊螢買好哂所有野就向啊螢既屋企出發