(無甜)上天給我的一個玩笑 (新增外傳): (23)

「好啦好啦，大家嘅情緒好似太過高漲，小休一下先啦」MC立即出黎潑佢地冷水
 
學校地方點會比我地做呢啲野呢
 
「啊恩，你做咩要咁玩我呀…」我臉上嘅紅仲未散
 
「我邊有玩你呀」啊恩指住我隻手「我只係將你心入面諗嘅幫你做埋出黎啫」
 
「…」我仲係拖住左啊螢…
 




佢用手臂撞一撞我「第日請飲記得叫埋我喎」啊恩一臉奸笑
 
返到台下之後，佢地仲逼我地兩個坐係最中間…
 
我同啊螢兩個都低住頭，之後台上發生咩事我都已經留意唔到…
 
我只係知道我又一次上位啦…不過中學人生又有幾多個可以有呢啲機會做主角呢，所以我無怪過佢地咁樣推我上位…
 
亦都係從呢次之後，我同啊螢嘅關係亦都越黎越親密，做咩都一齊，親密程度好比男女朋友，只係無攬攬錫錫
 




話都無咁快就去到學校嘅秋季旅行
 
今次我地去到淺水灣個沙灘，由於年年都燒野食，大家今次都覺得悶，所以變左去野餐
 
而我都覺得呢個決定係非常明智，因為個日落住微微細雨…
 
年青嘅我地，就算落雨都無損我地嘅興致
 
「開波嚕」啊軒再一次再個排球打到九樓咁高…何必呢，我地只係玩閃避球，唔係打沙排呀…
 




玩左一輪之後，我就走開左，打算好似以往咁自己一個周圍行下，但今年唔同，有啊螢陪住我係微雨中慢步…
 
只要每當黎到大自然環境我個人亦都非常放鬆，好鍾意自己周圍睇下風景…而今次一男一女係雨中漫步…個氣氛有啲浪漫，我又一次不知不覺間拖住左啊螢嘅手
 
「你做咩塊面咁紅嘅」我望一望啊螢
 
佢咩都無講低頭指住我隻手
 
「…」我呢一刻發現我拖住左佢
 
正當我想放開手嘅時候，佢撓住我隻手
 
「你…」我有啲驚訝
 
「咁樣幾好呀，幾浪漫呀」啊螢笑住咁同我講




 
其實我一早就知道如果我夠膽講出口嘅話，我同啊螢應該係男女朋友嘅關係，而唔係密友，既然上天比左個咁好嘅機會我，我就要把握住
 
「啊螢…」我深呼吸
 
「咩呀」佢望住我
 
「可唔可以…做我…女朋友」我又一次口震…「我…唔想你…離開我」
 
啊螢塊面直頭紅到好似發緊高燒咁…
 
「…」啊螢咩都無講只係點頭
 
而我知道成功左之後，我就即刻抱起佢係到轉
 




「喂呀，好暈呀」啊螢攬住我
 
「WOWOWOWOWOWO」後面成班人衝動過黎
 
「你得左啦喎衰仔」，「威啦有女朋友啦」，「從此比人綁死嚕」
 
成班男仔衝埋黎枱起左我向天拋…大佬咩事呀
 
一輪吵鬧過後，我地聽到遠處有音樂聲，大家都行過去睇下咩事
 
原來…今日有人結婚呀…
 
係呢個時候，鬼馬嘅啊恩披住外套捉住我同啊螢隻手
 
「陳永風先生，你願唔願意成為梁倩螢小姐嘅男朋友，以後不論疾病，健康，鬧架，嘈交，傷心，開心，你都陪伴住佢嘅左右不離不棄?」啊恩自己臨時作左一段誓詞出黎




 
「我願意」我好怕醜，講得好細聲
 
「咩話?」成班人扮哂聽唔到
 
「我!願!意!」我向天大叫，你地無非都係想我咁做啫
 
「粱倩螢小姐，你願唔願意成為陳永風先生嘅女朋友，以後不論疾病，健康，鬧架，嘈交，傷心，開心，你都陪伴住佢嘅左右不離不棄?」
 
啊螢紅哂面咁點頭
 
啊恩咳兩聲「我以班會主席之名正式宣佈，你兩位正式成為男女朋友」仲整到我地十指緊扣，兩條手繩泊埋一齊
 
就係咁條手繩不知不覺間成為左我同啊螢嘅定情信物
 




「WOWOWOWOWOWOWOWO」成班男仔又一次係到大叫「嘴佢!嘴佢!嘴佢」
 
佢地大聲到連結婚個兩位都行埋黎湊熱鬧仲加入埋一份
 
個種感覺似我同啊螢結婚多啲…
 
不過係呢一刻我知道我要做完上次係歌唱比賽無做到嘅事
 
我嘴左落啊螢嘅面上
 
怕醜嘅佢即刻藏入我嘅懷抱入面，我亦都抱住佢
 
「WOWOWOWOWOWOWOWOWO」全世界係到拍手掌
 
「喂，你班死仔去左邊…呀」班主任走過黎，見到成班圍住我同啊螢「咳咳…我咩都睇唔到」
 
就係咁啊螢就成為左我嘅初戀女友，拜全班所賜我亦都有一個難忘旅行日