(無甜)上天給我的一個玩笑 (新增外傳): (11)

點齊人數後我地都向住山上嘅營舍出發
 
沿途上我一直都係到觀望四周嘅風景，雖然而家係四月但都有一陣陣清風，感覺非常舒服，個人亦都非常放鬆…行下行下無幾耐我地就到達左營宿
 
「大家好我係XXX係呢個營宿嘅職員，留心聽住啦，記得千奇唔好進入異性嘅房間呀，一經發現我地會列入黑名單處理同埋打電話通知你地嘅家長，同埋我地嘅營宿嘅規矩係…」一名營宿嘅職員拎住大聲公同我地講
 
當然我地無人留心聽佢講，只係想快啲放好啲行李之後出去行下又好，係房小休一陣又好，只係想快啲閃人
 
「好啦，而家派房匙，每間房搵一個代表出黎拎鎖匙，你地安放好自己嘅行李之後可以自己四處參觀又或者用呢到提供嘅設施，但記住十二點半要去到飯堂集合，所以大家都唔好走太遠啦」班主任叮囑我地
 




拎過鎖匙後，我地都紛紛散去
 
而我就編左同四大天王加啊軒，六個人一間房
 
「喂啊風呀，出唔出去打波呀?」啊軒一邊安頓佢嘅行李一路講
 
「是但囉，無所謂呀」而我亦都係到執拾一下床舖
 
「咁四大天王你地呢?」啊軒望向佢地四個
 




「咪搞我啦，我呢啲文弱書生邊夠你兩個籃球隊玩呢，我地四個留返係到玩PSP算啦」啊明托一托佢副眼鏡
 
「好心你四條友咪咁毒啦，黎到咁大自然嘅地方都仲係掛住打機」啊軒搖哂頭
 
「我搞店啦，行得」我換好褲拍一拍啊軒
 
好彩，我同啊軒落到球場見到亦都有一班同我地差唔多年紀嘅年青人係到打波，起碼我唔洗正係同佢1ON1打到食飯
 
揮灑完汗水，我同啊軒都去洗手間整頓左一陣，就過左去飯堂啦
 




不過當我去到飯堂嘅時候，我望到四大天王都用一個好陰險嘅眼神望住我，成餐飯都食得好唔自然…一定係城城唔知做左啲咩野
 
食完飯之後，我地一班三十人分成各個唔同小組去左玩野外定向，當中有唔少任務都要去到各個名勝古蹟，例如小長城、張保仔洞、觀音廟等等，雖然我唔太感興趣，但我都幾享受個過程
 
無驚無險，又去到夜晚，是日活動BBQ，由於我打左成朝波，又玩野外定向，成身大汗就返左去房抹身換衫，同埋重點係我唔想透爐…但結果我都係要郁手透爐…班死仔年年去旅行都唔學透爐，又係要我透…
 
而我亦都快快手透好個爐燒野食，因為我真係好肚餓…正當我地燒得興起之際，
 
「呀!!!!!!」啊恩發出一聲咆哮聲「透唔店個爐呀…」
 
唔想再郁手嘅我當然唔出聲瑟縮一角，你睇我唔到~睇我唔到~總知你硬係睇我唔到
 
點知城城條死仔突然大叫「嘩…啊風好MAN呀，一陣就透好個爐」仲要用一啲好姣嘅語氣
 
「我頂你咩，唔出聲無人當你死架WOR」我塊面紅左，唔係尷尬嘅紅，而係憤怒嘅紅




 
「啊風呀，過黎幫下手啦」啊恩揮揮手叫我過黎幫佢
 
無奈之下我就去左幫佢地透爐，而個四條友仔…就無拿拿係到叫春咁嘅款
 
「搞店啦…我去洗手先」我執返好啲炭就行左去洗手盤
 
就係我行開嘅呢段時間，我聽到城城講左幾句野但聽唔到佢講咩，之後全班人都係到嗚嗚~~