(無甜)上天給我的一個玩笑 (新增外傳): (10)

就算聖誕節真真正正咁來到，我嘅節目亦都只係溫書，落街場打波，食同訓，日日都係咁…所以時間亦都過得好快，話咁快連期中考試都過埋
 
考試過後，平平常常嘅返學日子亦都回來…而我都仲係成日唔交功課，成日同啊螢嘈交…
 
「你條友仔又唔交功課」啊螢啤住我
 
「唔交咪唔交囉，懶得做」我日日都重覆住一句話
 
「哈!你兩個嘈少日得唔得呀」班主任亦都忍唔住出聲「啊風好心你就交下功課啦，學校查簿個陣我就頭痕啦，到時我又要捉你留堂，搞到大家都唔開心，快快手搞店佢啦」
 




「…嘩，咪搞我，我先唔想日日比你捉留堂」我隨手拎起今日本來要交嘅功課，快快手搞店哂佢
 
「拿，大家留心聽住，黎緊復活節呢有一星期假，而家班會就籌備緊，搞一個宿營，為期三日兩夜，同大家渡過呢個復活節假期，而家想知有無人會參加」班主任開出一份POWERPOINT，上面列出一啲營宿嘅地點同營地活動
 
當然，難得有人肯搞CAMP我二話不說第一個企係身話參加
 
「我參加」我用堅定嘅眼神望住班主任
 
而一眾男生亦都參加，女生方面有啊恩嘅領導下，當然都係全體參與，所以呢個CAMP亦都變左做我地班嘅聯誼活動，而今次宿營地點係長洲
 




當大家決定好哂參加同活動細節，我都亦都非常之咁期待呢次活動，因為可以緩緩放下學業上嘅壓力，雖然未到暑假，但我地一班男生都決定去享受陽光與海灘
 
直到宿營當日
 
「齊人未呀」著住一件背心底衫，戴住黑超，露出一身肌肉嘅軒仔係到大叫「好想快啲入去放底行李呀」
 
「齊人，出發」班主任揚一揚手示意我地跟住佢上船
 
上到船後，大家搵好位置坐低個個唔係訓覺就係到聽歌睇風景，而我亦走到船尾吹下海風。離開左生活壓力大節奏急速嘅城市，感受一下大自然氣息，放鬆心靈
 




拍!
 
突然有人拍我個頭，打破左我嘅寧靜
 
「係到做咩呀你」啊螢推我個頭
 
「哇比你嚇死啦大佬，突然間彈出黎」我定一定神「係到感受緊大自然氣息，你都坐低感受下啦」
 
「又好」啊螢走到我旁邊嘅座位
 
我地兩個係呢個過程中一句野都無講過，而我一直都係到思考緊自己嘅未來，無幾耐啊螢個挨左落我個膊頭到，再一次打破左我嘅思考
 
「喂…你」我望向啊螢
 
原來佢訓著左，算啦，今日個個為左早啲入去都好早起身過黎，由佢訓一陣啦




 
不知不覺間到左長洲了
 
「起身啦」我拍一拍啊螢
 
「唔…」啊螢亦都悠悠咁起身「到左啦?」
 
「係呀」我郁一下比啊螢壓住嘅手臂「落船啦」
 
我轉身走人嘅時候啊螢拉住我件衫
 
「我…腳痺呀」啊螢用一副楚楚可憐嘅樣望住我
 
我伸一伸手拉佢起身
 




「喂呀…你做咩呀…我真係腳痺行唔到呀，你唔係而家諗住整蠱我呀?」
 
「我先無你隻小學雞咁無聊，你用少少力踩實個地下，過一陣就唔痺架啦」我將佢隻手放係我膊頭到比佢借力「你扶實我膊頭，等你唔痺我地先行啦」
 
「咦!?真係無痺啦WOR」啊螢輕輕係到跳「行得啦」
 
落船之後我望到城城露出陰險嘅眼神，我有一啲唔好嘅預感…