(無甜)上天給我的一個玩笑 (新增外傳): (13)

第二日
 
經過一晚嘅精神折磨搞到我訓唔著，好攰，好眼訓…
 
當一班人去到飯堂食早餐嘅時候，我就一個人係到釣魚鐘眼訓…
 
食完早餐過後就開始我地嘅活動
 
我地參加左營地嘅攀石同游繩活動，不過呢一刻我卻想同周公談心
 




勉勉強強都我能夠支持住去進行早上嘅活動
 
完哂活動之後我地返房整理下之後食午飯，大家都帶著期待嘅心情去食呢餐午飯…因為今日嘅下午先係我地嘅重頭戲節目
 
去沙灘玩!!!
 
大家換好衫褲，執好要拎去沙灘嘅用品一齊出發
 
「開波嚕!」啊軒二話不說一腳將個排球踢到九樓咁高
 




成班男生漫無目的咁追住個波四圍踢，而精神欠佳嘅我就決定去士多到租一把太陽傘訓一陣
 
我返到沙灘整好把太陽傘舖好沙灘蓆就訓左係到
 
「啊風，你唔出黎玩呀?」啊軒大大聲咁向我呢邊大喊
 
「唔啦，比我訓一陣先，轉頭黎」我用我剩餘嘅最後力氣講，之後就灘左係到
 
雖然班女生係我附近到曬太陽傾心事，但都無阻極度疲累嘅我訓覺
 




不知不覺間我就訓著左，仲訓到好似無哂知覺
 
唔知過左幾耐，突然之間
 
「嘩~~BUUUUU…」我大叫一聲
 
原來我比人掟左落海…
 
好彩佢地唔係掟左我去啲好深水嘅地方，我立即企返起身睇下邊個掟我…
 
我抹走面上嘅水…睇到全班嘅男同學都一路望住我一路逃走…係呢一刻我就知道係全班人都有份…
 
呢一刻我即刻向前跑睇下捉到邊個就到邊個糟映
 
結果我捉到又矮又肥嘅城城，而其他人都即刻過黎幸災樂禍幫我手掟佢落水…




 
捉左一大輪之後…
 
答案係全班男生每人都至少比人掟左一次落水
 
玩到攰左嘅我就慢慢走返到我個「營地」到坐左陣回下氣
 
我望一望手機原來已經四點幾，岩岩餐午餐我只係食左少少野，所以我個肚都開始打鼓啦
 
我拎左銀包電話著返對拖鞋就起行去搵返啲長洲嘅特色小食，係半路我撞到啊螢…
 
「啊風，你拎齊野去邊呀」
 
「無呀見肚餓去買啲野食下，一齊?」
 




「好呀，我頭先都係食得少少野炸，我仲唔識路都唔敢自己行開，你等我一陣我去拎銀包」啊螢急急步走左去拎銀包
 
呢個傻女…長洲有幾大呀咁都驚盪失路
 
「行啦」啊螢笑笑口望住我
 
我以前上網睇過長洲有咩特色小食，我就一路帶住啊螢四圍行，每樣野食都試少少
 
行到去碼頭附近嘅時候，啊螢比一間貝殼精品間嘅貝殼吸引住

「好靚呀」啊螢雙眼發光咁望住個貝殼擺設
 
我自己亦都被一啲貝殼制嘅手繩吸引住
 
不過我地兩個都只係睇左一陣就走左，因為我地仲要去買野食




 
我帶住啊螢去到唔同嘅舖頭到買野食，佢就好似一個大細路咁每次拎住野食都好開心，而每食一啖佢都露出好真摰嘅笑容，好純真…好可愛
 
買完野食，我就同啊螢去到海旁嘅長凳到坐低食野，呢一刻橙黃嘅陽光照耀住啊螢個樣，呢一刻我真係覺得佢好靚呀…
 
行下食下睇下野，唔覺唔覺就入黑啦
 
「鈴鈴鈴鈴鈴」我個電話響
 
「喂」
 
「喂，啊風你去左邊呀?我地要走啦，同埋你見唔見啊螢呀?」啊恩問我
 
我望一望附近店舖嘅鐘，原來已經七點架啦
 




「哦…我同啊螢去左買野食姐，而家返黎架啦等埋我地呀」我笑一笑回應
 
「咁你地快啲返黎啦」啊恩就咁收左線
 
「邊個打黎呀?」啊螢係到睇緊附近嘅舖頭咁問我
 
「啊恩打黎啫，叫我地返去啦，行啦」我拉一拉啊螢隻手
 
我地兩個就悠悠閒閒咁行左返去，係呢一刻我又諗返起琴日班友BBQ個陣…一陣一定又有啲嗚嗚聲架啦…算啦唔理佢地，我地兩個開心就夠啦
 
「嗚~~~嗚」成班都望住我地兩個
 
「你兩個去左拍拖呀?」啊恩用住一個好奸嘅樣望住我
 
「買下野食啫，唔洗咁嘅」我一面尷尬咁回應
 
「買咩野食要食兩三個鐘呀?」城城又一次露出佢非常猥瑣嘅樣出黎
 
「…」我無言了
 
班主任行過黎「你地沖好哂身搞店哂未呀，我地返去營舍到放低你地嘅物品出去食飯啦」
 
成班人異口同聲咁講「係咪你請先」
 
「係呀係呀，快啲行啦」班主任非常大方咁講
 
「好野WOW」成班人開心到彈起