(無甜)上天給我的一個玩笑 (新增外傳): (14)

我地返到營舍之後就換好衫褲出發，班主任就帶左我地去碼頭附近嘅大排檔食海鮮，原來大排檔嘅老闆就係班主任嘅父母，難怪佢會咁大方請食飯
 
「強仔，可以上菜啦」班主任向住一位夥記叫
 
眨眼間就一枱都係餸，仲有唔少係肥美新鮮嘅海鮮，大家都食得津津有味
 
晚飯過後
 
「拿，過埋今晚聽日就要出返去啦，所以我今晚都唔限制你地啦，比你地自由活動，但記得有咩事就要打比我同埋唔好太夜訓啦，你地聽日十二點前就要退房啦，我呢就唔陪你地啦，我會留係到陪我嘅家人，聽日你地自己出營啦」班主任講完之後就走去陪佢嘅父母收拾
 




啊恩拉住啊螢同一眾女生走過黎「喂，啊風你今日帶啊螢去左邊呀?」又係一個奸樣
 
「咪食下呢到啲地道小食囉」
 
「又唔見你帶我去?」啊恩個樣越黎越奸
 
「又唔見你走過黎叫我帶你去?」事實啊螢係因為唔識路先跟我黎
 
「我唔理呀，你要帶哂我地咁多個女仔去食好野呀」啊恩又一次帶領住班女仔圍住我
 




「得啦得啦當我怕左你，一陣夜啲碼頭附近就好多小食檔架啦，而家四圍行下先啦」我一臉無奈
 
「信住你先啦」啊恩個奸樣終於唔見左
 
我即刻係到唞大氣
 
一班男生就唔太想四圍行就想返去營地到休息下同玩下啤牌打下機咁，夜啲再出黎搵野食，一班女生就四圍行，而我就無理由得我一個男仔跟住班女，所以變返做獨行俠，四圍行下
 
漫無目的四圍咁行，再一次回到貝殼精品店，我亦都再一次入左去
 




「咦細佬又係你呀?」老闆娘望住我
 
「係呀，你又認得我嘅」我笑笑口咁同老闆娘講
 
「哈，我記性好呀麻」佢緊執野好似準備收舖「晏晝同你一齊黎個個靚女呢唔見佢嘅?佢係咪你嘅女朋友仔黎呀?」
 
「唔係呀…我同佢同學黎，老闆娘你係咪趕住收舖呀?一係我聽日先再黎啦」我準備轉身離開
 
「細路唔洗咁緊張，我執下貨啫，你慢慢睇都唔遲啦，有你陪我傾下計仲好啦，我個仔都唔願得同我傾計嘅，難得你肯理下我」老闆娘笑笑口
 
事實上有好多男仔都係好少同佢嘅家長溝通，終日沉迷係網絡世界上面
 
突然間老闆娘放左一對貝殼擺設我面前
 
「咦呢對擺設…」




 
「係呀，個靚女睇左好耐個對呀」
 
我望兩望又真係幾靚嘅，今次呢個CAMP累佢比人講閒話，買左對擺設送比佢當係補償啦…
 
「老闆娘對擺設幾多錢呀」我拎銀包出黎
 
「係咪拎去送比個靚女先，見係你平平地廿蚊比左你啦」老闆娘仲係櫃到唔知搵咩野「拿，送多兩條手繩比你，比你同靚女一人一條啦」老闆娘將對擺設同手繩放入袋到「靚女個樣幾純品丫同你都幾襯呀，睇佢個款應該都係好女仔黎，要追人就快啦，唔係一陣比人搶走左你喊都無謂」
 
「多謝你呀」我拎出廿蚊比錢
 
雖然老闆娘講到我好似好想啊螢做我女朋友咁，而我一直都口裡說不心裡卻很誠實，我又真係唔想啊螢離開我嘅，大概佢已經開始係我心裡紮根