(無甜)上天給我的一個玩笑 (新增外傳): (28)

基於今年係學校嘅周年校慶，學校舉辦左好多慶祝活動，但係全部都唔岩我玩，太過學術啦…早前嘅歌唱比賽，再黎就視藝作品，就連岩岩完結嘅烹飪比賽，我都無興趣…直到今日
 
「拿，今年學校因為校慶呢就唔搞三人籃球賽啦…」班主任未講完
 
「吓，咁我咪無野玩」啊軒即刻彈起
 
「你聽埋先啦，我未講完，唔搞三人籃球，改為班際籃球，無需報名，全班自由參與，只要你比賽當日有衫有鞋有龜背，同球證講聲換人就可以啦，一個月後開波」
 
「正呀」啊軒對住我打眼色
 




「吓，我地班得啊風同啊軒兩個係籃球隊，點夠A班打呀?」其他人開始泄氣
 
「怕咩呀，我地兩個幫你地訓練下，再等啊風搵盧SIR做教練咪得囉」啊軒拍哂心口「我就唔信A班個邊真係咁文武雙全啦」
 
其實5A班個邊雖然話係精英班，但成績上只係好我地班少少仲要讀多一科選修科，班入面仲有個好串嘅Eric，成日走過黎串我地，啊軒同佢有唔少牙齒印，所以啊軒對於呢次比賽，佢係輸比邊隊都得，就係唔可以輸比A班
 
「我無問題呀，我一陣小息就去搵盧SIR做我地教練，全部男嘅一齊去練波，大家都唔想比個個死人Eric串掛」一講到呢到…成班彈起身
 
「咪再提個條友呀，一提就眼火爆，成日串我又肥又矮死毒男，諗起真係想打爆佢」城城好好火
 




「講得好呀，成鬼日過黎撩我地，呢次係我地串返佢嘅好機會，佢咁鍾意打籃球呀麻?成日扮勁呀麻?我地一於落佢面」啊華都好好火
 
「…」啊明咩都無講，但我睇得出佢嘅眼神，係復仇者嘅眼神
 
「我地一於打爆佢，雖然我只係足球隊，但條友成日係我地練波個陣嘈嘈閉，諗起都嬲」啊友雙眼團火就快要爆啦
 
就係咁…我地基本正選人數已經夠數，到時開波可以按照各人嘅狀態落場
 
「難得大家咁好火，嬴到冠軍我再帶你地去食餐好嘅慶祝」班主任都癲埋一份
 




「咁我地女仔都唔輸蝕，我地做啦啦隊」啊恩又一次領導群眾「我地B班共同進退」
 
「好!!!」全班齊到好似軍隊咁
 
「我有個提議呀」啊螢係呢個時候舉手「我地全班而家揀一隻顏色出黎，整一套班球衣，表示我地有幾齊心同團結，加上呢個係我地最後一個渡過嘅周年校慶，當係特別版班衫啦，好唔好呀」
 
「好!!!」5B軍又一次咆哮
 
「咁大家寫好哂你地想印嘅名之後就交比我地班女仔去整，你地努力練波啦，一定要打嬴佢地」啊恩又一次高呼
 
「好!!!」
 
「打爆5A!!!打爆5A!!!」啊軒癲左咁叫
 
「打爆5A!!!打爆5A!!!」全班都癲左




 
呢個時候…訓導主任鍾SIR黎左
 
「喂喂喂…你班友咁嘈做咩呀，嘈到成間學校都聽到你地」鍾SIR望住我地「嘩乜你地班發生咩事，個個對眼咁好火嘅」
 
班主任上前同鍾SIR溝通解釋就咁鍾SIR就走左
 
去到小息個陣…
 
「你地班友，今朝咁嘈做咩呀，知道班際籃球會輸比我地喊定先呀?」Eric又黎點火頭
 
我地成班無出聲全部人啤住佢，因為…我地唔同佢，唔係得把口，而係用行動擊敗佢
 
「唔出聲啞左呀?」Eric都仲係串串供唔走「你地等住比我大炒啦」
 




Eric走左之後，我立即上左去搵盧SIR做我地教練，而佢亦都答應左
 
「記得放學之後留一留係到，傾下練波嘅事喎」盧SIR一再提醒我
 
「得，無問題」我比左個OK嘅手勢就返左落去通知大家
 
放學鐘聲響起，大家都開收拾好班房，搬好哂枱凳，準備開我地嘅戰術大會
 
「嘩…你班友好認真咁喎」盧SIR一打開門就見到我地將個班房搞到好似個會議室咁「今日我就係想同你地傾傾練習嘅時間同細節…」
 
可能盧SIR見到我地眼入面個團火，就連佢都感染埋，佢都好認真咁幫我地分析個形勢，最重要係…佢就連練波嘅場地都幫我地安排好哂
 
「今日大致上係咁多…我見你地班友個眼神咁癲都知你地唔想輸，連我都興奮埋一份，今日好好休息，未來一個月我會操死你地」盧SIR即刻魔鬼教練上身