(無甜)上天給我的一個玩笑 (新增外傳): (24)

返到屋企之後，就發覺有人將係沙灘上嘅相放哂上FACEBOOK，自此之後，全級嘅人都知道我同啊螢拍拖，只要一見到我同啊螢一齊個陣，好多人都即刻扮啲情侶間相處情況…
 
「風風呀，我餵你食飯啦，呀」城城佢…
 
「好呀螢螢，呀」啊友竟然配合佢…
 
「你兩個好GAY呀」啊怡忍唔住出聲
 
「一個咁美好嘅情景比你地兩個GAY佬整衰哂」啊珊一面不屑咁望住佢地兩個
 




而我同啊螢就係到偷笑…
 
去到星期日
 
電話響起…係啊螢搵我
 
「啊風呀，你過黎幫一幫我手啦得唔得呀」啊螢把聲慌慌張張，背景仲有啲喊聲「盈盈扭計我搞佢唔店呀」
 
「好好好，我即刻黎，等我」我九秒九換好衫就出左去
 




上到去之後，盈盈都仲係喊緊
 
「盈盈佢做咩事呀」
 
「唔知呀家姐出左去之後佢就係到喊啦」啊螢都仲係慌慌張張
 
「盈盈，唔好喊啦好唔好，哥哥請你食糖好唔好」
 
盈盈唔理我…
 




「帶你去街街好唔好」
 
盈盈佢即刻收聲…仲指住梳化上面嘅外套…
 
「佢扭計想出街啫，你而家去執條毛巾仔帶支水比佢，我地帶佢出去玩啦」我拍一拍啊螢
 
而我就幫盈盈抹一抹面整好件衫，就出左去啦
 
我同啊螢就帶左盈盈去左附近嘅公園到玩，一去到盈盈就好興奮咁爬黎爬去，我同啊螢就係附近睇住佢
 
玩到咁上下，盈盈就要我抱住佢…而啊螢就幫盈盈抹汗，呢一刻我同啊螢嘅視線都落左係盈盈身上…
 
突然聽到…咔擦一聲
 
「頂…唔記得教靜音」原來係啊軒…




 
「喂啊軒你係到做咩呀」我望住佢
 
「無野跑下步啫，唔洗理我，你地繼續」啊軒講完又跑走左
 
睇黎班入面又要起哄啦…
 
盈盈雖然玩左好耐，但好似仍然未望夠風景…只要我地一話走佢又係到扭計，咁唯有再行下…
 
「你攰唔攰呀，你抱左盈盈咁耐」啊螢問我「洗唔洗我抱返佢」
 
我望一望盈盈，原來佢訓著左
 
「唔攰呀，呢種感覺幾好，同埋佢都訓著左，唔好整醒佢啦」其實我仲好鍾意抱住訓緊嘅小朋友，個種感覺就好似保護緊一顆新嘅樹苗
 




係橙黃色嘅太陽低下，我一手抱住盈盈，另一隻手拖實啊螢，係海邊慢慢咁行返去啊螢嘅屋企
 
係呢一刻我感覺到好溫暖…
 
上到去啊螢屋企後
 
「啊女你返黎啦」伯母執緊枱「咦呢位係…」
 
「伯母你好，我叫啊風，我係佢男朋友」我用好堅定嘅眼神望住伯母
 
「啊妹你返黎啦?盈盈呢?」佢家姐從房行出黎「哦…有男朋友都唔同家姐講」
 
啊螢紅左面…
 
「姐姐，盈盈訓左呀，我抱佢入房訓啦，唔好整醒佢」我就抱住盈盈入左啊螢間房，仲好小心咁放左係床上面，啊螢就幫佢蓋好被




 
我望一望啊螢張書枱，上面擺住我上次係長洲送嘅個對擺設，仲有一個盒蓋住，睇黎佢好珍惜呢對擺設
 
「啊風呀，既然上到黎，食埋飯先走啦」伯母係廚房大叫「世伯今晚唔返黎食，我而家煮好快就有飯食架啦」
 
「咁呀…好呀，麻煩伯母」我恭敬不如從命
 
「唔麻煩」伯母一路煮一路偷笑…